تورێن جڤاكی كارتێكرنه‌كا خراب ل سه‌ر ده‌روونێ زارۆیان هه‌یه
هه‌ولێر، سولین سلێمان:
نها بكارئیناێن تورێن جڤاكی بوینه به‌شه‌ك ژ ژیانا مه، لێ كارتێكرنه‌كا خراب ل سه‌ر هه‌موو چینیێن جڤاكی هه‌یه ب تایبه‌ت ل سه‌ر زارۆكی، ئێك ژ گرنگترین وان مه‌ترسیا بكارئینانا یاریێن ئه‌لكترونیه ژ لایێ زارۆكاڤه كو زیانه‌كا زۆر هه‌یه ژ بۆ چاڤ و مێشكێ وان.
ماموستایێ زانكویێ ئازاد عه‌بدولعه‌زیز بۆ ئه‌ڤرۆ دیار كر كو ل گه‌ل به‌ر ب پێشچۆنا ته‌كنه‌لوژیایێ و هاتنا هێلێن ئنترنێتێ و بوارێ ئه‌لكترونی گه‌شه‌سه‌ندنا بخۆڤه دیتی و هه‌موو بوارێن ژیانێ گرتینه تایبه‌ت ژی راگه‌هاندن و گۆت: (خێزان موبایلێن زیره‌ك و ئایپادا ژ بۆ زارۆكێن خوه دابین دكه‌ن بێی كو سانسۆرا بۆ بدانن ژبه‌ر هندێ ژی زارۆك بێ سانسۆر هه‌موو جوره یاریه‌كێ دناڤ تۆرێن جڤاكی دا بكاردئینن).
ماموستا ئازاد گۆتژی: (ڤێ چه‌ندێ ژی كارتێكرن یا ل سه‌ر جڤاكی دروستكری ب تایبه‌ت ل سه‌ر په‌روه‌رده و فێركرنێ هه‌روه‌سا ل سه‌ر ته‌ندروستیا زارۆكی وه‌كی كێمبونا خه‌وێ و نان خوارنا وی و هه‌تا دبیته ئه‌گه‌ر كو نه‌چنه قوتابخانانێ ژی و ئه‌ركێن مال ژی پشتگوهڤه بهێلن).
ژ لایه‌كێ دیڤه ماموستایێ زانكویێ ئه‌و چه‌نده ژی ئاشكرا كر كو دایك و باب د خه‌مسارن ل هه‌مبه‌ر زارۆكێن خوه راسته كۆ ئه‌ڤا نۆكه ئه‌م تێدا دژین چه‌رخێ ته‌كنولوژیایێ یه، لێ پێدڤیه دایك و بابێن هه‌ر زارۆكه‌كی پلان هه‌بن داكو كارتێكرنه‌كا خراب ل زارۆكێن وان نه‌بیت و گۆت: (پێدڤیه دایك و باب وان یاریا بۆ زارۆكێن خوه دانلود بكه‌ن ئه‌وێن مفا ژلایێ هزری و په‌روه‌ردێ و فێركرنێ ڤه هه‌ین، نه‌ك بتنێ ئه‌و یاریێن ده‌م بوراندنێ بن و ببنه ئه‌گه‌رێ ئاریشان بۆ خێزانێ).
