تورکیا و رۆژهەلاتا ناڤین پێدڤی ب ئاشتیێ نە
هەڤسەرۆکێ دەم پارتی دیار دکەت، هەکە قووناغا ئاشتیێ یا تورکیا سەرکەڤیت دێ کاریگەریا خوە یا گەلەک باش بۆ هەموو رۆژهەلاتا ناڤین ژی هەبیت، چونکی د رەوشا نها یا ئالۆز دا تورکیا و رۆژهەلاتا ناڤین پێدڤی ئاشتیێ نە.
تونجەر باکرهان هەڤسەرۆکێ دەم پارتی د کۆنفرانسێ نێڤدەولەتی یێ ئاشتیێ و جڤاکێ دیموکراتیک ل ستەنبولێ دا ئاخڤی و دیار کر، وەکو دەم پارتی و گەلێ کورد ل تورکیا و باکورێ کوردستانێ ئەو ب هەموو شیانێن خوە پشتەڤانیێ ل ئاشتیێ دکەن، سەرکەفتنا قووناغا ئاشتیێ بۆ هەموو تورکیا یا گرنگە، د رەوشا نها یا ئالۆز ل رۆژهەلاتا ناڤین دا پێدڤیا تورکیا و هەموو رۆژهەلاتا ناڤین ب ئاشتیێ هەیە و گۆت: (بێگومان نها کورد ل تورکیا ژ بۆ ئازادیێ و بدەستڤەئینانا مافێن خوە یێن رەوا کار دکەن، د هەمان دەمی دا پێدڤیا تورکیا ژی ب دیموکراسیێ هەیە، ب سالانە بەرپرسێن تورکیا دبێژن ژ بەر شەرێ ئەو نەشێن چاکسازیان بکەن، نها شەڕ نامینیت و وی دەمی دڤێت قووناغەکا نوو بۆ پێشڤەبرنا تورکیا دەستپێ بکەت، کورد ژی ب هەموو رەنگەکێ ژ بۆ ئازادیێ و ئاشتیێ کار دکەن).
هەڤسەرۆکێ دەم پارتی د پشکەکا دی یا ئاخڤتنا خوە دا ئەو یەک ژی دیار کر، نها دەلیڤەیەکا گەلەک گرنگ و دیرۆکی هاتیە پێش، نابیت رێ بدەین هندەک ئالی ژ بەر بەرژەوەندیێن خوە یێن تەنگ جارەکا دی ئالۆزیان دروست بکەن، دڤێت هەموو هێزێن سیاسی ل تورکیا ژ بۆ ئاشتیێ و چارەسەرکرنا پرسا کوردی هاریکار بن و گۆت: (ژ بۆ ئاشتیێ و چارەسەرکرنا پرسا کوردی دڤێت ب کریاری هندەک تشت بهێنە کرن، مخابن هەتا نها تشتەک وەسا نەهاتیە کرن، ئالیێ کوردی و ئۆجەلانی گەلەک تشت کرن، لێ هەتا نها دەولەتا تورکیا ب کریاری چو نەکریە، کورد دلگرانن، دڤێت هندەک تشت بلەز بهێنە کرن، د پێنگاڤا ئێکێ دا دڤێت هەموو گرتیێن سیاسی بهێنە ئازاد کرن، ب تایبەتی ژی دڤێت سەلاحەدین دەمیرتاش و هەڤالێن وی ئازاد ببن، ئێدی چو ئاستەنگی ل هەمبەر ئازادکرنا دەمیرتاشی نەماینە و دڤێت بریارا ئازادکرنا وی بهێتە دان).
ناڤهاتی د دووماهیا ئاخڤتنا خوە دا ئەو یەک ژی دیار کر، تورکیا د قەیرانەکا گەلەک مەزن دایە، رەوشا رۆژهەلاتا ناڤین ژی گەلەک خرابە، دبیت شەڕێن مەزن ژی روو بدەن، لێ ب شەڕی چو پرسەک چارەسەر نابیت، ژ بەر ڤێ یەکێ ژی ئەم دبێژین هەکە قووناغا ئاشتیێ ل تورکیا سەر بگریت دێ کاریگەریا خوە یا گەلەک باش بۆ هەموو رۆژهەلاتا ناڤین ژی هەبیت، تورکیا دشێت رۆلەکێ گەلەک مەزن ژ بۆ ئارامیا رۆژهەلاتا ناڤین بگێریت، ژ بۆ ڤێ یەکێ ژی چارەسەرکرنا پرسا کوردی گەلەک یا گرنگە.
