توركیا پشتی كونگرێ پێنجێ یێ (AKP)ێ
ل ناڤه‌راستا ئه‌ڤ ساله دا هنده‌ك گهۆرین و بویه‌رێن چاره‌نڤێساز ل توركیا هاتنه پێش، دبیت ل نها و ئاینده‌ی دا ژی كاریگه‌رییا خوه لسه‌ر ته‌ڤایا ره‌وشا توركیا و ده‌ڤه‌رێ هه‌بیت، نه‌خاسمه ئه‌ڤ گورانكارییه د هه‌لبژارتنێن 7/6/2015 ێ دا گه‌هه‌شتنه گوپیتكێ و هه‌ڤسه‌نگییا سیاسی ل ڤی وه‌لاتی گوهارت، (AKP) نه‌شییا بتنێ حكومه‌تێ دورست بكه‌ت (HDP)ێ ژی شیا به‌ندا 10% ێ ده‌رباز بكه‌ت و سه‌ركه‌فتنه‌كا دیرۆكییا مه‌زن بو خوه تۆمار بكه‌ت، بو جارا ئێكێ لیسته‌یه‌كا كوردی شییا ب (80) ئه‌ندام په‌رله‌مانتارا ڤه بكه‌ڤیته په‌رله‌مانێ توركیێ، به‌لێ سه‌ره‌رای ڤێ چه‌ندێ كو جهێ مخابنیێ یه (HDP) ێ نه‌شیا وه‌كو پێتڤی مفای ژ ڤێ سه‌ركه‌فتنێ ببینیت.
د هه‌مان ده‌م دا وسه‌ره‌رای هه‌ول و بزاڤێن به‌رده‌وامێن (AKP)، به‌لێ ئه‌و ژی نه‌شییان حكومه‌تێ دروست بكه‌ن، ب خوه ژی نه‌ڤیا هه‌ڤپه‌یمانیێ د گه‌ل چ پارتییا دروست بكه‌ن بو پێكئینانا حكومه‌تێ، به‌لكو هه‌ر دڤییا حكومه‌تێ بتنێ دروست بكه‌ت، هه‌ر ل ده‌ستپێكا دیاربوونا ئه‌نجامێن هه‌لبژارتنان (AKP)ێ بریارا هه‌لبژارتنێن پێشوه‌خت دا، پشتی ب دوماهی هاتنا ده‌مێ قانوونیێ ئاڤاكرنا حكومه‌تێ، هه‌می ئالی ژی رازی بوون كو ل 1/11/2015 ێ هه‌لبژارتن بهێنه ئه‌نجامدان، د ڤێ ده‌ربارێ دا (AKP) ژی ژ خو پشت راسته كو دێ د ڤان هه‌لبژارتنێن بهێت دا، ئه‌نجامێن باشتر بده‌ست ڤه‌ئینیت. هنده‌ك شاره‌زا ژی وه‌سا دبینن ئه‌نجام ژ هه‌لبژارتنێن بوری جودا نابن، به‌لێ (AKP) وه‌سا هزر دكه‌ت كو ب باوه‌ریه‌كا موكم، دێ ڤێ جارێ حكومه‌تێ بێ هه‌ڤپه‌یمان پێك ئینیت.
د هه‌مان ده‌مدا ژی شه‌ری ل هنده‌ك ده‌ڤه‌رێن كوردستانێ ل توركییا ده‌ستپێكریه، توركیا بو جارا ئێكێ بریارا خو دا، پشكداریێ دشه‌رێ دژی داعشێ دا بكه‌ت، هه‌روه‌سا هه‌ڤده‌م دگه‌ل ڤێ مژارێ، توركیا ب فرۆكان هێرشی سه‌ر باره‌گایێن په‌كه‌كێ كر، ڤی شه‌ری رۆژ بو رۆژێ ره‌وشا توركییا ئالوزتر كر، نه‌خاسمه ده‌ڤه‌رێن كوردستانیێن سه‌ر سنۆری، زیانه‌كا مه‌زن ب خه‌لكێ سڤیلێ وان ده‌ڤه‌ران كه‌فت.
سه‌ره‌رای چه‌ندین بانگه‌وازیێن (HPG) و (KCK)ێ ل سه‌رانسه‌رێ توركیا، به‌لێ بتنێ مان و دگه‌ل وان باژیركێن بچویكێن ل سه‌ر سنوری دشه‌ر و نه‌خوشیێ دا، و هه‌می ئالییه‌كی ژی ئه‌ڤ شه‌ره بێ ئه‌نجام وبێ مفا ل قه‌له‌م دان.
د ڤێ ره‌وشا ئالوز ومه‌ترسیدار دا، پارتییا ده‌ستهه‌لات دار ل توركیا (AKP)، بریارا به‌ستنا كونگرێ خو یێ پینجێ دا، ل رۆژا شه‌مبییا بوری رێكه‌فتێ 12/9/2015 ێ ل ئه‌نقه‌را پایته‌خت گرێدان، گورانكاریێن مه‌زن د ڤی گونگره‌یێ دا هاتنه ئه‌نجام دان، ل سه‌ر ئاستێ سه‌ركردایه‌تییا (AKP)، (31) ئه‌ندامێن نوی ژ سه‌ر جه‌مێ (50) ی ئه‌ندامان، هاتنه گهورین و ئه‌ڤه پێنگاڤه‌كا نوی و بوێرانه‌یه ل سه‌ر ئاستێ پارتیا (AKP)ێ هاتی یه كرن، ژ لایه‌كێ دی ڤه هنده‌ك سه‌ركرده و كه‌سایه‌تیێن ناڤدار و كاریگه‌ر ل توركییا، هه‌م ل سه‌ر ئاستی (AKP) ێ ڤێ جارێ ژ سه‌ركردایه‌تییا (AKP) ده‌ركه‌فتن، كو هنده‌ك ژڤان كه‌سان ژ دامه‌زرێنه‌رێن (AKP) بووینه، هه‌روه‌سا خودان رۆله‌كێ كاریگه‌ر بووینه د سه‌ر ئێخستن و پێشه‌ڤه‌برنا (AKP)ێ دا، ژ وان ژی بلند ئارنج و علی باباجان كو دوو كه‌سایه‌تیێن سیاسیێن كاریگه‌ر بووینه ل توركیێ، ژلایه‌كێ دیڤه سه‌رۆك كومارێ به‌رێ عبدوڵلا گول ب ئێك جاری نه‌هاته د كونگرێ دا كو ئێك ژ دامه‌زرێنه‌رێن ڤی پارتیێ بوویه.
خالا هه‌ره گرنك دڤی كونگری دا ئه‌و بوویه، ره‌جه‌ب ته‌یب ئه‌ردۆگان هه‌می ده‌ستهه‌لات ئێخستینه بن ده‌ستێ خو دا، ب رێكا وان ئالوگورێن كرین، كو د سه‌ركردایه‌تییا (AKP)ێ دا زێده‌تر هه‌ڤال و كه‌سێن نیزیكێ خوه داناینه، ژ وان ژی زاڤایێ وی (به‌رائه‌ت ئال بایره‌ق).
پشتی ئه‌ڤ گورانكاریێن د(AKP)ێ دا هاتینه ئه‌نجام دان، گه‌له‌ك شلوڤه‌كارێن سیاسیێن توركیا پێش بینییا وێ چه‌ندێ دكه‌ن، كو ئه‌ڤه هه‌ره‌شه‌كا مه‌زنه ل سه‌ر پروسێسا دیموكراتیێ ل توركیا.
ژ لایه‌كێ دی ڤه د ڤی كونگره‌ی دا دوو كه‌سایه‌تیێن كورد، ب ناڤێ (غالب ئه‌نساری ئوغلۆ و محه‌مه‌د مه‌هدی) كه‌فتنه دناڤ سه‌ركردایه‌تییا (AKP)ێ دا، ئانكۆ ژ وان (50) كه‌سێن سه‌ركردایه‌تییا (AKP) دوو ژ وان كوردن، ئه‌ڤه ژی بو پتر گرانیێ بێخنه لایه‌نێ كوردی و ده‌ڤه‌را كوردستانێ چنكۆ مه‌ترسییه‌كا مه‌زن یا ل سه‌ر رێژا ده‌نگێن AKPێ ل ده‌ڤه‌رێن كوردستانێ هه‌ی.
ب ڤان گورانكاریێن ئێك لدیڤ ئێكێن بله‌ز ل توركیا دا په‌یدا دبن، دێ بیته ئه‌گه‌رێ هندێ كو نه‌خشێ سیاسی ل توركیا گورانكاریێن گه‌له‌ك مه‌زن ب سه‌ردا بهێن، دویر نینه هنده‌ك حزب وهێزێن سیاسیێن نوی ل توركیا، په‌یداببن وئاسویێن باشتر ل ناڤخۆیا وێ په‌یدا ببن ل سه‌ر ئاستی هه‌رێمێ، زێده‌تر وه‌لاتێ توركیا گرانییا خو هه‌بت ل یارییا سیاسی ل هه‌رێمێ دا، ده‌لیڤه‌كا باشتره بو هندێ رێكێن چاره‌سه‌رییا كێشا كوردی بهێنه پێش.
