توركیا دیواره‌ك ل سنۆرێ ئیرانی دروست كرییه
ئه‌ڤرۆ نیوز:
وه‌زاره‌تا ناڤخوه‌یا توركیا راگه‌هاند، پرۆژێ دروستكرنا دیواره‌كى ب درێژییا هه‌شتێ و ئێك كیلۆمه‌تران ل سه‌ر سنۆرێ د ناڤبه‌را وان و ئیرانێ دا ب دوماهى هاتییه.
سلێمان سۆیلۆ، وه‌زیرێ ناڤخوه‌یێ توركیا ب به‌لاڤكرنا چه‌ند وێنه‌یان ل تویته‌رى راگه‌هاند، ب مه‌به‌ستا رێگرتنێ ل كارێ قاچاخى و دیاردا كوچكرنا نه یاسایى و رێگرتن ل هاتنا چه‌كدارێن په‌كه‌كێ ژ ئیرانێ بۆ توركیا، وان بریار ل سه‌ر دروستكرنا دیواره‌كى دایه ب درێژییا 114 كیلومه‌تران و تا نها هه‌شتێ و ئێك كیلۆمه‌تر ژێ هاتینه دروستكرن.
وه‌لاتێن ئیران و توركیا ب درێژییا 534 كیلۆمه‌تران سنۆرێ هه‌ڤپشك هه‌یه، ئه‌و دیوار ل رۆژهه‌لاتێ پارێزگه‌ها ئاگرى ل باكورێ كوردستانێ هاتیه دروستكرن كو هه‌ڤسنۆره دگه‌ل پارێزگه‌ها ئورمیێ یا رۆژهه‌لاتێ كوردستانێ.
هه‌روه‌سا ل سالا 2018 و ب هه‌مان مه‌به‌ست، توركیا دیواره‌ك ب درێژاهییا 764 كیلومه‌تران ل سنۆرێ سووریا دروست كرییه.
سالانه ل سنۆرێ دناڤبه‌را رۆژهه‌لاتێ كوردستانێ د گه‌ل باكورێ كوردستانێ كو هه‌رسێ پارێزگه‌هێن ئاگرى، وان و ئورمیێ پێكڤه د هه‌ڤسنۆرن، ب هزاران وه‌لاتیێن ئیرانى و ئه‌ڤغانى بۆ چوونا ئه‌ورۆپا دچنه توركیا، دهه‌مان ده‌م دا ئه‌و سنۆره جهێ كولبه‌ر و كاسبكارێن ده‌ڤه‌رێن سنۆرى یێن وان هه‌ردو پارچێن كوردستانێ یه.
