تاها زاخۆیی: ده‌ست ژ پیشه‌كاران به‌رناده‌ین بتنێ پێدڤی یاریزانێ یه‌ده‌كین
ئه‌ڤرۆ، عه‌لی حاجی:
د داخویانیه‌كێدا ئه‌ندامێ ده‌سته‌كا كارگێریا یانا زاخۆ یا وه‌رزشی بۆ رۆژناما ئه‌ڤرۆ دیاركر ئه‌و له‌زێ د ئینانا چو یاریزانێن نوو بۆ ناڤ تیما خوه یا ته‌پا پێی یا پشكدار د خولا پلا نایابا ئیراقێ دا ناكه‌ن و ژ ئاستێ پیشه‌كارێن خوه درازینه له‌ورا ده‌ستا ژێ به‌رناده‌ن.
زێده‌تر تاها زاخۆیی گوت: ژبه‌ركو مه ده‌مه‌كێ باش هه‌یه بۆ ڤه‌گۆهاستنێن زڤستانێ و دو یاری ماینه له‌ورا ئه‌م له‌زێ بۆ ئینان و بڕیاردانا چو یاریزانان دا ناكه‌ین مه پلانێن باش دارشتینه پێخه‌مه‌ت بۆ قوناغا دویێ باشتر به‌رهه‌ڤبین و ئه‌وان كێماتیان چاره‌سه‌ربكه‌ین تایبه‌ت یاریزانێ یه‌دده‌ك كو ئه‌م پێدڤی نه ژبه‌ركو ئاریشا مه یا سه‌ره‌كی بوو د ماوێ قۆناغا ئێكێ دا گه‌له‌ك یاریان یاریزانێ باشتر و پێكهۆر نه‌بوو.
ژلایه‌كێ دووڤه ناڤهاتی كو سه‌رپه‌رشتێ تیما ته‌پا پێی یه گوت: پیشه‌كارێن مه شیاینه ببنه جهێ باوه‌ریا كادرێ راهێنانێ و جه‌ماوه‌ری و ئه‌م ژ ئاستێ وان درازینه له‌ورا ده‌ست ژێ به‌رناده‌ین و ئه‌و یاریزانێن ئه‌م ده‌ستنیشان بكه‌ین دڤێت ژ ئاستێ یاریزانێ مه كێمتر نه‌بیت به‌لكو باشتر ژی بیت هه‌تا گرێبه‌ستێ ل گه‌ل ئیمزابكه‌ین چنكو ئه‌م هه‌ڤڕكیێ بۆ رێزبه‌ندیا پێشیێ دكه‌ین و قوناغا دویێ دێ بزه‌حمه‌تر بیت تایبه‌ت پشتی هاتیه راگه‌هاندن چار یانه دێ پاشڤه چنه پلا ئێك و هه‌موو یانه دێ شه‌ڕی بۆ سه‌ركه‌فتنان كه‌ن و قه‌ره‌بوویا سێ خالان كه‌ن.
لدووماهیێ تاها زاخۆیی دیاركر كو یاریا وان یا سوبه‌هی پێنچ شه‌مبی دێ ل یاریگه‌ها زاخۆ یا نێڤده‌وله‌تی ل گه‌ل یانا ئه‌لقاسم بیێ ئاماده‌بوونا جه‌ماوه‌ری هێته ئه‌نجامدان پشتی ئێكه‌تیا ته‌پا پێی یا ئیراقێ یانا زاخۆ ب سزا دایی ب نه ئامابوونا جه‌ماوه‌ری بۆ ئێك یاری راگه‌هاندی، لێ رژدین سه‌ركه‌فتنێ بۆ جه‌ماوه‌رێ خوه بكه‌ینه دیاری.
