ته‌نیایی
ئیسماعیل سلێان هاجانی
دنیا به‌ر ب گه‌رمێ ڤه دچوو و ڕۆژ پتر دشاریا، گیا هێدی.. هێدی دبه‌هی باڤزه‌ر دبوو ل دۆرێن دێرا خرابه‌ی و جارنا ژی پیره‌مێرێن گوندی دگۆتێ خرابێ دێرێ. تنێ كوژیه‌ك و ئه‌یوانا وێ مابوون هنده‌ك جاران رێباران ل به‌ر سیبه‌را وێ بێهنا خوه ڤه‌ددا، هندا ژی ل به‌ر دیوارێ وێ دوخینا خوه ڤه‌دكر. لێ چیڕۆكێن وێ یێن بترس و سه‌هم مشه‌بوون. تو و هه‌ڤالێن خوه هه‌ر رۆژ دهێنه ڤێ رێكێ دابخوینن و خوه ئاماده‌كن بۆ ئه‌زموونێن ویزاری. لێ ئه‌ڤرۆكه تو ب تنێ به‌ری هه‌ڤالان هاتی. ته‌نیایی گه‌له‌ك نه‌خوه‌شه ژ به‌ر هندێ قۆرسترین سزا د زیندانان دا ژوورا تاكه‌كه‌سیه. نه‌سیبێ خراب خوه ده‌نگێ چووچكه‌كێ ژی ل ناڤ ڤی دحلی ناهێت.. ته جار جار دگۆته خوه كا تو بۆچی ژ مال هاتی ته ل مال خواندبا نه‌باشتر بوو؟. ڤێ گه‌رمێ ڤان پێشیا و توی برسی. یه‌ك ده‌مژمێرێ گورگه‌لۆق بچی ناگه‌هیه مال. ته گۆته خوه ئه‌ڤڕۆكه هه‌ر ژێ چووده‌رێ بلا بۆ سوبه‌هی بت. ته قه‌ستا كاڤلێ دێرێ كر، دا ل كوژیه‌كی پاقژكی روونیه خوارێ و بێهنا خوه ڤه‌دی، بیچه‌كێ خوه درێژبكی. دمێ تو ب ژوور كه‌تی وه‌كی سووسكه‌كێ د قۆلاچێ دیوارێ كه‌ڤنارێ دێرا ئاشێ سپی ب به‌ر چاڤێ ته‌كه‌ت. پشتی ته باش ستێركا خوه لێگرتی و نێزیك بووی بۆ ته دیاربوو سه‌دێ سه‌د ئه‌ڤه سووسكه ل دۆر خوه زڤڕی قه‌ته‌كی داری ته ژ ئه‌ردی هلینا و خوه نێزیك كر، هێژ ته دار نێزیك نه‌كری، وی خوه ژ دیواری به‌ردا و ل كفێنێ دا و خوه د سینگێ ته‌وه‌ركر. ته ژبنێ پیا كره قێری وه‌ی بابۆ ئه‌ڤه چ وه‌یبابكه. ئه‌و مه‌بوو كێلبێن وی د قركا ته‌ره گرتبان. هێژ تو ل خوه نه‌زڤڕی و كارێ بازدانێ نه‌كری مڕۆڤه‌كی جلك و كۆلاڤ ڕه‌ش و ریدین سپی ل به‌ر ده‌ری گۆته ته، تو چ دكی ل ڤێرێ ما مه سه‌د جارا نه‌گۆتیه هه‌وه هێرڤه نه‌هێن و ڤێرێ پیس نه‌كن؟. د گه‌ل گۆتنا خوه غه‌واره بوو.
تو له‌رزی ته كر و نه‌كر نه‌شیای بێژی تۆبه، ته كارێ ره‌ڤێ كر، پێن ته د ئه‌ردی دا چوون و ژ جهێ خوه نه‌لڤین. ته ڤیا ب هه‌موو ده‌نگێ خوه بكیه هه‌وار ده‌نگ ژ به‌ر ته نه‌هات و وه‌كی په‌یكه‌ره‌كی بێ جان د جه دا چكلی، هه‌ناسا ته قۆت بوو، خوهێ دبن ده‌ست و لنگێن ته دا ئاڤێت. باوشكێن خه‌وێ هاتنه ته عێلنجی هاتنه ته، ته دڤیا بهه‌لاڤێژی. ژنشكاڤه سیتاڤكه‌كا ب له‌ز دبه‌ر ته‌ڕه بۆری و هه‌وایه‌كی هوون ل ناڤ چاڤێن ته دا. ته دبن لێڤانڤه گۆت بسم الله، بسم الله. ڤه‌په‌شی و ڤه‌جنقی، هێدی ژ ناڤ كاڤلێ دێرێ ده‌ركه‌تی، دنیا تاریگه‌ورك بوو، ترسا ته زۆرتر بوو، چه‌ند خوله‌كه‌كان ب به‌ز ره‌ڤی، ته قه‌ستا رێكا سه‌ره‌كی كر، ته گوهێن خوه ڤه‌چه‌ماندن به‌لكی ده‌نگێ زه‌نگلا نێریه‌كی یان ره‌وینا سه‌یه‌كی شڤانا یان چرته.. چرتا شڤانه‌كی ببی، وێڤه ژ كیڤه. دنیایه‌كا كه‌ر تنێ زمێن و چیزچیزا هند كێزان. هه‌تا تو ل به‌ته‌نێ سه‌ركه‌تی، رێك دبه‌ر گۆرستانێ ڕا دبۆرت، ترسا ته زۆرتر بوو، د دلێ خوه دا دگۆت: خوه‌زی رێكه‌كا دی هه‌با دووری گۆرستانێ. ده‌مێ نێزیك بووی ته هه‌ولدا فاتحه‌كێ بخوونی و پاشی ب هه‌موو شیانێن خوه بازدی، ل بایێ به‌زێ ته هندیت زه‌لامه‌كی كراس و كه‌فیك سپی و رێهدین سپی گۆته ته ڕاوسته، لێ تو وه‌كی بڕووسیێ ژێ ده‌رباز بووی و جار جار ل خوه دزڤری، ئه‌و زه‌لامێ جلك سپی ل دووڤ ته دبه‌زی، جار ب پیا دهات و جار دفری. هه‌تا تو ل چه‌پێ زڤڕی رۆناهیا گلۆپێن گوندی ته دیتن. ئه‌و ژ دووڤ ته ڤه‌بوو. وه‌كی یاریكه‌ره‌كێ مه‌راسۆنێ وه‌ستیایی ل دووڤ هه‌موو یاریكه‌ران، وه‌سا نێزیكی گوندی بووی. ژ نشكاڤه ده‌نگێ هه‌ڤالێ ته تو ڤه‌جنقاندی، گۆته ته هلۆ ده‌ره‌نگیه دابچنه مال، ما تو هاتی بخوونی یان بنڤی.
