توركومان داخوازا پۆستێن خوه ژ پارتی دكه‌ن
ئه‌ڤرۆ نیۆز، قائید میرۆ
توركومانێن هه‌ولێرێ ئاماژه ب وێ رێكه‌فتنا دگه‌ل پارتی دكه‌ن بۆ پشكداریكرنێ د حوكمه‌تا نافخۆیا هه‌ولێرێ دا و دیار دكه‌ن كو جێگرێ پارێزگاری و قایمقامێ هه‌ولێرێ به‌هرا توركومانه.
عیماد ره‌فعه‌ت، سه‌رۆكێ فڕاكسیۆنا توركومانی ل جڤاتا پارێزگه‌ها هه‌ولێرێ ب ئه‌ڤرۆ نیۆز راگه‌هاند” توركومانێن هه‌ولێرێ ژبۆی پێك ئینانا حوكمه‌تا نافخۆیا هه‌ولێرێ ده‌نگێ خوه دایه فڕاكسیۆنا پارتی دیموكراتی كوردستان و رێكه‌فتن هاتیه‌كرن چه‌ند پۆسته‌كێن پارێزگه‌ها هه‌ولێرێ بۆ نه‌ته‌وا توركومانبن، وه‌كی جێگرێ پارێزگه‌ری و هژماره‌ك قایمقام و رێڤه‌به‌رێن فه‌رمانگه‌هان.
ره‌فعه‌ت گۆتژی” ژبلی پۆستێ سكرتێرێ جڤاتا پارێزگه‌هێ هه‌تا نوكه پارتی چو پۆستێن دی نه‌داینه توركومانان و ئه‌م چاڤه‌ڕێ دكه‌ین ئه‌ڤان پۆستێن رێكه‌فتن لسه‌ر هاتیه‌كرن بده‌نه مه بتایبه‌تی جێگرێ پارێزگاری و قایمقامێ قه‌زا سه‌نته‌رێ هه‌ولێرێ، چونكو گوره‌ی ئه‌نجامێن هه‌لبژارتنان به‌هرا توركومانانه و رێكه‌فتن لسه‌ر هاتیه‌كرن.