توركیا: به‌رهه‌ڤین بۆ راگرتنا شه‌ڕی هاریكاریا رۆسیا و ئۆكرانیایێ بكه‌ین
ب، سه‌رجان مه‌حمود:
ئیبراهیم كالین په‌یڤدارێ سه‌رۆك كۆمارێ توركیا د داخۆیانیه‌كێ دا راگه‌هاند كو نها به‌رهه‌ڤی بۆ كۆمبوونا وه‌زیرێن ده‌رڤه یێن توركیا و سووریێ دهێنه كرن و گۆت: (مه دڤێت ب نیه‌ته‌كا پاك جاره‌كا دی په‌یوه‌ندیێن خوه ل گه‌ل سووریێ ئاسایی بكه‌ین و هه‌تا نها ژی مه گه‌له‌ك بزاڤ بۆ ڤێ یه‌كێ كرینه، چونكی مه دڤێت هه‌موو پرسێن هه‌ی ل گه‌ل شامێ ب دیالۆگێ چاره‌سه‌ر بكه‌ین و د قۆناغا نها دا ئه‌م به‌ر ب ره‌وشه‌كا ئه‌رینێ ڤه دچین، لێ ئه‌و یه‌ك رامانا هندێ ناده‌ت كو ئه‌م دێ چو ئۆپه‌راسیۆنان ل دژی یه‌په‌گێ و هه‌سه‌دێ نه‌كه‌ین، چونكی مه به‌ری نها ژی گه‌له‌ك جاران دیار كریه كو ل باكورێ سووریێ مه‌ترسی ل سه‌ر ئاسایشا توركیا هه‌نه و ژ به‌ر هندێ ژی هه‌تا نها بابه‌تێ ئۆپه‌راسیۆنا سه‌ربازی د رۆژه‌ڤا مه دایه).
په‌یڤدارێ سه‌رۆك كۆمارێ توركیا هه‌روه‌سا راگه‌هاند وان هه‌تا نها چه‌ندین جاران داخواز ژ رۆسیا و ئۆكرانیایێ كرینه كو شه‌ڕی رابگرن و توركیا به‌رهه‌ڤه بۆ راگرتنا شه‌ڕی هاریكاریا هه‌ر دو وه‌لاتان بكه‌ت و گۆت: (گه‌له‌ك ئاشكرایه كو سه‌ركه‌فتیێ شه‌ڕی نینه و نه رۆسیا و نه ژی ئۆكرانیا نه‌شێن ب شه‌ڕی چو ئه‌نجامه‌كێ بده‌ستڤه بینن، ئه‌م وه‌كو توركیا دبێژین كو ده‌م هاتیه شه‌ڕێ ل ئۆكرانیایێ ب دووماهی بهێت و توركیا به‌رهه‌ڤه بۆ راگرتنا شه‌ڕی و ده‌ستپێكرنا قۆناغه‌كا نوو هاریكاریا هه‌ر دو وه‌لاتان بكه‌ت).
