ترەمپی بەردەوامییا هاریكاریكرنێ ل گەل ئیراقێ ب مەرجێ نەهێلانا گرۆپێن چەكداری ڤە یا گرێدای
رۆژنامەیەكا ئەمریكی د راپۆرتەكا خوە دا باس ل وێ چەندێ دكەت: ئیراق دێ تووشی زیانەكا مەزن و پت گوه هاڤێتنێ ڤە بیت ژ ئالیێ ئیدارەیا دۆنالد ترەمپی ڤە، هەكە بهێت و نەشێت گرۆپێن چەكداری یێن نێزیك ژ ئیرانێ ب هەلوەشینیت.
راپۆرتەكا رۆژنامەیا (فۆكس) یا ئەمریكی بەلاڤكر، ب گۆڕەی بۆچوونا كۆمەكا پسپۆران د وارێن سیاسەتا رۆژهەلاتا ناڤیندا، هەكە ئیراق د سەلماندنا شیانێن خوە دا بۆ ب دوماهیئینانێ ب گرۆپێن چەكداری شكەستنێ بینیت، دێ هاریكاریێن ئەمریكا د وارێ ئاسایشێدا ژدەست دەت.
ئەو راپۆرتە باس ل وێ چەندێ دكەت، ئیران گەلەك یا لاواز بووی، ئەڤە ژی دەلیڤەیێ ددەتە ئیراقێ چاكسازیێن ئەمنی بكەت، ژوان ژی دوماهیئینان ب گرۆپێن چەكداری و تێكهەلكرنا وان ل گەل هێزێن دەولەتێ.
جۆناسان شانزر، رێڤەبەرێ جێبەجێكارێ دەزگەهێ بەرگریێ ژ دیموكراسیێ، دبێژیت: ژناڤچوونا رژێما بەشار ئەسەدی دەمەكێ ئێكلاكەر بوو بۆ وێ چەندێ حوكمەتا ئیراقێ پێنگاڤان دژی گرۆپێن چەكداری ب هاڤێژیت.
ئینا رۆدۆلف، ژ ناڤەندا نێڤدەولەتی بۆ ڤەكۆلینێن توندڕەویێ ل لەندەن دیاركر: ل گەل لاوازبوونا بریكارێن ئیرانێ پشتی 7 ئۆكتۆبەرێ ل دەڤەرێ، فشارێن ئیسرائیلێ بۆ ب دوماهیئینانێ ب گرۆپێن چەكداری یا توندتر بووی.
كارۆلین رۆز، سەرۆكا بەرنامەیێ ڤالاهیێن دەستهەلاتێ ل پەیمانگەها نیولاینز دبێژیت: راستییا وەرگرتنا پێرابوونێن مەزن ل كەرتێ ئەمنی ل ئیراقێ، ب هێزێن حەشدا شەعبیڤە، یا گرێدایە د ڤی دەمیدا كو رۆلێ ئیرانێ ل ڤێ دەڤەرێ یێ لاواز بووی، ئەڤە ژی خواستا ئەمریكا و هێزێن هەڤپەیمانایە.
ئەڤ گەنگەشە د دەمیكی دانە كو ژێدەرێن راگەهاندنێ چەندین جاران باسكریە، ئەمریكا و ئیسرائیلێ داخواز ژ ئیراقێ كریە كونترۆلا گرۆپێن چەكدار یێن نێزیك ژ ئیرانێ بكەت كو ژ ئاخا ئیراقێ هێرشان دكەن.
