ته‌پا مێزێ یا دهۆكێ مانا خوه د خولا ئیراقێ دا پاراست
ئه‌ڤرۆ،
تیما ته‌پا مێزێ یا یانا دهۆك مانا خوه د خولا پلا نایابا ئیراقێ دا پاراست سه‌رباری ئه‌نجامێن نه چاڤه‌ڕێكری پشتی ب دووماهی هاتنا هه‌ڤڕكیێن قۆناغا ئێكێ ل سه‌ر ئاستێ پێشكه‌فتیان ئه‌وا ب پشكداریا 15 یانا ل باژێرێ سلێمانیێ هاتیه كرن.
تیما یانا دهۆك ئه‌وا ب یاریزانێن گه‌نج هه‌مبه‌ری یاریزانێن شاره‌زا و خودان سه‌ربۆر پشكداری كری سه‌رجه‌مێ هه‌شت یاریا سه‌ركه‌فتنه‌ك تۆماركر ئه‌وا بوویه ئه‌گه‌ر مانا خوه دناڤ پلا نایاب دا پارێزیت ژبه‌ركو دو یانه پاشڤه دچنه پلا ئێك، پشتی ب سه‌ركه‌فتی ل سه‌ر نه‌جه‌ف و خوه‌ڤه‌كێشانا یانا برایه‌تی ژ قاره‌مانیێ.
د داخویانیه‌كێدا رێگر ئه‌حمه‌د سه‌رپه‌رشتێ تیما یانا دهۆك بۆ رۆژناما ئه‌ڤرۆ گۆت: هه‌ر ژ ده‌ستپێكا قاره‌مانیێ ب دو ئارمانجێن جودا هاتبووینه دناڤ هه‌ڤڕكیێن خولێ دا، پاراستنا مانا خوه د خولێ دا و دروستكرن و پشتبه‌ستن ب یاریزانێن گه‌نج كو مفایی ژ شاره‌زاهیا قاره‌مانیێ و یاریزانێن دناڤ خولێ دا وه‌ربگرن و بشێوێ زانستی و ئه‌كادیمی ئاستێ خوه پێشبێخن، ژبه‌ركو ئه‌ڤ قاره‌مانیه سه‌ر ئاستێ پێشكه‌فتیان بوو و یاریزانێن هه‌لبژارتیێ ئیراقێ و پیشه‌كار دناڤ دا بوون و یێن مه گه‌نج و پێدڤی ب وه‌رگرتنا شاره‌زایێ بوون، له‌ورا ئه‌و ئارمانجێن مه دڤیایی شیان بجه بینن و ده‌ستخووشیا راهێنه‌ر و یاریزانێن خوه دكه‌ین سه‌رباری خوساره‌تیێ د هنده‌ك یاریان دا باشترین ئاست و هه‌ڤڕكیه‌كا بهێز هه‌بوون.
