تـورکیا دڤێت نێچیرڤـان بـارزانـی رۆلـەکـێ کاریگەر بۆ ئـاشتیێ بگێڕیت
سەرەدانا نێچیرڤان بارزانی بۆ تورکیا د رۆژەڤا وی وەلاتی دایە و چاڤدێرێن سیاسی ژی وەسا دبینن تورکیا دڤێت دەست ب قۆناغەکا نوو یا ئاشتیێ بکەت و دخوازیت سەرۆکێ هەرێما کوردستانێ ژی رۆلەکێ کاریگەر ژ بۆ دەستپێکرنا قۆناغەکا نوو د ناڤبەرا کوردان و دەولەتا تورکیا دا بگێڕیت.
سەرەدانا نێچیرڤان بارزانی سەرۆکێ هەرێما کوردستانێ بۆ تورکیا د رۆژەڤا وی وەلاتی دایە و چاڤدێرێن سیاسی وەسا دبینن ئەڤ سەرەدانە د ڤی دەمی دا گەلەک یا گرنگە، چونکی نها بەحسێ دەستپێکرنا قۆناغەکا نوو یا ئاشتیێ ل تورکیا دهێتە کرن، تورکیا دڤێت هەرێما کوردستانێ رۆلەکێ کاریگەر بۆ ئاشتیێ ل تورکیا بگێڕیت و ژ بەر ڤێ یەکێ ژی داخواز ژ نێچیرڤان بارزانی هاتیە کرن کو سەرەدانا تورکیا بکەت.
د ڤێ دەربارێ دا ئەحمەد گولەر چاڤدێرێ سیاسی یێ باکورێ کوردستانێ بۆ ئەڤرۆ دیار کر، پرسا کوردی پرسا سەرەکی یا تورکیا یە، بەرپرسێن تورکیا بەری نها ژی دگۆتن کو دڤێت پرسا کوردی بهێتە چارەسەرکرن و نها ژی جارەکا دی بەحسێ چارەسەرکرنا پرسا کوردی دکەن، دەڤەرا رۆژهەلاتا ناڤین ژی بەر ب گوهۆڕینێن مەزن ڤە دچیت و تورکیا دڤێت رێگریێ ل هەر گوهۆڕینەکا مەزن بکەت کو دبیت کاریگەریێن خراب ل سەر تورکیا هەبن، ژ بەر ڤێ یەکێ ژی دەولەت باخچەلی کو وەکو کەسەک گەلەک توندرەو ل دژی کوردان دهێتە نیاسین ڤێجارێ بەحسێ ئاشتیێ و براتیێ دکەت ئەو یەک ژی گەلەک یا گرنگە.
ناڤهاتی ئەو یەک ژی دیار کر، سەرۆکێ هەرێما کوردستانێ بەرێز نێچیرڤان بارزانی بەری نها ژی کار بۆ دەستپێکرنا قۆناغەکا نوو د ناڤبەرا کوردان و دەولەتا تورکیا دا کریە، چونکی ب شەڕی نە کورد دشێن ل تورکیا بگەهنە مافێن خوە و نە ژی دەولەتا تورکیا دشێت ب شەڕی کوردان ژناڤ ببەت، ژ بەر ڤێ یەکێ ژی دەستپێکرنا قۆناغەکا نوو یا ئاشتیێ بۆ چارەسەرکرنا پرسا کوردی گەلەک یا گرنگە و ئەز پشتراستم هەکە هندەک هێز ئاستەنگان دروست نەکەن دێ هەرێما کوردستانێ شێت رۆلەکێ کاریگەر بۆ ئاشتیێ بگێریت).
گەلەک ژ چاڤدێرێن سیاسی ل تورکیا و باکورێ کوردستانێ ژی وەسا دبینن سەرەدانا سەرۆکێ هەرێما کوردستانێ ل سەر داخوازا سەرۆک کۆمارێ تورکیا ژ بۆ ڤێ یەکێ یە دا هەرێما کوردستانێ بشێت ب رۆلێ خوە رابیت دا قۆناغەکا نوو د ناڤبەرا دەولەتا تورکیا و کوردان دا دەستپێ بکەت.
ل ئالیێ دی شاندەکێ بلند ژ هەڤسەرۆکێ پارتا دەم ل گەل هەڤسەرۆکێ بەرێ یێ هەدەپێ دێ سەرەدانا سەلاحەدین دەمیرتاش هەڤسەرۆکێ بەرێ یێ هەدەپێ کەن کو چەند سالن ل زیندانێ دایە و ل گۆر دەزگەهێن راگەهاندنا تورکیا ئەڤ سەرەدانە ل سەر داخوازا ئاکپارتیێ یە، چونکی وان دڤێت سەلاحەدین دەمیرتاش وەکو سەرکردەکێ گرنگ رۆلەکێ کاریگەر بۆ ئاشتیێ هەبیت و دبیت دەمیرتاش و هەڤالێن وی بهێنە ئازاد کرن.
سەبارەت ب دەستپێکرنا قۆناغەکا نوو یا ئاشتیێ ل تورکیا ئوزگور ئۆزەل سەرۆکێ گشتی یێ پارتا کۆماریا گەل ژی دیار کر، وەکو پارتا کۆماری ئەو دێ دەست ب بزاڤەکا مەزن بۆ ئاشتیێ کەن، د چەند رۆژێن بهێت دا شاندەکێ پارتا وان دێ سەرەدانا باژێرێن ئامەد، وان، جولەمێرگ و چەندین باژێرێن دی یێن باکورێ کوردستانێ کەن و یا ژ دەستێ وان بهێت دێ کەن و گۆت: (مە دڤێت شەرێ چەندین سالان ب دووماهی بهێت، ئێدی بلا دایکێن کورد و تورکان رۆندکان نەبارینن، بلا ل تورکیا ئاشتی و ئارامی هەبیت، دەمێ وەکو تورکیا ئەم ل گەل کوردان و برایێن خوە یێن دی د ناڤ ئاشتیێ دا بین دێ تورکیا ژی بهێز کەڤیت و ئەو یەک د بەرژەوەندیا هەموو ئالیان دایە، وەکو پارتا کۆماری یا ژ دەستێ مە بهێت دێ کەین دا پرسا کوردی بهێتە چارەسەرکرن).
سەبارەت ب دەستپێکرنا قۆناغەکا نوو یا ئاشتیێ ل تورکیا دوهی عەلی باجان سەرۆکێ گشتی یێ پارتا DEVA و جێگرێ بەرێ یێ سەرۆک وەزیرێن تورکیا ژی راگەهاند، ئاشتی د بەرژەوەندیا تورکیا دایە، دڤێت هەموو هێزێن سیاسی کار بۆ ئاشتیێ بکەن، هەر کەس دزانیت شەڕی چەندین سالێن بۆری چەند زیان گەهاندیە تورکیا، دڤێت پرسا کوردی و هەموو پرسێن دی یێن تورکیا ل پەرلەمانی بهێنە چارەسەرکرن.
هەروەسا جەنگیز چاندار نڤیسەرێ ناڤدارێ تورکیا و ئەندامێ پەرلەمانێ وی وەلاتی د داخۆیانیەکێ دا بۆ دەزگەهێن راگەهاندنا تورکیا دیار کر، هێشتا زوویە ئەم بەحسێ دەستپێکرنا قۆناغەکا نوو یا ئاشتیێ ل تورکیا بکەین، لێ هندەک کار دهێنە کرن و ئەو یەک جهێ دلخوەشیێ یە، چونکی هەر کەس دزانیت تورکیا یا نەچارە پرسا کوردی چارەسەر بکەت.
