تورکیا پێدڤی ب دستوورەکێ نوو و دیموکراتی یە
ل تورکیا کار بۆ ئامادەکرنا دستوورەکێ نوو دهێتە کرن و هێزێن کوردی یێن باکورێ کوردستانێ ژی دیار دکەن، دڤێت دستوورێ نوو دستوورەکێ دیموکراتی بیت و هەروەسا دڤێت مافێن کوردان د دستوورێ نوو دا بهێتە گەرەنتیکرن، چونکی هەتا کورد نەگەهنە مافێن خوە پرسێن هەی ل تورکیا چارەسەر نابن.
نومان کورتولمیش سەرۆکێ پەرلەمانێ تورکیا راگەهاند، وان دەست بزاڤەکا مەزن کرینە و دخوازن ب پشتەڤانیا هەموو هێزێن سیاسی، رێکخستنێن جڤاکی سڤیل، رەوشەنبیر و وەلاتیان دستوورەکێ نوو و دیموکراتیک بۆ تورکیا ئامادە بکەن، چونکی پێدڤیا تورکیا ب دستوورەکێ نوو هەیە و گۆت: (ئەم دێ جارەکا دی ل گەل هەموو فراکسیۆنێن ناڤ پەرلەمانی کۆمبین، مە دڤێت نێرینا هەموو ئالیان ل دۆر دستوورێ نوو بزانین، نابیت هەر هێزەک بزاڤا ڤێ یەکێ بکەت دستوور ل گۆر بەرژەوەندیێن وان بهێتە ئامادەکرن، بەلکو دڤێت دستوورێ نوو یێ تورکیا دستوورەک پێشکەفتی، مودێرن و دیموکراتیک بیت و ببیتە ژێدەرێ چارەسەریێ بۆ هەموو ئاریشێن نها ل تورکیا، ژ بەر ڤێ یەکێ ژی گرنگە هەموو هێزێن سیاسی ل تورکیا ب تایبەتی ژی ئۆپۆزسیۆنا تورکیا هاریکاریا مە بکەن).
ل دۆر دستوورەکێ نوو بۆ تورکیا تونجەر باکرخان هەڤسەرۆکێ پارتا دەم ژی راگەهاند، ئەم پشتەڤانیێ ل دستوورەکێ نوو و دیموکراتی بۆ تورکیا دکەین، براستی ژی پێدڤیا تورکیا ب دستوورەکێ نوو هەیە، لێ هەتا نها زەمینە بۆ ڤێ یەکێ نەهاتیە بەرهەڤکرن، هێشتا ئەم نزانین کا نیەتا ئاکپارتیێ ژ ئامادەکرنا دستوورەکێ نوو بۆ تورکیا چیە، نابیت بابەتێ دستوورەکێ نوو ژ ئالیێ ئاکپارتیێ ڤە بۆ هندەک مەرەمێن سیاسی بهێتە بکارئینان، کورد ل تورکیا هەردەم پشتەڤانیێ ل دستوورەکێ نوو و دیموکراتی دکەن، لێ دڤێت دستوورێ نوو ببیتە جهێ رازیبوونا هەموو وەلاتیێن تورکیا و گۆت: (دڤێت هەموو مافێن گەلێ کورد د دستوورێ نوو یێ تورکیا دا بهێتە گەرەنتیکرن، هەکە ئەو یەک نەبیت کورد پشتەڤانیێ ل دستوورەکێ نوو ناکەن، هەکە دیسان د دستووری دا هەبوونا کوردان ل تورکیا نەهێتە قەبوول کرن وی دەمی دستوورێ نوو نەشێت ببیتە ژێدەرێ چارەسەریا ئاریشێن نها ل تورکیا).
چاڤدێرێن سیاسی ژی دیار دکەن، ژ بۆ دستوورەکێ نوو پێدڤیا ئاکپارتیێ ب کوردان هەیە، کوردان ژی هندەک داخوازیێن خوە یێن رەوا هەنە، هەکە ئاکپارتیێ دڤێت دستوورەکێ نوو و دیموکراتی بۆ تورکیا بەرهەڤ بکەت، دڤێت بەری هەر تشتەکێ د دستوورێ نوو یێ تورکیا دا هەبوونا گەلێ کورد ب فەرمی بهێتە قەبوول کرن، دڤێت ئێدی چو ئاستەنگی ل هەمبەر پەروەردا ب زمانێ کوردی ل تورکیا نەمینن، هەتا ئەو یەک نەهێنە کرن ئامادەکرنا دستوورەکێ نوو بۆ تورکیا ژی چو ئەنجامێن خوە نابیت، چونکی دڤێت دستوورێ نوو دستوورەک بیت کو ببیتە جهێ رازیبوونا هەموو وەلاتیێن تورکیا ب تایبەتی ژی کوردان.
