تشتێن عه‌قل باوه‌ر نه‌كه‌ت
محه‌مه‌د چه‌لكى
تشتێن عه‌قل باوه‌ر نه‌كه‌ت ل ڤى وه‌ڵاتێ مه پێكدهێن، هند دمشنه، گه‌هشتیه وى ڕاده‌ى كو ئێدى خه‌لكى ده‌ستێن خوه ژ هه‌ر بانگه‌شه‌كا چاره‌سه‌ریێ شووشتنه و كه‌نیێ خوه ب په‌یڤێن دێ چێبیت و هه‌ر په‌یڤه‌كا وێ ڕامانێ بده‌ت، دكه‌ن. ئه‌ڤه ژى پرۆسه‌كا ئاساییه و ده‌مكیه، ڤه‌ڕێژا كه‌له‌كه بوونا ئاریشان و نه‌بانا حوكمه‌تا هه‌رێمێ یه ل كێژ و ئاریشێن روو برووى دبن. ئه‌ڤێ ره‌وشێ باندۆره‌ك نه‌گه‌تیف ل سه‌ر ده‌روونێ مامێ عه‌لۆ هێلایه، ژبه‌ر ڤێ یه‌كێ هه‌رێ داماى و پندڤیه، یێ سوحبه‌ت نه‌خوه‌ش بووى، دانێ وى د چ قازانان دا هێور نابیت و پرچكێن دانیكێ وى كه‌س ژێ قۆرتال نابیت. په‌رگالا مامێ عه‌لۆ یا بوویه جهێ پێئاخفتنێ و حه‌نه‌كێن ئه‌فه‌ندیا. هوون دزانن، د ره‌وشێن هۆسان دا دبیته هۆڵكا ئه‌فه‌ندى و كه‌سێن ب هه‌ر تشته‌كى كه‌نى و لاقردیان دكه‌ن. یا پتر مامێ عه‌لۆى دپندڤینیت، حه‌نه‌ك و لاقردیێن ئه‌فه‌ندیانه، ده‌ما كه‌یسا خوه لێ دبینن و ب زۆڕێ دده‌ن ئاخفتنێ.
ل گه‌ل بدووماهیك هاتنا نۆچه‌یان، عه‌لۆى روویێ خوه ژ تیڤیێ وه‌رگه‌راند و فره‌كا بهێز لجگارێدا، په‌رگالا دووكێلێ ددفناندا ئه‌ڤرازبووى و له‌رزكا گیانێ وى گرتى، سه‌رنجا ئه‌فه‌ندیێ لمێزا به‌رامبه‌ر ڕاكێشا و پرسێن ددلیدا په‌نگیاى كرنه شێلكه‌كا بارانا په‌لێ ل مامێ عه‌لۆ باراندن:
ـ ته بۆ وه‌سا روویێ خوه ژ تیڤیێ وه‌رگه‌راند؟
ـ من گه‌له‌ك جارا بریارا داى كو ئێدى نه‌چمه ژده‌رڤه، دا ڕاستى پرسیاركه‌رێن مینا ته نه‌هێم، لێ هه‌رجار لێڤه‌دبم و نه‌شێم خوه.
ـ هه‌چكو هه‌ڵامه‌تێ ده‌ڤبێنانێ خوه نیشانى ته دایه، ئه‌و مامێ عه‌لۆیێ به‌رێ نه‌مایه و ته‌ڕۆ هشك پێكڤه دشه‌وتاندن؟
ـ ” مارگه‌ستى ژ وه‌ریسى ناترسیت”، ما من چ مایه بده‌مه خاترێ!
ـ ” ترس ئاسنێ سفرى(برۆنز) كون دكه‌ت”.
ـ مامۆ ملله‌تێن دینه مێر تێدا نه‌بن، تۆلا وان هه‌ر لعه‌ردى دمینیت! ئه‌گه‌ر ته ده‌رده‌ك هه‌بیت، بده‌ستێن خوه ل چاره‌یێ بگه‌ڕهه! پێدڤى ناكه‌ت، وى ده‌ردى بده‌ستێن من چاره بكه‌ى!
ـ ئانكو “هه‌ر ڕه‌شۆ بده‌ستێن خوه”.
ـ شه‌كرێ دخۆى.
ـ ڕه‌شۆ گه‌له‌ك جارا پێدڤى بهنده‌كێن دنه ژى.
ـ بێى ڤاڤێرتن، ڕه‌شۆ دێ بیته به‌خت ڕه‌شۆ!
ـ وه‌كو نوكه و حوكمه‌تا مه؟
ـ مه چ حوكمه‌ت نه‌ماینه، ژبلى قه‌رقۆده‌كێ پربێژ و بوویه مێشا میر لێ نه‌ماى!
ـ ئانكو حوكمه‌ته‌كا …
ـ نه ئه‌و مینا كه‌سێیه و نه كه‌س وه‌كه وێیه، ئێكانه‌كا بێ به‌ڤڵه!
ـ ئانكو ژبه‌ر هندێ ته روویێ خوه ژ تیڤیێ وه‌رگه‌راند؟
ـ تیڤى، ده‌زگه‌هێن ڕاگه‌هاندنێ و ئه‌فه‌ندیێن زكێن خوه بگه‌نده‌لى و دزیێ وه‌رماندین، هه‌ر تشتێ دوورى عه‌قلى دبێژن، عه‌قل نه‌شێت باوه‌ر پێ بكه‌ت، دا ره‌وش هه‌ر بڤى ره‌نگى بمینیت، بۆ نموونه: هه‌موو لایه‌نێن سیاسى دبه‌رپرسیارن ژ ئه‌ڤێ ره‌وشێ، گه‌نده‌لى كولتۆره، پێك ئینیا لژنان، كۆمبوونێن پارتیان، نه‌خشه‌رێ بۆ چاره‌سه‌ریا قه‌یرانان، ئێكرێزیا نیشتمانى، ئێك لیستا كوردى بۆ په‌رله‌مانێ عێراقێ، كاندید بۆ په‌رله‌مانى ژ دوورى عه‌شیره‌تگه‌ریێ، سۆپایه‌كێ ئێكگرتیێ كوردستانێ، پرانیا مه‌ڵایێن كوردستانێ ببن نه‌ته‌وه‌په‌رست، نڤیسه‌ر دوورى سیبه‌را ئایدولۆجیێ، به‌رژه‌وه‌ندا نه‌ته‌وى لپێشیا هه‌ر به‌رژه‌وه‌نده‌كێ بیت، به‌ستنا كۆنگرا نه‌ته‌وى لڤان نێزیكاندا، هنارتنا هێزا دژه تیرۆرێ ژ لایێ حوكمه‌تا هه‌رێمێ ڤه بۆ عه‌فرینێ …
ـ یێن ماین ئه‌ز بێژم؟
ـ “ده‌ستێ بتنێ ده‌نگ ژێ نایێ”.
ـ ئه‌ڤه ئه‌ز هاتمه رێزا ته!
ـ ئه‌ز باوه‌ر ناكه‌م، ژ ئه‌زینیا خوه بهێیه خارێ، ئه‌ڤه نه ژ خاسله‌تێن كوردایه!
ـ پا ئه‌ڤه من خوه ژ ڤێ ئێكرێزیا كوردا ڤه‌كێشا.
ـ سوپاس ئه‌ڤه ئه‌م بووینه دو، ئه‌رێ خانده‌ڤان دێ هێیه ناڤ رێزێن مه؟ به‌رسڤ بۆ هه‌وه.
