ته‌ناهی ب ستاڤه‌كێ گه‌نج ده‌ست ب به‌رهه‌ڤیان كر
ئه‌ڤرۆ،
د داخویانیه‌كێدا سه‌رۆكێ یانا ته‌ناهی یا وه‌رزشی بۆ رۆژناما ئه‌ڤرۆ دیاركر تیما وان یا ته‌پارپێی ب ستاڤه‌كێ نوو و گه‌نج یێ كادرێ راهێنانێ ده‌ست ب یه‌كا خوه یا راهێنانێ كریه خوه به‌رهه‌ڤكرن بۆ وه‌رزێ نوو یێ خولا پلا دو یا كوردستانێ و ئارمانجا وان ژی ده‌ربازبوونه بۆ پلا ئێك، ئه‌وا چاڤه‌ڕێ یه هه‌ڤڕكیێن خولێ ل پێنجێ كانوونا دویێ یا سالا 2022ێ بهێته ئه‌نجامدان.
زێده‌تر جاسم شه‌عبان گوت: بۆ وه‌رزێ نوو مه گرێبه‌ست ل گه‌ل ستاڤه‌كێ گه‌نج یێ راهێنانێ ئیمزاكریه ئه‌وژی شڤان محه‌مه‌د راهێنه‌ر،زێره‌ڤان محه‌مه‌د خه‌لیڤه هاریكارێ راهێنه‌ری و كاوه دینو راهێنه‌رێ گۆلپارێزا هاته ئیمزاكرن ب شێوێ مووچه‌یێ هه‌یڤانه ژبۆ باشترین به‌رهه‌ڤی بۆ وه‌رزێ نوو یێ خولا پلا دو یا كوردستانێ و ب ئارمانجێن ده‌ربازبوونێ سه‌رباری ئاسته‌نگێن دارایی یێن به‌رده‌وام لێ مه ده‌ست ژ رژدیا خوه به‌رنه‌دایه و ناهێلین وه‌رزشا ته‌ناهی و گه‌نجێن وان بێ به‌هربن ژ حه‌ز و ڤیانێن خوه.
ژلایه‌كێ دووڤه ناڤهاتی ئه‌وچه‌نده ژی دیاركر بۆ ماوێ سێ حه‌فتیه تیم كه‌فتیه لبن تاقیكرنێن راهێنانێ دا و ژماره‌كا باش یا یاریزانێن یانێن پارێزگه‌هێ دناڤ تیمێ دانه و كادرێ راهێنانێ كار لسه‌ر دروستكرنا تیمه‌كا بهێز دكه‌ن كو بۆ هه‌ڤڕكیێن خولێ باشترین شێوه بهێنه دناڤ خولێ دا،له‌ورا هیڤییا مه ئه‌وه حكومه‌تا هه‌رێمێ و پارێزگارێ دهۆكێ پشته‌ڤانیا دارایی ل یانێ بكه‌ن پێخه‌مه‌ت بشێن مووچه‌یێ یاریزانا و پێدڤی و مه‌زاختیێ تیمێ به‌رهه‌ڤ بكه‌ین و تیما ته‌ناهیێ دوباره‌ڤه ڤه‌گه‌ڕێته دناڤ خولا پلا ئێك دا.
