ترومبێلێن چینی بکڕن
نيوار محهمهدسهليم شوكرى
د سالێن دووماهییێ دا، جاددەیێن هەرێما کوردستانێ ب شێوەیەکێ بەرچاڤ ژ ترۆمبێلێن چینی (وەک بی وای دی، چانگان، ئێم جی، جێلی، هەڤال و گەلەکێن دی) پڕبوویە.
ئەڤ پێلا نوو یا ترۆمبێلان لایەنگر و دژبەرێن خۆ هەنە، لێ پرسیارا هەرە گرنگ کو مێشکێ کڕیاران مژول دکەت ئەوە: ئایا کڕینا ترۆمبێلەکا چینی بڕیارەکا ئابووری یا دروستە؟ ئێک ژ ئەگەرێن سەرەکی یێن کو خەلکی بەرەڤ ترۆمبێلێن چینی دچیت، هەبوونا تەکنەلۆژیا پێشکەفتی و دیزاینێن مۆدێرنە ب بهایەکێ گەلەک کێمتر ژ ترۆمبێلێن یابانی و کۆری.
کڕیار دشێت ب هەمان پارەیێ ترۆمبێلەکا یابانی یا سادە، ترۆمبێلەکا چینی یا پڕی تایبەتمەندی (وەک کامیرێن ٣٦٠، رادار، و سیستەمێن زیرەک) بکڕیت. د سەردەمەکێ دا کو بهایێ پانزینێ ل هەرێما کوردستانێ نە یێ سەقامگیرە، ترۆمبێلێن چینی وەک رزگارکەرەک دەرکەفتن. پڕانیا ڤان ترۆمبێلان ب مەکینێن بچووک یێن “تۆربۆ” کار دکەن، کو د هەمان دەم دا هێزەکا باش و مەزاختییەکێ گەلەک کێم یێ پانزینێ دابین دکەن.
ب گۆرەی شارەزایێن میکانیکی، هندەک ژ ڤان ترۆمبێلان دشێن ب ئێک لیترا پانزینێ نێزیکی ١٥ هەتا ١٨ کیلۆمەتران ببڕن، کو ئەڤە هەڤبەر ب ترۆمبێلێن شەش پستن یان یێن کەڤن، سالانە ب ملیۆنان دیناران بۆ خودانێ خۆ دزڤڕیننەڤە.
خالا هەرە لاواز کو گەلەک جاران وەک تێبینی ل سەر ترۆمبێلێن چینی دهێتە گۆتن، داکەفتنا بهایێ وانە ل دەمێ دوبارە فرۆتنێ. لێ ل ڤێرە “هاوکێشەیەکا ئابووری” یا نوو دروست دبیت: هەکە شوفێرەک رۆژانە رێیەکا درێژ ببڕیت، ئەو پارەیێ ئەو ل سەر پانزینێ پاشکەفت دکەت، دشێت د ماوێ چار تا پێنج سالان دا بگەهیتە چەند هزار دۆلاران.
هەکە ترۆمبێلەکا چینی ل دەمێ فرۆتنێ پێنج هزار دۆلاران ژ بهایێ خۆ یێ سەرەکی بدەتە خوار، لێ د ماوێ وان پێنج سالان دا خودانێ وێ شەش هزار دۆلار ل سەر مەزاختیێ پانزینێ پاشکەفت کربن، ل وی دەمی کڕیار نەک هەر یێ زەرەرمەند نینە، بەلکو دێ مفا ژی گەهیتێ.
کڕینا ترۆمبێلەکا چینی د ڤی سەردەمی دا نەک هەر کارەکێ ناچاری یە، بەلکو بۆ وی کەسێ دڤێت ترۆمبێلەکا سفر و ب گرەنتی هەبیت و مەزاختیێ پانزینێ ل سەر خۆ کێم بکەت، بڕیارەکا پرۆفیشنال و ژیرانەیە. لێ یا فەرە کڕیار ل سەر کوالێتیا کۆمپانیا دابینکەر و هەبوونا پارچێن یەدەک پشتڕاست بیت دا کو مفایێ وی یێ ئابووری تمام ببیت.
