تام و خۆشی یا دژیانا پێشمەرگاتیێ دا من دیتی چو جاران وێ ژبیرناكـەم
دیدار، سالار محەمەد دۆسكی:
1- 5
پێشمەرگەیێ شۆرەشا گولانا پێشكەفتن خواز و ئێك ژ ئەندامێن شانێن دەسپێكیێن نهێنیێن رێكخستنا پارتی دیموكراتی كوردستان دناڤا سەنتەرێ باژێرێ دهۆكێ دا، بەحسێ بزاڤ و چالاكێن رێكخستنێ دكەت پشتی نسكۆیا سالا 1975ێ و تایبەت دناڤا تەخا قوتابیان دا، هەمان پێشمەرگە چەندین لاپەرێن ژیانا پێشمەرگاتیێ ل شۆرەشا گولانێ لادەت و ب تام و خوشی ل قەلەم د دەت.
فەهیم عەبدوللا حەمو، ئێك ژ ئەندامێن شانێن دەسپێكیێن نهێنیێن رێكخستنا پارتی دیموكراتی كوردستان دناڤا سەنتەرێ باژێرێ و تایبەت پشتی نسكۆیا سالا 1975ێ ل سەنتەرێ باژێرێ دهۆكێ هاتیە پێكئینان ، د دیدارەكێ دا ل گەل رۆژناما ئەڤرۆ، بەحسێ رەوشا رێكخستنێن نهێنی ل وی سەر دەمی دكەت و رەنگڤەدان و كارتێكرنا وان ل سەر دەڤەرێ بگشتی و تەخا گەنجان و قوتابیان ب تایبەتی، گۆت: بەری بەیانا 11ی ئادارێ كوردستان بگشتی و دەڤەرا بەهدینان ب شێوەكێ تایبەتی ل سنورێن پارێزگەها دهۆكێ وەك سەربازگەهەكێ بوو و گەلەك شەر و لێكدادانێن مەزن دناڤبەرا رژێما ئیراقێ و پێشمەرگێن شۆرەشا ئیلۆنێ دهاتنە ئەنجامدان، پشتی رێكەفتنا 11 ئادارێ یا سالا 1970ێ قوناغەكا دی ل كوردستانێ دەسپێكر، گەلەك گوندێن مە هاتنە سوتن و بەردان و خەلكێ مە قەستا سەنتەرێن باژێران كر وەك (دهۆك، زاخۆ، شێخان، ئاكرێ، ئامێدی..هتد) بەیانا 11ی ئادارێ كەش و هوایەكێ دی دا دەڤەرێ و گوند هاتنە ئاڤاكرن و وەزارەتا ئاڤەدانكرنا كوردستانێ ل حوكمەتا ئیراقێ دا هاتە دروستكرن وی دەمی شەهید (سامی عەبدوالرحمان) وەزیرێ وێ وەزارەتێ بوویە و ئەڤە ئێك بوو ژ مەرجێن بەیانا 11ی ئادارێ كو چەند وەزیرێن كورد پشكداریێ دحوكمەتا ئیراقێ دا بكەن و گوندێن كوردستانێ جارەكا دی ئاڤەدان بوونە ڤە، دناڤا سەنتەرێن باژێران دا روحەكا كوردایەتیێ پەیدا بوو و تایبەت دناڤا قوتابیان دا وی دەمی پشەنگا وان ئێكەتیا قوتابیێن كوردستانێ و ئێكەتیا لاوان بووینە و رۆلەكێ پیشەنگ هەبوویە دپەروەردەكرنا قوتابیان دا ل سەر بنیاتێ پەروەردەكا نشتیمانی و حەز و ڤیانەك بوو بۆ كوردایەتیێ و هەم دناڤا قوتابخانا و دناڤا سازیێن پەروەردەیی دا و هەتا دەرڤە قوتابخانا ژی و هەتا رۆلەكێ بەرچاڤ هەبوویە ل هندەك چالاكیێن پێش چاڤ وەكی ساخكرنا بیروەری یا و ئەنجامدانا ئاهەنگ و هەلكەفتان و چالاكیێن وەرزشی و دئەڤان سالان دا وەرزشێ وەرارەكا باش بخوەڤەدیت، راستە وی دەمی هێشتا دامو دەزگەهێن حوكمەتێ مابوونە ل دەڤەرێ، لێ وەك دەست هەلات پارێزگار، پارێزگارێن شورەشێ بووینە هاتینە دانان و پارێزگارێ دهۆكێ (هاشم عەقراوی) بوو كو وی دەمی ئەندامێ لژنا مەركەزی یا پارتی دیموكراتی كوردستان بوو، جێگرێ پارێزگارێ دهۆكێ(عەلی شنگالی) بوو و هەمان دەم بەرپرسێ لقێ ئێكا پارتی دیموكراتی كوردستان بوو، ڤێ قوناغێ دا تەخەكا خواندەڤان كەفتە دناڤا رێزێن پارتی دیموكراتی كوردستان دا و ئەڤە ب رێكا هەر دو رێكخراوێن ئێكەتیا قوتابیێن كوردستانێ و لاوێن كوردستانێ بوونە خودان رۆل، ل بوهارا سالا 1974ێ كو پێدڤی بوو ماوێ ئەوا چار سالان دا قانوونا حوكمێ ئوتونومی بهێتە بجهئینان، لێ حوكمەتا ئیراقێ خوە ڤەكێشا پشتی خوە ل سەر پێن خوە گرتی و هەست پێكر یا بهێز كەفتی و پشتی هەست پێكری كوگەهێن وێ یێن چەكی پربووینە و چ هێز نەشێن بەرهنگاری وێ بن و خوە ژ بەندێن رێكەفتنا ل گەل سەركردایەتی یا شۆرەشا ئیلۆنێ خوە ڤەكێشا و بەغدا دڤیا حوكمەكێ كارتویێ ل سەر مللەتێ مە ب سەپینت، خودێ ژێ رازی، سەركردێ نەتەوا كورد (مەلا مستەفا بارزانی) ب وی حوكمی رازی نەبوو و دووبارە جارەكا دی شەر دناڤبەرا حوكمەتا ئیراقێ و شۆرەشا مللەتێ كورد دا دەست پێكر، دەمێ كەش و هەوایێ شەری پەیدا بووی هژمارەكا ئێكجار یا مەزن یا خەلكێ كوردستانێ پەیوەندی ب ناڤ رێزێن پێشمەرگێ كوردستانێ كر و هەمی خودان باوەرنامە و خودان پلەیێن لەشكری و فەرمانبەر و مامۆستا و ئەڤە ژی بۆ دو هوكاران ڤە دگەری یا، یا ئیكێ ژ ئەنجامێ ئەوێ بەحشتا ل هەر چار سالێن رێكەفتنێ خەلكی دیتی و ئازادی چەندا ب تام و خوش بوو و هەمان دەم خەلك هەبووینە شەرەڤا پشكداریێ و بەرەڤانیكرن ژ ئاخا پیرۆزا كوردستانێ هەبوویە، هەمان دەم پشكداری یا ڤی خەلكی یا مەزن دووماهییێن نەرێنی ژی لدیف خوە راهێلان نەبتنێ ئەرێنی بتنێ بووینە بۆ بارگرانیەك ل سەر شۆرەشێ و ئەگەر شۆرەش یا رەشیق با و ئەڤ هەمی بارگرانیە نەبا رەنگە دەمێ رێكەفتنا خیانەتكاری یا جەزائیر ژی دهاتەكرن دژی شۆرەشێ كاودانێن وی دەمی تێك نەچووبان.
فەهیم عەبدوللا حەمو زێدەتر گۆت: پشتی نسكویا سالا 1975ێ سەقایێ ژیانێ ل كوردستانێ هاتە گوهورین و حزبا بەعس بۆ حزبا دەست هەلاتدار و رەشەكێن ئەمنێ و ئستخباراتێ و دیڤەلانكێن حوكمەتا بەعس وەك ریڤی یا ل كولانان هاتن و چوون و بەربوونە گیانێ خەلكەكی و تایبەت ئەو خێزانێن كەسایەتیێن شۆرەش گێر و رۆلەكێ بلند و كاریگەر هەبووینە و هەر كەسەكێ گومان ل سەر هەبا و بهێنا كوردایەتیێ ژێ هاتبا دهاتە دەستەسەكرن و ئەشكەنجەدان و ئەگەر هەر چ نەبایە دهاتە پاشڤەبرن، ژلایەكێ دی ڤە فشارێن حزبا بەعس ل سەر هەمی تەخێن جڤاكی دیاربوون و پێدڤی بوو هەمی ببنە ئەندامێن حزبا بەعس و دڤێت هەمی ئێك رەنگ بن، وەرە ژ ڤێ بلنداهی یا كوردپەروەریێ بهێی بۆ حزبا بەعس ئیمزا بكەی و بێژی ل گەل هەوە بوومە بەعسی و ئەڤە ل قوتابخانا و ئامادەیا و پەیمانگەها و فەرمانگەهێن حوكمی و دوكاندارا خەلكێ خودان كارێ ئازاد و رێكخراوێن پیشەی دەست پێكر و پێدڤی بوو هەمی یا تومارێن حزبا بەعس توماركربانە و دڤێت كومبوون ل گەل هەیڤانە هاتبانەكرن و ئەگەر ئێكی ئەو تۆمارا حزبا بەعس تژی نەكربا ئەو كەس دهاتە نەفیكرن و ئەگەر فەرمانبەر با دا هێتە ڤەگوهاستن بۆ جهەكێ نە لدیف دلێ وی و ب هەمی رێكا نەخوشی بۆ دهاتنەدروستكرن.
