تورکیا نەرازیبوونا خوە ل هەمبەر ئەمریکا دیار دکەت
وەزارەتا دەرڤە یا تورکیا راگەهاند، دەمەکە ئەمریکا ل گەل هێزێن سووریا دیموکرات ل هندەک دەڤەرێن سنۆری ل گەل تورکیا دەست ب مانۆرێن سەربازی کریە، ئەو یەک ب چو رەنگەکێ ناهێتە قەبوولکرن و وەکو تورکیا وان بەری نها داخواز ژ ئەمریکا کرینە، کو ب چو رەنگەکێ هاریکاریا هێزێن سووریا دیموکرات نەکەت.
پشتی کو هێزێن ئەمریکا و شەرڤانێن هێزێن سووریا دیموکرات ل هندەک دەڤەرێن سنۆری یێن نێزیکی تورکیا دەست ب مانۆرەکا سەربازی کرن، وەزارەتا دەرڤە یا تورکیا نەرازیبوونا خوە ل هەمبەر ئەمریکا دیار کر و راگەهاند، بزاڤێن ئەمریکا یێن ڤێ دووماهیێ ب چو رەنگەکێ ناهێنە قەبوولکرن، چونکی ئەمریکا پتر ژ جاران هاریکاریا هێزێن سووریا دیموکرات و یەپەگێ دکەت، ئەو هەر دو هێزە ژی سەر ب پەکەکێ نە و د لیستا تیرۆرێ دانە، ژ بەر هندێ ژی دڤێت ئەمریکا دەست ژ هاریکاریا وان بەردەت، چونکی یەپەگە و هێزێن سووریا دیموکرات مەترسینە بۆ تورکیا و تورکیا دێ هەتا دووماهیێ ژی شەرێ وان کەت.
وەزارەتا دەرڤە یا تورکیا ئەو یەک ژی دیار کریە، وان بەری نها ب فەرمی چەندین جاران داخواز ژ ئەمریکا کرینە، کو ب چو رەنگەکێ هاریکاریا یەپەگێ و هێزێن سووریا دیموکرات نەکەت، لێ دیارە هەتا نها ژی ئەمریکا گرنگی نەدایە داخوازیا تورکیا و نها پتر ژ هەر دەمەکێ ئەمریکا هاریکاریا وان دکەت، ئەمریکا ب بەهانا شەرێ ل دژی داعشێ نها ل باکورێ سووریێ کار بۆ ئاڤاکرنا هەرێمەکا جودا دکەت، ئەو یەک مەترسیەکا گەلەک مەزنە بۆ تورکیا، تورکیا دێ ب هەموو شیانێن خوە بەرسڤا هەر مەترسیێ دەت، ژ بەر هندێ ژی باشترە ئەمریکا وەکو هەڤپەیمانەکا ستراتیژی نێزیکی تورکیا ببیت و دەست ژ هاریکاریا هێزێن وەکو یەپەگێ و گرۆپێن دی یێن تیرۆرستی ل سووریێ بەردەت.
ل ئالیێ دی وەزارەتا دەرڤە یا ئەمریکا ژی دوهی بەرسڤا تورکیا دا و راگەهاند، کو ل سووریێ ئەو نها گرنگیێ ددەنە شەرێ ل دژی داعشێ و ژ بۆ شەرێ ل دژی داعشێ ژی ئەو هاریکاریا هێزێن سووریا دیموکرات دکەن، هەتا نها ژی هێزێن سووریا دیموکرات شیاینە رۆلەکا کاریگەر بۆ لاوازکرنا داعشێ ل سووریێ بگێرن و هاریکاریا ئەمریکا ژ بۆ هێزێن سووریا دیموکرات ژی د چارچۆڤێ شەرێ ل دژی داعشێ دایە و هەتا داعش ل سووریێ بمینیت و مەترسیا وێ ل سەر بەرژەوەندیێن ئەمریکا هەبیت، ئەو دێ هاریکاریا هێزێن سووریا دیموکرات کەن و هەکە تورکیا ئاریشەک ژی ل گەل هێزێن سووریا دیموکرات هەبیت دڤێت ئەو یەک دوور ژ شەرێ و ب رێیا دانوستاندنان بهێتە چارەسەرکرن و ئەمریکا ژی بەرهەڤە ژ بۆ چارەسەرکرنا ئاریشێن د ناڤبەرا تورکیا و هێزێن سووریا دیموکرات دا هاریکاریا هەر دو ئالیان بکەت.
