ترامب: مەیلا ئیمپراتۆری د چارچۆڤەیێ دیموكراسییەكا هەڤچەرخ دا
زێرەڤان ئۆسێ
ژ دەستپێكا خۆ یا سیاسی، دۆنالد ترامب ی نە وەك پۆستەكێ دەستووری یێ سنوورداركری لێ نێزیكی چەمكێ «سەركردێ رەها» لگەل پۆستێ سەرۆكاتییێ رەفتار كر. گۆتارا وی یا سیاسی، بریارێن وی یێن جێبەجێكرنێ و هەتا ئەو هێمایێن كو دخوازیت دگەل وان كاربكەت، هەمی ئاماژەنە بۆ مەیلەكا دیاركری بەرەف دروستكرنا دەستهەلاتەكێ ل دۆركەسایەتیا وی بزڤڕیت.
د ڤێ چارچۆڤەیی دا، ئەو پێشنیارا هاتیكرن كو نمایشەكا لەشكەری ب هەلكەفتنا سالرۆژا ژدایكبوونا وی بهێت ئەنجامدان، نە تنێ رێورەسمەكێ دیپلۆماسی یێ بسەرڤەسەرڤەیە، بەلكو وەكو دەربرینەكا هێمایی یا ناڤەندیكرنا خۆ د ئاڤاكرنا دەولەتێ دا. هەروەسا بریارا وی یا گوهۆڕینا ستانداردێن دوشێن حەمامێن ئەمریكی نە بتنێ نیشانا مژیلاهییا وی ب وردەكاریێن رۆژانەیە، بەلكو بزاڤەكە بۆ سەپاندنا دیتنا وی یا گشتگیرە یا ژیانەكا نموونەیی وەك ئەو دبیینت، هەتا خۆ د سادەترین كاروبارێن ژیانێ دا.
لێ بریارا وی یا راكرنا وێنەیێ سەرۆكێ بەرێ باراك ئۆبامایی ژ كۆچكا سپی و هلاویستنا وێنەیێ خۆ وەك دیكومێنتكرنا رزگاربوونا وی ژ بزاڤا كوشتنێ، ئاماژەیەكە بۆ دوبارە داڕشتنا بیردانكا سیاسی لدویڤ دیتنەكا كەسۆكی، كو دەمێ رزگاربوونا وی دگوهۆریت دكەتە «ئەفسانەیەكا بنیاتنەر» یا نوی، كو ژ تێگەهشتنا كلاسیكی یا پالەوانێ سیاسی بەرزتر دبیت، هەتا دگەهیتە تشتەكێ نێزیكی ئەفسانەیەكا كەسۆكی یا كو جهێ دیرۆكا نشتیمانی دگڕیت.
ئەڤ هەمی نیشانە ب شێوەیەكێ جودا ژ وێ دۆرهێلا جڤاكی یا كو دیاردەیا ترامبی بەرهەمئینای ناهێنە خواندن؛ جەماوەرەكێ بەرفرەه كو ل سەركردەیەكێ بهێز دگەڕیت، ل ڤەگێڕانا رزگاربوونێ و سەرۆكەكێ كو خۆدانێ ساخلەتێن «رزگاركەری» د دەمێ قەیران و دابەشبوونا جڤاكی دا دگەڕیت.
ترامب نە تنێ سەرۆكەكێ سەرەنجڕاكێشە، بەلكو خۆدیكەكە دگوهۆرینێن كویر یێن دناڤ پێكهاتەیا كەلتۆرێ سیاسی یا ئەمریكا دا رەنگڤەددەت، هۆشدارییا لادانێن پروسێسا دیموكراسیەتا ئەمریكا یا كەڤنار ددەت كو نەكەڤنە د چارچۆڤەیێ كەسایەتیكرنا دەستهەلاتێ دا، ئەگەر سەرۆكەكێ كاریزماتیك و بنیاتەكێ جەماوەری یێ كو بەرهەڤ بیت دگەل درویشمان پتر ژ دامودەزگەهان كاربكەت.
