ته‌پا مێزی یا دهۆكێ مانا خوه ل پلا نایاب پاراست
ئه‌ڤرۆ،
تیما ته‌پا مێزێ یا یانه‌یا دهۆك مانا خوه د خولا پلا نایابا كوردستانێ دا پاراست پشتی شیایی ل سه‌ر ئاستێ پێشكه‌فتیا د كۆما دویێ دا رێزا سێیێ بهێت ژ چارچووڤێ هه‌ڤڕكیێن واندا ئه‌وا ل ئه‌ینیا بوری ب پشكداریا 16 یانه‌یێن هه‌رێمێ ل هۆلا یانه‌یا ئاشتی ل باژێرێ سلێمانیێ هاتیه كرن و یانه‌یا سلێمانی بوو قاره‌مانا كوردستانێ.
ل دووماهیێ ئه‌و یانه‌یێن هاتینه پله‌كرن ل دووڤ رێزبه‌ندیا وان بۆ پلا نایاب بڤی ره‌نگی بوون: دهۆك، سلێمانی، ئاشتی، ئه‌كاد، سۆلاڤ، ده‌ربه‌ندیخان، سه‌رچنار، برایه‌تی، ئه‌كاد، په‌یام، یێن پلا ئێك ئه‌و ژی، هه‌له‌بچه، جیهان، قه‌لادز، كفری، چه‌مچه‌مال، شێروانه.
د داخویانیه‌كێ دا ئێحسان حه‌سه‌ن زوبێر سه‌رۆكێ ئێكه‌تیا ته‌پا مێزێ ل كوردستانێ بۆ رۆژناما ئه‌ڤرۆ گۆت: شێوازێ قاره‌مانیێ بۆ ڤاڤارتنا هه‌ردو خولێن پلا نایاب و ئێك بوون ئه‌وا پشكداریا 16 یانه‌یێن هه‌رێمێ پێخه‌مه‌ت پله‌كرن و رێكخستنا هه‌ردو خولان، هه‌لبه‌ت ئه‌ڤ چالاكیه هات پشتی ڤه‌قه‌تیانه‌كا درێژ ژبه‌ر كاودانێن دارایی یێن خراب و په‌تایێ كۆرۆنایێ ل هه‌رێما كوردستانێ دا ده‌ربازبووین، قاره‌مانی ب شێوه‌كێ رێكخستی و سه‌ركه‌فتیانه ب ڕێڤه‌چوو.
ژلایه‌كێ دووڤه ناڤهاتی دیاركر دبیت هژمارا تیمێن پلا ئێك بهێنه زێده‌كرن هه‌كه هنده‌ك یانه هه‌بن داخوازا پشكداریێ د چالاكیێن مه دا بكه‌ن و گۆت: بۆ سالا بهێت دێ ل گه‌ل لژنا ئۆلمپیا كوردستانێ كۆمبین هه‌كه شیانێن دارایی هه‌بن بۆ سێ چالاكیێن وه‌رزێ نوو ئه‌و ژی خولا پلا نایاب، ئێك و ل سه‌ر ئاستێ ژیێن جودا، پێنه‌ڤێت دێ بزاڤێن ڤه‌گرنا خولێن راهێنه‌ران و دادڤانان ژی بۆ ئاستێن كوڕان و كچان ژی هه‌بن.
