تایبه‌تمه‌نده‌كێ نشته‌رگه‌ریێن گشتی: گه‌له‌ك نه‌خۆش بو ئێشانا مه‌عیدێ دهێن و ده‌ردكه‌ڤیت زه‌راڤێ وی یێ كولبووی
ئه‌ڤرۆ، له‌زگین جوقی:
د. عه‌بدوللا ئیحسان، تایبه‌تمه‌ندێ نشته‌رگه‌ریێن گشتی دیاركر كو زه‌راڤ وه‌كو كییسكه‌كی یه دكه‌ڤیته ل بن مێلاكێ دا، هه‌موو كه‌سان هه‌یه و كارێن وێ یێن سه‌ره‌كی ئه‌وه وه‌كو كوگه‌هه‌كێ بۆ زارده‌ڤێ ژ مێلاكێ ده‌ركه‌ڤیت و ده‌مێ مرۆڤ خوارنێ دخۆت ئه‌و زه‌رداڤ دهێته سه‌ر خوارنێ بۆ حه‌لاندنا خوارنێ، هه‌كه خوارنێ نه‌خۆت ل وێرێ دهێته ئومباركرن، هه‌روه‌سا ژی ده‌مێ ئومباردبیت، دبیت ئه‌و دیوارێ زه‌راڤێ ئاڤێ ژی دكێشیت تیر دكه‌ت و دهاڤێته سه‌ر رووڤیكا دا كارێ خوه بكه‌ت.
د. عه‌بدوللا ئیحسان، تایبه‌تمه‌ندێ نشته‌رگه‌ریێن گشتی, گۆت: ئه‌و نه‌خۆشیێن تووشی زه‌راڤێ دبن گه‌له‌ك جۆرن هه‌تا یێن زكماكی هه‌نه كو زه‌راڤ چێنابیت و گۆت: ئه‌و ب خوه زه‌راڤ و كه‌ناله‌كێ زه‌ركێ پێكڤه گرێداینه و گه‌له‌ك جاران مرۆڤ هه‌یه د زكماكی دا چێنابن، هه‌كه چێنه‌بن ئاریشه ل ده‌ستپێكی بۆ وان زارۆكان چێدبن ئه‌وژی زه‌ر دبیت كو زه‌رك بۆ دروست دبیت، ئه‌ڤه رێژه‌كا كێمه و هنده‌ك كه‌س هه‌نه دو زه‌راڤ هه‌نه یانژی هه‌ر چو نینن یانژی حاله‌ت هه‌نه د زكماكی دا ئاریشه هه‌نه و هه‌تا هه‌ودانا زه‌راڤێ و به‌رك هه‌نه كو هه‌ودانا زه‌راڤێ یێ به‌رك ناڤدا بیت هه‌تا په‌نجه‌شێرا زه‌راڤی هه‌یه.
د. عه‌بدوللا ئیحسان، گۆتژی: ئه‌و كه‌سێن زه‌راڤ نه‌بن زۆر د كێمن به‌لێ هه‌كه دگه‌ل زه‌راڤێ ده‌مارێن دی یێن زه‌ركێ ئه‌و بۆریێن زه‌ركێ یێن دهێنه مێلاكی ئه‌وژی دگه‌لدا نه‌بن، ئه‌و ژیێ ئێك هه‌یڤیێ دا پێدڤیه بهێنه نشته‌رگه‌ریكرن.
ئه‌وژی ئاشكه‌را كركو: هه‌موو پارچه‌یێن له‌شێ مرۆڤان د به‌رهه‌ڤن تووشی هه‌ودانێ ببن چاوا هه‌ودانا گه‌دێ چێدبیت وه‌سا هه‌ودانا زه‌راڤێ ژی چێدبیت و گه‌له‌ك ئه‌گه‌ر هه‌نه ژوانا ژی به‌رك هنده‌ك حاله‌ت هه‌نه بێ به‌رك چێدبن، هه‌روه‌سا ژی سۆتنا له‌شی هه‌كه له‌شێ مرۆڤه‌كێ بسۆژت یێ به‌رهه‌ڤه زه‌راڤ كول بیت, ئه‌و كه‌سێن هه‌ودانا زه‌راڤێ بۆ چێدبیت نه‌خۆش ل ده‌ستپێكێ گازنده ژ مه‌عیدێ و لایێ راستی یێ بن په‌راسیا ئه‌و ئێشان دگه‌هیته پشتی ناڤ ملاندا هه‌تا ژی حاله‌ت هه‌نه دلێ نه‌خۆشی ناچیته خوارنی و تا و دلرابوون دگه‌لدایه.
ئاماژه دا وێ چه‌ندێ ژی كو: گه‌له‌ك نه‌خۆش قه‌ستا مه دكه‌ن دبێژن مه‌عیدێ مه دئێشت ئه‌م پشكنینا وی دكه‌ین ده‌ردكه‌ڤیت زه‌راڤێ وی یێ كولبووی، پێدڤیه پشتی ئاموژگاریێن نۆشداری ده‌رمانان وه‌رگریت و وان خوارنێن ب دوهن نه‌خۆت خوه ژێ دوور بكه‌ت و حاله‌ت هه‌نه پێدڤی ب نشته‌رگه‌ریێ دبن.
د. عبدالله ئیحسان، دیاركر كو به‌ركێن زه‌راڤێ سێ جۆر هه‌نه ئه‌وژی به‌ركێن كولسترولی و به‌ركێن ره‌نگین كو د ره‌شن و تێكه‌له ناڤبه‌را هه‌ردویاندا و هه‌ر جۆره‌كی ئه‌گه‌رێن خوه هه‌نه یێن كولسترولی پتر هه‌نه ئاڤا زه‌ر ده‌مێ ژ مێلاكێ ده‌ردكه‌ڤیت تێكه‌له یه و گه‌له‌ك تشتن كو كولسترول ئێك ژوان ئاڤ و هنده‌ك جۆرێن خوێ و بویاغێ نه و ئه‌ڤه هه‌موو تێكه‌لی ئیك دبن و ئه‌ڤه دوهنا دحه‌لینن و به‌لانسه‌ك دناڤبه‌را واندا هه‌یه هه‌كه ئه‌و به‌لانس تێكچوو دبیته ئه‌گه‌ر به‌ركێن كولسترولی چێدبن.
