ته سیاسی یان ژی شاعر؟
موحسن قۆجان
ئه‌وكالێ هه
دۆستێ نێزیكێ عیجی بوو(١)
وان ب هه‌ڤرا پاپۆڕ چێ دكر
سام و حام ژی وی ناڤ كربوون
هه‌ر زاروكێ نوحی ببا وی ناڤ لێ دكر
ته‌ڤ گیانه‌وه‌ر وی داكربوون د پاپورێ دا
وه‌لێ نهه
شكه‌فتا ده‌ڤێ وی ددریێتن
هه‌كو ل به‌ر با پێسكا دبینیت
ب شیتكا خۆ
ده‌ڤ و دفنێن خۆ یێن گرتین
نه‌كۆ پێشك بچن د چاڤان دا
پاشی گوچكێ وی بخریێتن
ڤی كه‌سێ هه
ئه‌وێ په‌مبی ل ریها باری
بوقچكێن سه‌ربۆرێن گرچن
یێ هیكریه په‌ندێن نه‌مر
سالسكیێ نزانیتن یێ مای دووغر
ته‌ڤ كامیرێن میدیاڤانان گه‌لتێ د گه‌ل دكه‌ن
كلوخێ وی تازی دكه‌ن و شه‌لته دكه‌ن
بیرهاتنان دكه‌ن چیچه‌لۆك و فرۆكه دكه‌ن
سیاسی خێرا دده‌نێ
هه‌لبه‌ستڤان ژی
دبن زارڤه‌كه‌رێن عشقا وی
گه‌هێن كه‌ل ژێ دوباره دكه‌ن
رۆژنامه‌ڤان پسیار ژێ دكه‌ن
:-ئه‌ری مامۆ تۆ پتر حه‌ز ژ كیژان دكه‌ی؟
ته سیاسی یان ژی شاعر؟
د ناڤ هزران دا ئاسی دبیت
سمبێلێن خۆ ڤه‌دجیت..ڤه‌دجیت
ده‌ست و سه‌رێن خۆ بلند دكه‌ت
دكه‌ته گازی
:-ئه‌ی خودێوا..خودێ مه‌زن
تو ب ناڤ و شیانا خۆ كه‌ی
هه‌ردو جین ژ برسان ب ڕزن
تویی زانا..تویی نه‌مر
ب كه‌رب و كینا خۆ د گه‌ل بكه
تو گۆڕێ وان بكه ئاگر
هه‌می پێكڤه مه دخاپینن
شاعر ب خه‌ونێن ده‌وله‌تێ ڤه، گڕنژینان و مه‌مكێن گه‌ش
هاڤینا كه‌ل دكه‌نه سڕ
و سیاسی
ب كرمكێن سۆرێن شوره‌شان، گه‌نده‌لیێ، خۆكوژیێ و دوه‌وێن گڕ
ئه‌م ژ رێكا خودێ باداین
هێلاین كافر
ل دویڤچوون:-ئینا ئه‌و بوو خودێ مه‌زن كه‌ره‌كێ ڤێ لاڤایێ بگوم كر و كه‌رێن دی هێلا دخه‌و.
هه‌لبه‌ستڤان ژ برسان ڕزین و سیاسی مانه قه‌له‌و
١-عیجێ لێفێ:-د ئه‌فسانا كوردیا مللی دا د بێژن، ل ده‌ڤه‌را لێفێ عیجه‌ك هه‌بوو،بێ قامێ گر بوو و چ جار ب زكێ خۆ تێر نه‌دبوو.
ئه‌ڤ عیجه هه‌ڤده‌مێ نوح پێغمبه‌ر بوویه(سلاڤێن خودێ ل سه‌ر بن).ده‌ما خودێ مه‌زن فه‌رمان ل نوحی كری پاپۆڕێ چێ كه‌ت، وی پێهاتنه‌ك د گه‌ل عیجی كر، كو نوح عیجی تێر كه‌ت به‌رامبه‌ری وێ چه‌ندی عیج دارا بۆ پاپۆڕێ ژ چیای بینیت. پشتی جهبه‌جهكرنا كه‌رێ ئێكێ ژ پێكهاتنێ، عیجی وه‌ریسێ خۆ هه‌لگرت و چوو چیای.دار ب ریشال ڤه هه‌لدكێشان و ددانانه سه‌ر وه‌ریسی.
ل ده‌مه‌كی عیج ماندی بوو و توره‌بوو، وه‌ریسێ خۆ ژ ناڤ دارا كێشا ودیڤ خۆرا خراند و زڤری ڤه ، هنده‌ك دار ب هه‌چكێ وه‌ریسی ڤه مان ،لێ ئه‌وانا تێرا وێ چه‌ندێ كر كو پاپۆڕێ پێ ئاڤاكه‌ن.
٣/٦/٢٠٢٢
