توركیا. .. سه‌لجوقیه‌ت و دووماهی گه‌ڕا شه‌تره‌نجێ
((ده‌رگه‌هێن خوه ژ رێخستنێن تیروَریستان ڕا بگرن))، ب ڤێ هه‌ڤوَكا نه دپلوَماسی و ب شێوازه‌كێ نه‌یا به‌ربلاڤ د نه‌ریتێن په‌یوه‌ندیێن نێڤده‌وله‌تیدا، ((جینیڤر بساكی )) په‌یڤدارا وه‌زاره‌تا ده‌رڤه‌یا ئه‌مریكی كارتا هوَشداریا سیاسی هه‌مبه‌ر توركیا بلند كر، ب تایبه‌ت پشتی پشته‌ڤانی و په‌یوه‌ندیێن ستراتیژی دگه‌ل (حماس) ێ و بێده‌نگی و هه‌ڵوێست نه‌رمی دگه‌ل داعشان و ره‌ڤین و ده‌ربازبوونا (حیات بوَمیدێن) د رێكا فروَكه‌خانه‌یا ئیسته‌نبولێ و به‌ر ب ئورفایێ بۆ ده‌ریكێ (ئه‌كجاكالی) كو یا به‌رنیاسه ب خالا ده‌ربازبوونا بیانییان ئه‌وێن دخوازن په‌یوه‌ندیێ ب (داعش) ڤه بكه‌ن، پاشی گه‌هشتیه سووریایێ. ژ ئالیه‌ك دن، ئه‌و نه‌ریتێ مه‌حموود عه‌باس سه‌روَكێ ده‌ستهه‌ڵاتا فه‌له‌ستینێ ژلایێ ئه‌ردوگانی ڤێجارێ و بۆ ئێكه‌مین جار پێ هاتیه پێشوازی كرن، بوویه جهێ سه‌رنج و بالكێش نه ته‌نێ ژ لایێ ده‌زگه‌ه و سازیێن راگه‌هاندنێ ، به‌لكی گه‌له‌ك حوكمه‌ت و ناڤه‌ند و شروَڤه‌كار و چاڤدێرێن سیاسی ژی ژ وێ ڤیسته‌ڤاڵا جلكێن دیرۆكی ێن ئیمبراتوَرییه‌ت و حوكمه‌تێن توركیا حێبه‌تی بوون. ئه‌ردوَگانی هه‌می نموونه‌ێن ده‌ستهه‌ڵاتداریا دیرۆكیا توركان هه‌ر ژ سه‌رده‌مێ عێل و عه‌شیره‌تان و سه‌رده‌مێ كه‌ڤنارێ سه‌لجوقیان و ل دووڤ دا عوسمانلیه‌ت و پاشی سیكوَلاریزما ئه‌تاتوركی و نها ژی ناسیونالیزما ئولی پێشكێشی دوست و نه‌یاران كر. ئه‌و ب ڤی ئاوایی دلوَڤانیا خوه ژبوَ نیۆعوسمانیزمێ و تێكهه‌لكێشانا ئولداری و ناسیۆنالیزما توركی وه‌كی په‌یامه‌ك و ئایدیوَلوَژیایه‌ك رادگه‌هینیت، به‌لێ هه‌روه‌ك یا دیاره ئه‌ڤێ ئایدییایێ ب غه‌یری ئاریشه و قه‌یران و كریز و شه‌ر لسه‌ر هه‌ردوو ئاستێن ناڤخو و ده‌ره‌كی ، چ به‌دیلێن دی ژبوَ حوكمه‌تا ئه‌ردوگانی نه‌هێلاینه. توركیا نه د سه‌رده‌مێ خوه دا دژیت، ئه‌قلیه‌تا میراتگریێ و سوڵتانییه‌ت و ئێكستراخه‌لافه‌تێ، مه‌زنترین و مه‌ترسیدارترین سه‌نگه‌ر و چه‌په‌رێن دژایه‌تیێ بۆ خوه ڤه‌كرینه. توركیا ئیروَ دژی ئه‌مریكایه، دژی ئه‌ورۆپا و (ناتۆ) یه، دژی (فتح الله گوله‌ن و جه‌ماعه‌ته) و دژی (یه‌هۆدی) و دژی (ئیرانی) و دژی (یونانی) و دژی (ئه‌رمه‌نی) و دژی (كورد) و دژی (شیعه) و دژی (سوننه) یێن پشكدار د حوكمه‌تا ئیراقێ یه و دژی سیتافك و سیبه‌را (روَژئاڤا) یه و هه‌می كار و ره‌فتارێن وان ره‌ت دكه‌ت و وه‌كی روَژهه‌لاتیه‌كێ كه‌ڤنار هزر دكه‌ت. توركیا دخوازیت ببیته به‌رده‌ڤك و نوونه‌رێ ئیسلامێ ل جیهانێ و دوژمنایه‌تیا غه‌یره ئیسلاما بكه‌ت، ئه‌ڤه ژی كاره‌كێ ئه‌سته‌مه، به‌لكی خوه‌كوشتنه‌كا سیاسیه. تێكه‌لكرنا ره‌گه‌زپه‌رستیێ ل گه‌ل سه‌روه‌ریا ئۆلداریێ نه‌كاره‌كێ ساده و سڤك و سه‌ناهیه، به‌لكی دیزاینه‌كێ میكانیزم كریه و ڤه‌رێژێن خوه هه‌نه، مه‌به‌ستا مه ئه‌وه كو ستراتیژییه‌تا توركیا دگه‌ل ( ئیخوانان ) و دوَستایه‌تیا نه‌په‌نی د گه‌ل (داعشان)، مه‌حاڵه بێ قه‌ناعه‌تا ده‌ستهه‌ڵاتێ هاتبیته قه‌بوولكرن. ئه‌ڤ پروَگرامه ل ده‌ف (ناتوَ) و هه‌ر هه‌موو جیهانێ و هه‌تا بگره ژ جه‌م سه‌ركردایه‌تیا كوردستانێ ژی هاتیه خوَیا بوون. له‌وڕا (فرانسوا هوَلاند) نه هند یێ خوَشحالبوو ب ئاماده‌بوونا (داود ئوَغلوَ) ل مه‌راسیما ملیوَنیا (شارلی هیبدوَ). باشترین ده‌رفه‌ته بوَ توركیا خوه ژ یاریێن پشت په‌رده ده‌رباز بكه‌ت و ل هه‌سپێ ته‌ڕاوده سیارنه‌بیت، خوه ژ وه‌همیه‌تا سوڵتانان ده‌رباز بكه‌ت.
