تورکیا ژ سیاسەتا ئەمریکا ل سووریێ یا دلگرانە
ب، سه‌رجان مەحمود:
ڤەکۆلەرەکێ ناڤدار یی تورکیا دیار دکەت، ئەمریکا د چەند رۆژێن بۆری دا هێزێن زێدەتر رەوانەی باکورێ سووریێ کریە و چەکێن گران ژی داینە هەسەدێ ئەو یەک بوویە جهێ دلگرانیا تورکیا، چونکی تورکیا دڤێت ئێدی ئەمریکا هاریکاریا هەسەدێ نەکەت.
عەبدولقادر سەلڤی ڤەکۆلەرێ ناڤدار یێ تورکیا و شیرەتکارێ بەرێ یێ سەرۆک وەزیرێن تورکیا راگەهاند، د چەند رۆژێن بۆری دا ئەمریکا هێزێن زێدەتر رەوانەی باکورێ سووریێ ب تایبەتی ژی حەسەکێ کریە، هەروەسا ئەمریکا چەکێن گران ژی داینە هەسەدێ و ئەو یەک ژی بوویە جهێ دلگرانیا تورکیا، بەرپرسێن تورکیا ب رێیا وەزارەتا دەرڤە دلگرانیا خوە ل هەمبەر بزاڤێن نوو یێن ئەمریکا دیار کرینە، چونکی تورکیا دڤێت ئێدی ئەمریکا چەکێن گران نەدەتە هەسەدێ و هاریکاریا وێ ژی نەکەت، ژ بەر کو بەرپرسێن تورکیا وەسا دبینن هەتا ئەمریکا هاریکاریا هەسەدێ بکەت ئالۆزیێن ل سووریێ چارەسەر نابن و هەسەدە ژی قەبوول ناکەت ببیتە پشکەک ژ لەشکرێ سووریێ.
هەمان ڤەکۆلەری ئەو یەک ژی دیار کریە، نها ل سووریێ رەوش گەلەک ئالۆزە، ئسرائیل ب هەموو رەنگەکێ ل دژی بزاڤێن تورکیا یە، ئسرائیلێ د چەند رۆژێن بۆری دا ئێرشێ گەلەک ناڤەندێن سەربازی کرینە، کو ل هندەک ناڤەندان سەربازێن تورکیا ژی هەبووینە، لێ ئەنقەرە ژ بەر هەستیاریا بابەتی هەتا نها ب فەرمی بەحسێ زیانێن خوە ل سووریێ نەکریە، ل ئالیێ دی داخویانیا چەند رۆژێن بۆری یا تۆم باراکی ل دۆر سووریێ و هەسەدێ بوویە جهێ دلگرانیا تورکیا، چونکی نها ئەمریکا وەکو بەرێ پشتەڤانیێ ل دەستهەلاتا ئەحمەد شەرعی ناکەت، ئەمریکا ژی پێ باشە سیستەمێ نوو یێ سووریێ سیستەمەک نە ناڤەندی بیت، چونکی ئسرائیل ب چو رەنگەکێ رازی نینە دەستهەلاتەک ناڤەندی و بهێز ل شامێ هەبیت و ئەمریکا ژی ژ بەر ئسرائیلێ سیاسەتا خوە ل سووریێ گوهۆڕیە و ئەو یەک ژی بوویە جهێ دلگرانیا تورکیا.
ناڤهاتی ئەو یەک ژی دیار کریە، پشتی روودانێن ل سوەیدا ئەمریکا ژ هندێ دترسیت هەکە بێی مەرج پشتەڤانیێ ل شامێ بکەت و دەستهەلاتەکا بهێز ل وێرێ هەبیت دبیت پاشی بۆ ئەمریکا ئاریشەیان دروست بکەت، ژ بەر ڤێ یەکێ ژی ئەمریکا ژ بەر بەرژەوەندیێن خوە و ئسرائیلێ پشتەڤانیێ ل دەستهەلاتەکا ناڤەندی ل سووریێ ناکەت و ژ بەر ڤێ یەکێ ژی چەند رۆژن دورزی ب رەنگەکێ ئاشکرا دبێژن ئەو دێ هەرێمەکا جودا بۆ خوە ئاڤا کەن و دڤێت هەموو هێزێن سەر ب دەستهەلاتا ئەحمەد شەرعی ژی ل دەڤەرێن وان نەمینن، ئەو یەک ژی نیشا ددەت دێ گوهوڕینێن گەلەک مەزن ل سووریێ روو دەن، چونکی ژ بلی دورزیان عەلەوی ژی داخوازا سیستەمەک فیدرالی بۆ سووریێ دکەن، ئانکو ئێدی گەلەک زەحمەتە ل سووریێ سیستەمەک ناڤەندی و ب دلێ تورکیا بهێتە ئاڤاکرن و تورکیا وەسا دبینیت ژ بەر سیاسەتا ئەمریکا رەوش وەسا لێ هاتیە.
