تایبه‌تمه‌نده‌كێ نه‌خۆشیێن ده‌روونی:ئالوده‌بوویێن قومارێ پێدڤی ب وه‌رگرتنا چاره‌سه‌ریا ده‌روونی دبن
دهۆك، شڤان لقمان:
نۆشداره‌كێ تایبه‌تمه‌ندێ نه‌خوشیێن ده‌روونی دیاركر، قومار ئێك ژ وان دیاردایه ئه‌ڤرۆ یا به‌ربه‌لاڤ دناڤ جڤاكێ مه‌دا، هه‌روه‌سا جیهانێ و ب چه‌ندین شێوه‌یان به‌ربه‌لاڤه و كاره‌كێ ب زیانه بۆ تاك و خێزانێ و كه‌سێ قومارێ دكه‌ت فێری چه‌ندین ره‌فتارێن خراب دبیت و په‌یوه‌ندیێن وی لاواز دبن و دبنه ئه‌گه‌رێ ژده‌ستدانا كارێ وی، بۆ چاره‌سه‌ركا وان كه‌سان پێدڤیه خێزان ژی یا هاریكاربیت دگه‌ل نۆشداری و نه‌خۆشی داكو بشێن كونترول بكه‌ن.
د. ئاڤا غازی ره‌شید، خویاكر قومار كاره‌كێ ب زیانه بۆ تاك و خێزانێ، هه‌روه‌سا جڤاكی، ئه‌و كه‌سێن به‌رده‌وام قومارێ دكه‌ن و زال دبیت ل سه‌ر ژیانا وی و بگه‌هیته ئاسته‌كی به‌رده‌وامبیت ل سه‌ركرنا قومارێ هه‌تا ده‌یندار دبیت و نه‌شێت ده‌ینێن خوه بده‌ت وی ده‌می ئه‌ڤ كه‌سه دبیته ئالوده‌بوویێ قومارێ،
ده‌مێ ئالوده‌بوونا قومارێ ئه‌و كه‌سه فێری چه‌ندین ره‌فتارێن خراب دبیت وه‌ك كرنا دره‌وێ، هه‌روه‌سا خاپاندنا كه‌سان و دزیان، ب ڤان ره‌فتاران كارتێكرنه‌كا مه‌زن ل سه‌ر خێزانێ دبیت، هه‌روه‌سا په‌یوه‌ندیێن وی یێن كۆمه‌لایه‌تی لاوازدبن و دبیته ئه‌گه‌ر كو كارێ خوه ژده‌ست بده‌ت.
تایبه‌تمه‌ندێ نه‌خوشیێن ده‌روونی دازانین كه‌سێن ئالوده‌بووی ل سه‌ر قومارێ پالده‌ره‌كێ بهێز د مێشكێ واندا په‌یدادبیت كو به‌رده‌وامبیت ل سه‌ركرنا قومارێ، هه‌روه‌سا مێشكێ وی به‌رده‌وام یێ مژوولی هزركرنێیه ل سه‌ر قومارێ وه‌كی وان كه‌سێن ئالوده‌بووین ب ڤه‌خوارنێن كحولی، ئه‌و كه‌سێ قومارێ دكه‌ت ده‌مێ فایده‌دبیت پتر دهێته ئازراندن كو به‌رده‌وامبیت ل سه‌ر ئه‌نجامدانا قومارێ، هه‌روه‌سا ده‌مێ ئه‌ڤ كه‌سه خوساره‌ت دبیت هه‌ول دده‌ت دوباره ئه‌نجام بده‌ت داكو ئه‌و خوساره‌تیا دای بزڤرینیته ڤه، هه‌روه‌سا ده‌مێ قومار ل ڤان كه‌سان دهێته قه‌ده‌غه‌كرن دێ بینی بێهنا وی گه‌له‌ك ته‌نگ بوو و تۆره‌دبن، ئه‌ڤه هنده‌ك ژ سالوخه‌تێن كه‌سێن قومارێ ئه‌نجامده‌ن كو ئالوده‌بووینه.
هه‌روه‌سا دازانین د ڤه‌كولینان دا دیاربوویه ئه‌وكه‌سێن ئالوده‌بووین ب كرنا قومارێ دناڤ مێشكێ واندا هنده‌ك گورانكاری په‌یدادبن وه‌ك وان گورانكاریێن كه‌سێن ئالوده‌بوۆین ب مادێن هوشبه‌ر، ژبه‌ر ڤێ چه‌ندێ ئالوده‌بوون ل سه‌ر قومارێ وه‌ك ئالوده‌بوونه ب مادێن هوشبه‌ر و گه‌له‌ك كه‌س هه‌نه دبێژن جاره‌ك یان دو جار ئه‌نجامدانا قومارێ چ كارتێكرنا خوه نینه و گۆت: ئه‌و كه‌سێن نوكه ئالوده‌بووین وانژی ب جاره‌كێ و دوجاران یا ده‌ستپێكری و هێدی هێدی یێن ئالوده‌بووین.
هه‌روه‌سا دیاركر خوپاراستن گه‌له‌ك ب ساناهیتره ژ چاره‌سه‌ریێ، چاره‌سه‌ركرنا كه‌سێن ئالوده‌بووی ب ساناهی نینه و پێدڤیه خێزان د ئاگاداربن د نوكه‌دا گه‌له‌ك جورێن قومارێ دبه‌لاڤن ل ژێر ناڤێن جودا جودا به‌لێ هه‌ر قوماره و هه‌مان ئالوده‌بوون ل سه‌ر كه‌سان دكه‌ت و ده‌رئه‌نجامێن گه‌له‌ك خراب یێن د دووڤرا هه‌ین.
