ته‌نشتۆكا ئالبێر كامۆی
شلێر ئە‌مراهنژاد
كورته‌چیڕۆكا ته‌نشتۆك ژ چیڕۆكێن پرتووكا ئالبێر كامۆ یا ب ناڤێ سه‌ر و بنە. ئه‌ڤ چیڕۆك ژی هه‌ما سه‌ر بنگه‌ها فه‌لسه‌فه‌یا كامۆ، یانێ پووچبوون و هزركا ئەبزۆردێ هاتیه راچاندن.
نێرین و هزرێن كامۆ ل سه‌ر مرۆڤ ته‌ڤی كو ره‌نگه دلكه‌ڤرانه بێن خوویانێ لێ د هوندرێ خوه خوه تژی راستگۆیی نه و د ڤێ چیڕۆكێ ده ئەو ب ئاوایه‌كی راست و ئەشكه‌ره بالا خوه دده سه‌ر سه‌رده‌ما پیربوونێ و ده‌ما كو مرۆڤ كێمتر تێ هه‌باندن.
پیره‌ژنه‌كا نه‌زان كو ژ مۆركێن تزبیێ خوه كێفه‌كه بێداوی دستینه.
ترسا ته‌نێتی و مرنێ و سۆهبه‌ته‌كه ب دلساری ب خوه‌دایه‌كی نه‌دیار ره ئەڤ به‌جاندیه. ئەو دبێژه خوه‌دێ ژ بلی ڤه‌قه‌تاندنا مرۆڤان ژ وێ تشته‌ك ژ بۆ وێ نه‌كریه. هه‌ر كه‌س وێ ب ته‌نێ دهێله و مژوولی كێفا خوه یا ژیانێ دبه.
ژ به‌ر كو ده‌ما مرۆڤ پیر دبه، تشتێ هه‌ری ترسناك ژ بۆ وێ ئەوە كو كه‌س گوه ناده گۆتنێن وێ.
لێ ده‌ما كو ئەڤ پیره‌ك هه‌موو ستارگه‌هێن مادی و هه‌ستیاری یێن خوه وه‌ندا دكه و د داویێ ده هۆگریا خۆرتێ ل كێله‌كا خوه وه‌كی هه‌زه‌كه سه‌خته و ده‌مكی دبینه، ئەو ئێدی ژ وه‌نداكرنێ و ژ ده‌ستداینا تشتان ناترسه و ته‌نێ وێ ده‌مێ ئەو نرخا ته‌نێتی و بێده‌نگیا راستینا ئۆدەیێ فێم دكه.
ده‌ما كو ئۆدە ب ته‌مامی ڤالا دبه، ئەڤ تێ ڤێ واته‌یێ كو چ گرێدان نه‌مایه و ئەو ژ هه‌ر تشتی فلتیه و ب ته‌نێ بێده‌نگی دمینه.
ترس دقه‌دن، روویێ رووت و تازی یێ ژیانێ ژ ڤر ده‌ست پێ دكه.
مژاره‌ك كو ژ بۆ من د فه‌لسه‌فه و نێرینێن كامۆ ده گرینگ و هێژا یه ئەڤەیە كو ته‌نێ گاڤا ئەم بگهیژن ڤك و ڤالاتیا جیهانێ و پووچبوونا وێ ئەم دكارن سه‌رخوه‌بوون و ئازادیا خوه و چالاكیێ ب ده‌ست بخن و ده‌ست ب خولقكاری و ئافراندنێ بكن.
