تورکیا ل دۆر رەوشا ئیرانێ هۆشداریێ ددەت
وەزیرێ بەرگریێ یێ تورکیا دیار کر، وەکو تورکیا وان خوە بۆ هەر پێشهاتەکێ ل دەڤەرێ بەرهەڤ کرینە و د هەمان دەمی دا رێ نادەن سیناریۆیێن ل ئیراقێ و سووریێ ل ئیرانێ ژی بهێنە دوبارە کرن، چونکی زانیاریێن گەهشتینە دەستێ وان نیشا ددەن هندەک گرۆپێن چەکدار دخوازن مفایێ ژ شەڕێ نها وەربگرن و بزاڤا ڤێ یەکێ بکەن بچنە ئیرانێ و هندەک دەڤەران بکەنە ژێر کۆنترۆلا خوە.
یاشار گولەر ئەو یەک ژی دیار کر، تورکیا نەڤێت رەوشا رۆژهەلاتا ناڤین ئالۆز بیت، د هەمان دەمی دا دڤێت چو گرۆپێن چەکدار ژی نەبنە دارودەستێ ئسرائیلێ و ئەو یەک دێ بیتە ئەگەرێ شەڕەکێ دی یێ خراب ل دەڤەرێ و ژ بەر ڤێ یەکێ ژی تورکیا رێ نادەت چو ئالۆزیێن نوو ل دەڤەرێ روو بدەن و دڤێت چو گرۆپ ژی بزاڤا ئالۆزکرنا رەوشا ناڤخوەیی یا ئیرانێ نەکەن.
