ترێندا قوتابیان بۆ مامۆستایان ب شریناهیان دیاردەیەكا جوانە
هەرهین محەمەد:
ل ئەڤێ دووماهیێ ترێندەكا جوان و بالكێش دناڤبەرا قوتابیان و مامۆستایان هاتە چێكرن و ئەڤ ترێندە ژی بتنێ بۆ ئەوان مامۆستایان دهاتە كرن یێن خۆشتڤی لدەف قوتابیان، ئەڤ ترێندا قوتابیان بۆ مامۆستایان ب شریناهییان گەلەك تشتەكێ جوانە، ژبەرکو قوتابی ب ڕەنگەکێ جودا و جوان دەربرینێ ژ هەستێن خۆ دكەن بۆ مامۆستایان.
مامۆستا شێرزاد عەبدوللا لدور هەمان بابەت دیار کر کو دبیت ئەڤ تشتە ل قولاچكەكا دونیایێ یێ چێبووی و دەنگڤەدای د هەموو قوتابخانان دا و گۆت: پتریا كاران باشی و خرابێن خۆ هەنە ئەڤێ ترێندێ ژی باشی و خرابێن خۆ هەنە و ئێك ژ باشیێن ئەڤێ ترێندێ ژی دەربڕینا حەزژێکرنا قوتابیانە بۆ ماموستای و یێ پشت راستم ژی ئەڤ ترێندە بۆ هەموو مامۆستایان ناهێتە چێكرن.
دلوڤان سالح، ڕێڤەبەرێ قوتابخانا گەلڤین دیار کر کو ئەو ترێندا ل ئەڤێ دووماهیێ دەركەفتی گەنجان گەلەك كەیف پێ هاتیە و مامۆستایێن خۆ ب ئەڤی ڕەنگی خەلات دکەن و مرۆڤ نەشێت ب ڕەشبینی و نەجوانی سەحكەتە ئەڤێ دیاردا ترێندا شریناهیان و گۆت: چونكو تشتەكێ ب هەست و جوانە و مامۆستا ژی هەست پێدكەت قوتابیێن وی ڤیان یا بۆ هەی، لەورا ئەوان ئەڤ كارێ بچویك یێ بۆ كری ب تایبەت دەمێ دهێتە وێنە كرن و ئەڤە بیرهاتنە بۆ مامۆستایی و قوتابیان و هەردیسان قوتابی ژی هەست پێدكەن مامۆستای زەحمەت یا پێڤە بری وانێ بۆ دبێژیت و گرنگیێ پێدەن و قوتابی ژی ئەڤێ ترێندێ بتنێ بۆ هندەك مامۆستایان دكەن یێن ئەو حەزژێ دكەن، دانا دیاریێ تشتەكێ خۆشە و هەموو كەس حەز ژ دیاریان دكەن چ مەزن بیت، یان بچووك تشتەكێ خۆشە.
ژیان بامەرنی، ڤەكولەرا دەروونی و جڤاكی دیار کر كو ترێندا قوتابیان بۆ مامۆستایان ب شریناهییان گەلەك تشتەكێ جوانە و قوتابی ب شێوەكێ جودا و جوان دەربرینێ ژ هەستێ خوە دكەت بۆ مامۆستایی و قوتابیان ژی ئەڤ ترێندە بتنێ بۆ ئەوی مامۆستایی یا كری یێ حەز ژێ دكەن و ژ هەژی بیت و ئەڤ یەكە ژی بۆ پەیوەندیا مامۆستای دزڤریت ل گەل قوتابیان کو شیایە یێ سەنرنچراكێش بیت و قوتابی ب هەموو بێگونەهییا خۆ حەز بكەن دلێ مامۆستایێ خۆە خۆش بكەن.
ڤەكولەرا دەروونی و جڤاكی د بەردەوامیا ئاخفتنێن خۆدا دیار کر کو مامۆستایێ هەی دێ وانێ شرۆڤە كەت ب شەڕۆ تورەیی ڤە و ب هەموو شیانێن خوە دێ وەكەت هەموو قوتابی ژێ بترسن و گۆت: ب دیتنا من هندی پەیوەندیەكا نەرم دناڤبەرا قوتابی و مامۆستای هەبیت پتر دێ تێگەهن.
