تایا خوینبەربوونێ کەنگی جهێ ترسێ یە؟
بەرپەرێ ساخلەمیێ:
د. مۆید ئەغالی میرزا، تایبەتمەندێ نەخۆشیێن ڤەکر و بەرگریا لەشی دیارکر کو تایا خوینبەربوونێ ب رێکا کڕنیێ دهێتە ڤەگۆهاستن دەمێ کو ب مرۆڤی ڤەددەت و وی جهی برینداردکەت ئەو ڤایرۆس دچیتە دناڤ لەشیدا و نەخۆشی پەیدادبیت و گۆت: ڕەنگە بهێتە ڤەگوهاستن ب رێکا گیانەوەرێن نەخۆش، هەروەسا ژ مرۆڤەکێ نەخۆش بۆ ئێکێ ساخلەم دهێتە ڤەگۆهاستن.
د. مۆید ئەغالی، ل دۆر نیشانێن ڤی ڤایرۆسی دیارکر دەمێ کو جارا ئێکێ دچیتە دناڤ لەشیدا چ نیشان دیارناکەن و نیشانێن وێ هندەک جارا ڕۆژەک یان سێ هەتا نەهـ ڕۆژا دڤێن هەتا دیاردبن، بەلێ هەکە ڤایرۆس ب رێکا خوینێ یان کەلوپەلێن دی یێن نەپاقژ بچیتە لەشێ مرۆڤی دێ دیاربوونا نیشانا گیرۆتربیت، سێ یان پێنج و هەتا سێزدە ڕۆژا.
قۆناغا دوێ هندەک نیشان دیاردبن وەکو تا، گرانبوونا لەشی، گێژبوون، زکچوون، عێلنجی و دلرابوون.
قۆناغا سیێ پنیێن خوینێ دیاردبن کو دبیت ئەو پنی د بچویک یان گەلەک د مەزن بن و دبیت خوین دگەل دلرابوونێ و دەستئاڤا زراڤ و ستویر یان دفنێ و دیسان دگەل بلغەمی رەنگە خوین هەبیت و هەکە گەلەک دژوارتر بیت دناڤ سەری دا خوینبەربوون دێ پەیدابیت و دبیت مێلاکا ڕەش و تەحێل مەزنتر لێبهێت و هەکە ئەڤ چەندە پەیدابوو دێ رێژا مرنێ مەزنتر لێهێت و رێژا مرنێ 30هەتا 50% یە و د قۆناغا چارێ دا نەخۆشی هێشتا دژوارتر لێ دهێت و مەترسی پترە.
ل دۆر خۆپاراستنێ ژ تایا خوینبەربوونێ دیارکر، گرنگترین تشت مرۆڤ خۆ ژ کڕنیان ب پارێزیت و ل مال دەرمان بهێنە ب کارئینان بۆ کۆشتنا کڕنیان و ل دەمێ نڤستنێ ئاگەهـ ژ جهێن نڤستنا خۆ هەبیت کو دپاقژن و کڕنی تێدا نەبن و جلکێن هچک درێژ بکەتە ل بەرخۆ ل دەمێ دەرکەتنێ و دیسا دەمێ مرۆڤ گۆشتی دکریت، یان سەرەدەریێ دگەل گۆشتی و گیانەوەرا دکەت خۆ ژ گیانەوەرێن نەخۆش دووربکەت و بەردەوام دەستگۆرکا بکەتێ و ماسکێ ب کاربینیت و هەکە گۆشتی بکڕیت کو گوشتێ مۆرکری بیت و ل دەمێ گۆشت دهێتە کەلاندن هەلبەت ڤایرۆس دمریت، بەلێ تشتێ گرنگ ئەوە گۆشت ل جهەکێ باوەرپێکری بیت و ل دەمێ سەرەدانا نەخۆشەکی ژی دهێتەکرن باش پێرابوونێن خۆپاراستنێ ب کاربینیت.
