ترومبێلێن چينى بۆ ده‌مه‌كى ب تنێ د باشن
پەروین سەلاح:
فيته‌ره‌ك دده‌ته دياركرن كو ترۆمبێلێن چنى بۆ ده‌مه‌كێ ده‌ستنيشانكرى د باشن و فرۆشياره‌كێ پێشانگه‌هێن ترۆمبێلان ژى ديار دكه‌ت كو ئه‌و ترۆمبێلێن بۆ چينى و ئورۆپا دهێنه دروستكرن ل گه‌ل يێن بۆ ڤێره دهێن هه‌مان كوالێتى نينن، ئێك ژ راگه‌هاندنكارێن ل بازاره‌كێ ترۆمبێلێن چينى ژى كار دكه‌ت دبێژيت: “ترۆمبێلێن مه يێن ل چينێ بۆ هه‌موو دنيايێ دهێنه چێكرن وه‌كو ئێكن”.
ئێك ژ وان كه‌سێن ل جهه‌كێ تايبه‌ت ب ترۆمبێلێن چينى ڤه كار دكه‌ت دده‌ته زانين كو ژ به‌ر ئه‌رزانيا بهايى و كوالێتى و ته‌كنۆلۆژيا تێدا هاتيه بكارئينان ل گه‌ل گره‌نتى و مه‌رجێن سلامه‌تيێ، وه‌لاتى دخوازن ترۆمبێلێن چينى بكرن.
دلنا عرفی ژ راگەهاندنا پێشانگەها هه‌ڤال یا ترۆمبێلان بۆ رۆژناما ئەڤرۆ دياركر كو ترۆمبێلێن چينی بازارێ وان گەلەك یێ خوه‌شە، چونكو کوالێتیا وان پترە و يا پره ژ تايبه‌تمه‌ندى و ساخله‌تان و گره‌نتيا وێ ژى گه‌له‌كه و يا باوه‌رپێكرى يه و گۆت: “گه‌له‌ك ژ وێ چه‌ندێ باشتره كو بچى ترۆمبێله‌كا بكارهاتى بكرى و چه‌ند پارچه بۆياغ بن و چ گره‌نتى ژى ل سه‌ر نه‌بيت”.
ئاشكه‌را ژى كر كو د نها دا، خه‌لك حه‌ز دكه‌ت ترۆمبێلێن چينى بكڕن ژ به‌ر كو گره‌نتيا وان باشتره و تايبه‌تمه‌نديێن وان پترن و تايبه‌تمه‌نديێن ئێمناهيێ ژى تێدا نه و گۆت: “خه‌لك ژى حه‌ز ژ تشتێ ب ساناهى دكه‌ن”.
ده‌باره‌يى وێ چه‌ندێ كا ترۆمبێلێن چينى يێن بۆ ئورۆپا و چينێ دهێنه دروستكردن و يێن بۆ عيراقێ دهێنه ره‌وانه‌كرن هه‌مان تايبه‌تمه‌ندى نه، راگه‌هاندنكارا پێشانگه‌ها هه‌ڤال خۆيا كر كو چو جوداهيه‌ك د ناڤبه‌را ترۆمبێلێن وان دا نينه و گۆت: “بۆ هه‌موو دنيايێ ب ئێك كوالێتى دهێنه چێكرن، تايبه‌تمه‌ندى د جودانه، به‌لێ بكرى چو تايبه‌تمه‌نديا بڤێت ل هه‌ر جهێ بڤێت ل به‌ر ده‌سته“.
ئێك ژ وان كه‌سێن ل پێشانگه‌هێن ترۆمبێلان كار دكه‌ت به‌حس ل وێ چه‌ندێ دكه‌ت كو بكرێ ترۆمبێلا چينى ب تايبه‌تمه‌ندى و بهايێ وێ يێ ئه‌رزان دهێته خاپاندن و د راستى دا كه‌رستێن وان يێن يه‌ده‌گ گه‌له‌ك د گرانن و باشتره خه‌لك خوه ژێ بده‌ته پاش.
مه‌له‌ڤان ره‌زيكى بۆ رۆژناما ئه‌ڤرۆ گۆت: “بۆ نمۆنه ترۆمبێله‌كا چنى ژ لايێ دو كۆمپانيان ڤه هاتيه هه‌رێما كوردستانێ، يا هه‌ردو كۆمپانيان ژى نه وه‌كو ئێكه“.
ئاشكه‌را ژى كر كو ترۆمبێلێن چينى ده‌ما ژ گره‌نتيێ ب دووماهيى دهێن دبنه ئاريشه بۆ خودانى ژ به‌ر كو دكه‌ڤنه ناڤ ئاريشان ژ به‌ر نه‌بوون و گرانيا پارچێن يه‌ده‌ك دنالن.
مه‌له‌ڤان به‌رده‌واميێ دده‌ته گۆتنێن خوه و دبێژيت: “ئه‌ڤ ترۆمبێلێن ژ لايێ چينێ ڤه دهێنه چێكرن و نمايشكرن وه‌كو وان ترۆمبێلان نينن يێن نها د بازارێ مه دا هه‌يى، دا كو بهايێ وان كێم ببيت و وه‌لاتى بكرن، رادبن ب كێمكرنا تايبه‌تمه‌ندى و ئينانه‌خوارا كوالێتيێ”.
دده‌ته دياركرن ژى كو ل هه‌ر وه‌لاته‌كى چه‌ندين رێكارێن قانوونى هه‌نه، هه‌تا ترۆمبێل دچيته د ناڤ وى وه‌لاتى دا، گه‌له‌ك جاران وه‌لاته‌كى نه‌هێلايه ترۆمبێله‌كا مۆدێل نوو يا برانده‌كا گه‌له‌ك باش بچيته د ناڤا وه‌لاتێ وێ دا، ژ به‌ر ئاريشه‌كا بچووك و ئه‌و هه‌موو ترۆمبێل ڤه‌گه‌راندينه و گۆت: “ل ڤێره ئه‌ڤ تشته نينه“.
ل دووماهيێ ژى گۆت: “د ناڤا پێشانگه‌هێن ترۆمبێلان دا، نها يا بوويه پێشبێركيا ئه‌رزانيا ترۆمبێلێن چينى، ئه‌ڤه ژى هه‌موو ل سه‌ر كيستێ تايبه‌تمه‌ندى و باشترينيێ يه، ئه‌و هه‌موو تايبه‌تمه‌ندى و باشيێن ترۆمبێلێن چينى به‌هرا دو سالان ناكه‌ن”.
ئێك ژ وه‌لاتيێن پارێزگه‌ها دهۆكێ كو كارێ فيته‌ريا ترۆمبێلان دكه‌ت ژى دده‌ته دياركرن كو ل سالێن ده‌ستپێكێ ترۆمبێله‌كا باشه، به‌لێ پاشان خودان ژ به‌ر ئاريشێن وان د ناليت.
بيرهات باجلۆری بۆ رۆژناما ئەڤرۆ گۆت: ترۆمبێلێن چينی کرینا وان یا ئەرزانە”. ئاشكه‌را ژى كر كو د پێشکەفتی نه و تەکنولوژیا نوو يا تێدا هاتیە بکارئینان ب سالوخەتێن باش هاتینە چێکرن.
زێده‌تر گۆت: “دو بۆ سێ سالێن ده‌ستپێكێ كارێ خوه دكه‌ت، به‌لێ پاشان خودان ژ به‌ر ئاريشێن وان دناليت، كه‌رستێ يه‌ده‌ك ژى گه‌له‌ك يێ گرانه و ژ قه‌بارێ وان گرانتره“.
