ته ب ئازاران هشیار كرم
په‌خشان
سیپان مسته‌فا
تو هه‌ر یێ من دشكێنی. كێم دكی، هندی تو دشێی یێ دوباره دكی بێ كو راوه‌ستی، بێ كو هزر د وێ ئازارێ دا بكی.
كه‌سه‌كی، نه ته دله ونه هه‌ست، ئه‌ز هوسا هزردكم كو هزرێن ته جودانه دگه‌ل یێن مرۆڤان، كیماسیه‌ك یا دناخی ته دا ناهێلیت هه‌ستێن ته هشیاربن وچاڤێن ته ڤه‌بن ل وێ یا تو دگه‌ل من دكی، رۆژ بۆ رۆژ خرابتری وته‌دڤێت كیماسیا خوه ب ئازاردانا من ڤه‌شێری وددلێ من دا زارۆكێ وێ كێماسیێ مه‌زن دكی، تو نزانی كو هزرێن من دگه‌ل یێن ته جودانه، راسته، ئه‌رێ راسته، ل ده‌ستپێكێ من خوه دگه‌ل ته به‌رزه‌كر ومن هاری ته‌كر كو تو من وه‌كی خوه بێ هه‌ست بكی.
من خوه ژبیركر، هیڤیێن خوه نڤاندن و باش باش ڤه‌شارتن، من هوسا هزركر كو هه‌كه خوه ب ده‌ست ته ڤه به‌ردم و خوه بێ هێز بكم وچاڤێن خوه تژی رۆندك بكم وگیانێ خوه لاواز بكم وئه‌زمانێ خوه گرێدم، چاڤێن خوه تاری بكم و هه‌رتشتێ تو بكی خوه ل سه‌ر رازی بكم، پتر گرنگیێ ب ته بده‌م، هوسا تو دێ ده‌ستا ژ ئازاردانا من به‌رده‌ی، لێ من نه‌زانی دێ گه‌له‌ك خرابتركه‌ی، بلا، ساخبی، سوپاس بۆ ته، كوته ئه‌ڤه هه‌می دگه‌ل من كری، تو دێ د وێ هزرێ دابی كو ئه‌ز چووم وبه‌رزه بووم و ئێدی نه‌شێم قه‌یدێن ته ئه‌ز پێ گرێدایم ڤه بكم. لێ بزانه تو یێ شاشی وته وه‌ل من كر كو ژنوو ژدایك ببم. ب دورستی دوباره ئه‌ز كه‌سه‌كا دی مه و ژ دایكبوونا من ب ده‌ستێن ته بوو، له‌وا سوپاس بۆ ته كو ته ئه‌ز ب دورستی ژ خه‌ونه‌كا گران هشیاركریم.
ئه‌ها ئه‌ڤه چاڤێن من ڤه‌بوون وئه‌زمانێ من ژ گرێدانێ ئازاد بوو، ئێدی ئه‌ز هشیار بووم ومن باش های ژ هێزا خوه هه‌یه، نه ئێخسیرا جارانم، شه‌رم وترسا خوه من باش و باش نڤاند، جاره‌كا دی وان هشیار ناكم، بلا بنڤن ونه‌رابن، هه‌تا گیانێ من ب دورستی بنڤیت ودلێ من ژلێدانێ راوه‌ستیت. جاره‌كادی ژ دل سوپاس بۆته، كو ته ڤیایی من ب هه‌موو رێكا به‌رزه بكی، لێ ته نه‌دزانی ده‌م زوو دبۆریت و تو دێ ژ وێ خه‌ونێ هشیاربی یا ته تێدا دیتی ئه‌ز چووم و به‌رزه‌بووم، ئێدی یا بێ چاره‌مه، ته هند هێز ل نك من نه هێلایه پێ رابم… لێ ته نه‌زانی كا ته چ كر و ته چ ب سه‌رێ خوه ئینا، ته‌نه‌زانی ته كه‌سه‌ك ئاڤاكر كو لده‌ستپێكا لێدانا دلێ وێ نه ئه‌و كه‌سه‌یه یا كو تو ڤێ جارێ دبینی، به‌لێ ئه‌و كه‌سه‌كا دیه وهنده هزرێن دینه، دله‌كه ڤێ جارێ ناراوستیت ونا نڤیت، چوو ئه‌و مرۆڤا ته دنیاسی، یا بێ هێز و لاواز، یا مری، ئه‌و نه‌مایه. ڤێجا خوه بۆ من لاواز بكه، چاڤێن خوه تاری بكه وهێزا گیانێ خۆ باش بنڤینه، دا تو وی هه‌ستی بینی یێ من دیتی، به‌لكو تو ژی رۆژه‌كێ هشیار بی و قه‌نجییا ته ل من كری، قه‌رێ وێ ل سه‌ر من نه‌مینیت.
