ترامـپ دێ پشتەڤـانیێ ل کـوردان کـەت
سیناتۆرەکێ ئەمریکی دیار کر د رەوشا نها یا ئالۆز ل رۆژهەلاتا ناڤین دا ترامپ وەکو سەرۆکێ ئەمریکا دێ پشتەڤانیا کوردان کەت، چونکی نها رەوشا رۆژهەلاتا ناڤین گەلەک یا ئالۆزە و ئەمریکا دێ پشتەڤانیێ ل ئسرائیلێ و کوردان کەت و ئەو یەک ژی ژ بۆ کوردان دەلیڤەکا گەلەک گرنگ و دیرۆکی یە.
سیناتۆرێ کۆماریا ترنێت فرانکس دیار کر، رۆژهەلاتا ناڤین د رەوشەکا گەلەک خراب دایە، مخابن جۆ بایدن نەشیا یا پێدڤی بکەت، د رەوشا نها یا ئالۆز ل رۆژهەلاتا ناڤین دا ئەمریکا پێگەهێ خوە یێ جاران نەمایە، ئەو یەک ژی ژ ئەنجاما سیاسەتا لاواز یا ئیدارا بایدنی یە، ژ بەر ڤێ یەکێ ژی پێدڤیا ئەمریکا ب ترامپی هەیە، ترامپ دێ شێت رۆلێ ئیرانێ ل دەڤەرێ گەلەک لاواز کەت، ئەمریکا د سەردەمێ ترامپی دا دێ پێگەهێ خوە ل رۆژهەلاتا ناڤین گەلەک بهێز کەت، وی دەمی دێ قۆناغەکا نوو دەستپێکەت، ئەمریکا د رەوشا نها یا ئالۆز دا دێ پشتەڤانیێ ل ئسرائیلێ کەت، ئەو یەک ژی بۆ ئیرانێ و نەیارێن ئسرائیلێ دێ گەلەک خراب بیت.
ناڤهاتی ئەو یەک ژی دیار کر، ترامپ دێ پشتەڤانیێ ل کوردان کەت، چونکی ژ بۆ ئارامیا رۆژهەلاتا ناڤین و لاوازکرنا دوژمن و نەیارێن ئەمریکا دڤێت ئەمریکا پشتەڤانیێ ل کوردان بکەت، ئەو یەک ژی بێگومان گەلەک گرنگە، مخابن د سەردەمێ دەستهەلاتا بایدنی د چار سالێن بۆری دا گەلەک تشت ل عێراقێ ل دژی کوردان هاتنە کرن و مخابن ئەمریکا وەکو پێدڤی پشتەڤانی ل کوردان نەکر، لێ ب هاتنا ترامپی دێ گەلەک تشت هێنە گوهۆڕین و دێ سەردەمەک نوو دەستپێکەت، ئەو یەک ژی ب تەمامی د بەرژەوەندیا کوردان دایە و گۆت: (دیموکراتان چو بەرنامە و پرۆژەیەک ژ بۆ پشتەڤانیا کوردان نینن، سیاسەتا چەند سالێن بۆری یا بایدنی د بەرژەوندیا ئیرانێ و نەیارێن ئەمریکا دا بوو، لێ ب هاتنا ترامپی ئەو یەک نامینیت و دێ گەلەک گوهۆڕینێن مەزن ل دەڤەرێ روو دەن کو دێ کورد بنە مفادارێن سەرەکی یێن گوهۆڕینێن ل دەڤەرێ).
سیناتۆرێ کۆماریا ئەو یەک ژی دیار کر، ب هاتنا ترامپی دێ شەڕێ نها د ناڤبەرا رۆسیا و ئۆکرانیایێ دا ژی ب دووماهی هێت، سیاسەتا بایدنی د چەند سالێن بۆری دا ل هەمبەر رۆسیا سیاسەتەکا سەرکەفتی نەبوو، بایدن نەشیا دووماهیێ ب شەڕێ د ناڤبەرا رۆسیا و ئۆکرانیایێ دا بینیت، لێ ترامپی ئەو هێزە هەیە و دێ شێت رۆسیا نەچار کەت دووماهیێ ب شەڕی بینیت و ئەو یەک ژی ژ بۆ ئارامیا جیهانێ گەلەک یا گرنگە، ب کورتی نها پتر ژ هەر دەمەکێ پێدڤیا ئەمریکا ب سیاسەتەکا نوو هەیە کو بشێت پرسێن جیهانێ و ب تایبەتی ژی یێن رۆژهەلاتا ناڤین چارەسەر بکەت.
