تورکیا بوویە ئەگەرێ دروستبوونا ئالۆزیێن نوو ل سووریێ
کۆڤارەکا ئەمریکی دیار دکەت پشتی ژناڤچوونا رژێما بەشاری تورکیا بزاڤا ڤێ یەکێ دکر پرسێن هەی چارەسەر بکەت، لێ نها دەرکەفت تورکیا نەشیا چو پرسەکێ چارەسەر بکەت و بوویە ئەگەرێ دروستبوونا ئالۆزیێن نوو ل سووریێ.
کۆڤارا فۆرین پۆلیسی یا ئەمریکی د راپۆرتەکێ دا بەحسێ ڤێ یەکێ کریە، ل سووریێ رەوش خرابتر لێ دهێت و نها ناکۆکیێن گەلەک مەزن د ناڤبەرا پێکهاتەیێن ل سووریێ ل گەل دەستهەلاتا شامێ دا هەنە، پشتی کوشتنا ب سەدان وەلاتیێن سڤیل یێن عەلەوی و دورزی ب دەستێ چەکدارێن سەر ب ئەحمەد شەرعی باوەریا وان ب شامێ نەمایە و نها ناکۆکیێن مەزن د ناڤبەرا رێڤەبەریا خوەسەر یا کوردان و شامێ دا ژی هەنە و تورکیا رۆژانە فشارێن خوە ل سەر شامێ زێدەتر لێ دکەت و دخوازیت شام شەڕێ کوردان بکەت، لێ ژ بەر پشتەڤانیا ئەمریکا و هندەک ژ وەلاتێن دی بۆ کوردان هەتا نها هێزێن سەر ب ئەحمەد شەرعی نەشیاینە ئێرشی کوردان بکەن و هەکە تشتەک وەسا روو بدەت دێ سووریێ بیتە مەیدانا شەڕەک نوو و دژوار و زەحمەتە ئەمریکا رێ بدەت تشتەک وەسا روو بدەت، چونکی هێزێن ئەمریکا ل باکورێ سووریێ هەنە و ژ بەر ڤێ یەکێ ژی هێزێن سەر ب ئەحمەد شەرعی نەوێرن کارەک وەسا بکەن.
هەمان کۆڤارێ ئەو یەک ژی دیار کریە، تورکیا دڤێت سووریێ ب تەمامی بکەڤیتە ژێر کۆنترۆلا وێ، تورکیا دڤێت سیستەمەک ناڤەندی و توندرەو ل سووریێ بهێتە ئاڤاکرن و تورکیا نەڤێت کورد، دورزی و عەلەوی بگەهنە مافێن خوە و ب هەموو رەنگەکێ ژی پشتەڤانیێ ل دەستهەلاتا نها یا شامێ دکەت، لێ ئەو یەک ب دلێ ئەمریکا، ئسرائیلێ و وەلاتێن رۆژئاڤایی نینە، چونکی هەبوونا دەستهەلاتەکا توندرەو ل سووریێ دێ بیتە ئەگەرێ دروستبوونا قەیرانەکا نوو ل سووریێ و رۆژهەلاتا ناڤین.
د پشکەکا دی یا راپۆرتێ دا ئەو یەک ژی هاتیە دیار کرن، کو پشتی ئێرشێن بەردەوام یێن ئسرائیلێ ل دژی دەستهەلاتا نها یا شامێ، کورد و دورزی هەست ب ڤێ یەکێ دکەن پشتەڤانیەکا باش بۆ وان هەیە، هەروەسا نها پێگەهێ ئەحمەد شەرعی ژی لاواز بوویە، لێ تورکیا ب هەموو هێزا خوە دڤێت رێ ل دروستبوونا سیستەمەک فیدرالی و نە ناڤەندی ل سووریێ بگریت و هەتا نها تورکیا نەشیایە د پلانا خوە دا یا سەرکەفتی بیت و ئسرائیلێ بەردەوام پلانێن تورکیا ژناڤبرینە و هەری دووماهیێ ژی ئسرائیلێ ئێرشی چەندین ناڤەندێن سەربازی یێن سەر ب تورکیا ل لازقیە کرن و گەلەک چەکێن گران هاتنە ژناڤبرن، ئانکو تورکیا ب جهێ کار بۆ ئارامیێ ل سووریێ بکەت ب سیاسەتا خوە یا دوور ژ راستیێ بوویە ئەگەرێ دروستبوونا ئالۆزیێن نوو و گەلەک وەلاتێن عەرەبی ژی ژ سیاسەتا نها یا تورکیا ل سووریێ رازی نینن.
