توركیا رێیا ترۆمبێلێ گه‌هانده هنداڤی گوندێ هرۆرێ
به‌رواری بالا، زنار تۆڤی:
ئه‌ڤه ده‌مێ حه‌فتیه‌كێ یه ب ره‌نگه‌كێ به‌رده‌وام تۆپخانێن سۆپایێ توركیا ده‌وروبه‌رێن گوندێ هرۆرێ ل ده‌ڤه‌را به‌رواری بالا یا سه‌ر ب قه‌زا ئامێدیێ ڤه تۆپباران دكه‌ن و ب شه‌ڤێ ژی فڕۆكێن هه‌لیكۆپته‌ر ده‌وروبه‌رێن گوندی بوردۆمان دكه‌ن و د هه‌مان ده‌م دا سۆپایێ تركیا رێیا ترۆمبێلێ ژی گه‌هانده هنداڤی وان ره‌بیێن ل هنداڤی گوندی داناین، كو ئه‌و ره‌بیه ژی نێزیكی كیلۆمه‌تره‌كێ ژ گوندی د دوورن.
ئه‌یاد ئه‌دیب خوه‌جهه‌كێ گوندێ هرۆرێ یه بۆ رۆژناما ئه‌ڤرۆ دبێژیت: سۆپایێ توركیا رێیا ترۆمبێلان گه‌هانده سه‌رێ كه‌ڤره‌سۆرێ ل هنداڤی گوندێ هرۆرێ و ب حه‌فاره و شه‌فه‌لان چه‌په‌رێن خوه چێكرینه، مه چه‌ندین جاران حه‌فارێن وان دیتینه ده‌مێ ل وان ره‌بیان كار دكر، هه‌روه‌سا سۆپایێ توركیا رۆژانه ئاقارێ گوندی و ده‌وروبه‌رێن مه تۆپباران دكه‌ن، دیسا سێ گۆڤێن په‌زی یێن گوندیان تۆپباران كرینه و هه‌رسێ هه‌ڕفاندینه دیسا چه‌ندین گۆلێن تۆپان ل ناڤا زه‌ڤیان داینه و ئه‌و زه‌ڤه ب ته‌مامی خرابكرینه و چه‌ندین زه‌ڤی ژی ژ ئه‌گه‌رێ تۆپبارانێ سۆتینه.
ئه‌یادی خویا ژی كر، ژ ئه‌گه‌رێ تۆپبارانا به‌رده‌وام یا سۆپایێ توركیا چه‌ندین پرچكێن تۆپان ب ناڤ گوندی كه‌فتینه، دوهی ژی تۆپه‌ك ل پشت قۆتابخانا گوندی كه‌فتیه و هه‌تا نوكه ژ ئه‌گه‌رێ تۆپبارانا سۆپایێ توركیا وه‌لاتیه‌كێ گوندێ هرۆرێ بریندار بوویه.
