ته‌رزه رزگار: نه‌بوونا پشته‌ڤانیێ ئاریشه بۆ ڤۆلی بۆلا كچان په‌یداكریه
ئه‌ڤرۆ، هه‌ولێر، سولین سلێمان
د دیداره‌كێ دا ته‌رزه رزگار یاریزانا باژیرێ سلێمانیێ و یانا سیروانی شاره‌زور بۆ یاریا ڤۆلی بۆلێ دیاركر هنده‌ك ئاریشه هه‌نه ئه‌ڤ یاریه ل سه‌ر ئاستێ كچان ببنه ڕێگر بۆ به‌رده‌وامیا پێشكه‌فتنا ئاست و شیانێن وان سه‌رباری هه‌بوونا یاریزانێن باش ل كوردستانێ.
زێده‌تر ناڤهاتی بۆ رۆژناما ئه‌ڤرۆ گوت: وه‌كو یاریزانه‌كا یانا سیراونی شاره‌زور و دبیت گه‌له‌ك یانێن كوردستانێ ژی تووشی ڤێ ئاریشێ بووینه ئه‌وژی نه‌بوونا یاریگه‌هێن تایبه‌ت ب راهێنانان ڤه و هه‌روه‌سان ئه‌و پشته‌ڤانیا دارایی یا كێم كو تێرا وێ چه‌ندێ ناكه‌ت هه‌موو پێدڤیێن تیما مه و یاریزانا بهێته چاره‌سه‌ركرن، ژبه‌ركو یاریا ڤۆلی بۆلێ سه‌ر ئاستێ كچان تایبه‌تمه‌ندیا خوه هه‌یه و گه‌له‌ك ئافره‌ت حه‌ز ژ ڤێ یاریێ دكه‌ن هیڤییا من ئه‌وه لایه‌نێن په‌یدوه‌ندیدار پشته‌ڤانیێ بكه‌ن و گه‌شبینم دێ ئاست و ئه‌نجامێن مه‌زن د هه‌ر قاره‌مانیه‌كێ دا ب ده‌ستخوه‌ڤه ئینن.
ژلایه‌كێ دووڤه ته‌رزه رزگار ئه‌وچه‌نده دیاركر هه‌ر ژ 2007 ده‌ست ب ڤێ یاریێ كریه و ده‌رچوویا كۆلیژا په‌روه‌ردا وه‌رزشی ل هه‌له‌بجه‌یه وه‌كو یاریزان پشكداری خولا پلا نایابا ئیراقێ بوویه و رێزا ئێكێ ده‌ستخوه‌ڤه ئیناینه و وه‌كو ئێك ژ باشترین یاریزان ژی هاتیه ده‌ستنیشانكرن و گۆت: زێده‌باری من ل گه‌ل یانا خوه پشكداری خولا كوردستانێ بوویمه و هه‌مان ئه‌نجام و ده‌ستكه‌فت ئیناینه، پێنه‌ڤێت ئه‌ڤچه‌نده ژی بۆ هاریكار و پشته‌ڤانیا خێزانا من و هه‌ڤال و ماموستایێن من كو به‌رده‌وام پالپشت بووینه كو بگه‌همه ئاستێن بلند.
