ترامپ دێ پشته‌ڤانیێ ل مافێن کوردان که‌ت
ڤەکۆلەرەکێ ناڤدار یێ تورکیا دیار دکەت ترامپ دێ پشتەڤانیێ ل مافێن کوردان ل سووریێ کەت، چونکی کەسێن ترامپ بۆ پۆستێن نوو ئەرکدار کرینە هەموو پشتەڤانیێ ل مافێن کوردان دکەن و د سەردەمێ ترامپی دا دێ پێگەهێ کوردان ل دەڤەرێ بهێزتر لێ هێت.
فه‌هیم تاشته‌کین ڤەکۆلەرێ ناڤدار یێ تورکیا کو هەتا نها گەلەک بابەت دۆر پرسا کوردی ژی بەلاڤ کرینە د نووترین بابەتێ خوە دا دیار دکەت، ل سووریێ هه‌تا نها ژی سیسته‌مێ نوو دێ چاوا بیت دیار نینە، راستە بزاڤەکا مەزن ژ ئالیێ تورکیا و هندەک وەلاتێن رۆژئاڤایی هەیە دا سیستەمێ نوو یێ سووریێ ل گۆر دلێ وان بیت، لێ ئەحمەد شەرع ژی چاڤەرێی دەستبکاربوونا ترامپی یە و گۆت: (دۆنالد ترامپ سه‌رۆکێ هەلبژارتی یێ ئه‌مریکا بیستێ ڤێ مەهێ ب فەرمی وەکو سەرۆکێ نوو یێ ئەمریکا دەست ب کارێ خوە دکەت، لێ بەری ترامپ بهێتە سەر ده‌ستهه‌لاتێ کابینه‌یا خوه یه‌ک ئالی کریه و که‌سێن کو ل دەوروبەرێن خوه کۆم کرینه، پشته‌ڤانیا مافێن کوردان ل سووریێ دکه‌ن و ب ئاشکرا په‌یامێ دده‌نە تورکیا و شامێ و ژ وان دخوازن کو ئێرشێ کوردان نه‌کەن و ئارامیێ تێک نه‌دەن. هه‌که گه‌رەنتیا پاراستنا کوردان و پێکهاتەیێن دی نه‌هێته دان زه‌حمه‌ته هێزێن ئه‌مریکا ژ سووریێ ڤه‌کێشن، چونکی نها سەردەمەک نوو ل سووریێ دەستپێکریە و ئیران و رۆسیا ل سووریێ نەماینە، ئەو یەک ژی بێگومان دەلیڤەکا دیرۆکی یە بۆ ئەمریکا و ئەمریکا کار بۆ بهێزبوونا پێگەهێ خوە ل سووریێ دکەت و هەر کەس ژی دزانیت هەڤپەیمانێ سەرەکی یێ ئەمریکا ل سووریێ ژی نها کوردن).
تاشته‌کین هه‌روه‌سا راگه‌هاند ژی کو د ناڤبه‌را هێزێن سووریا دیموکرات و ئەحمەد شەرع دا کۆمبوونه‌ک ب چاڤدێریا ئه‌مریکا هاته سازکرن، لێ کۆمبوونا وان یا ئێکێ بێی ئه‌نجام ب دووماهی هات و گۆت: (د کۆمبوونێ دا ئەحمەد شەرع ل دژی فیدرالیێ و خوه‌سه‌ریێ هه‌لوەستێ خوە دیار کر و ل هه‌مبه‌ر دا مەزلوم عه‌بدی فەرماندارێ گشتی یێ هێزێن سووریا دیموکرات ژی راگه‌هاند کو ئه‌و ل سه‌ر خوه‌سه‌ریێ رژدن و ب چو رەنگەکێ ژی ده‌ست ژ چه‌کان به‌رنادەن، لێ د هه‌مان ده‌می دا هه‌که سیسته‌مەک نوو بۆ سووریێ بهێته دانان، د‌ستوورەکێ نوو بهێته ئامادەکرن و مافێن کوردان بهێته گه‌ره‌نتی کرن ئه‌و ئاماده‌نه ببنە پشکه‌ک ژ لەشکرێ نوو یێ سوریێ، د کۆمبوونێ دا بەحسێ چاوانیا پارڤەکرنا داهاتێ سووریێ ژی هاتیە کرن کو نها ژێدەرێ سەرەکی یێ پەترۆلا سووریێ ل ژێر کۆنترۆلا هێزێن سووریا دیموکرات دایە و هێزێن سووریا دیموکرات دیار کرینە هەکە سەبارەت ب پرسێن سیاسی بگەهنە رێککەفتنەکێ دێ بابەتێن ئابووری ژی هێنە چارەسەرکرن).
ناڤهاتی ئەو یەک ژی دیار کریە، ئەمریکا، ئسرائیل و پڕانیا وەلاتێن رۆژئاڤایی پشتەڤانیێ ل مافێن رەوا یێن کوردان ل سووریێ دکەن و دەستهەلاتا نوو نەشێت بێی رازیبوونا کوردان چو پێنگاڤەکێ بهاڤێژیت.
