توماركرن
رێزان عەبدلرەحیم
دانعەمرەك دەما كو ژ رێڤەبەریا توماركرنا خانووبەران دەركەتی یێ دلخۆش بوو, وی ژ خورە هزردكر» ئوه ئەز چەند ئارام بووم «. دونیا مەرگ و مرنە .
خانیێ ئەو تێڤە دانا سەر ناڤێ كورێ خوە .
پشتی كو ژ رێڤەبەریا توماركرنا خانووبەران دەركەتی قەستا خوارنگەهەكا بچویك كر خوارنا فراڤینێ خوار و ژبو بۆرینا دەمی ل چەند پاركەكا گەریا , ل پاركەكێ سترانا جێم كاراجانن د هات لێخستن الله یار الله یار ! بەرەڤ شەڤێ ڤە ژبو چوونا مال برێكەت و ژ رەخەكێ دناڤ هزراندا بوو « پشتی مرنا مە كورێ مە دێ گەلەك ب كریاران ڤە مژویل بت، ما بۆچی كورێ من ب ئیشت (ئەزیەتێ بكێشت) .
هاتە بیراوی كو كورێ وی ب زوری بربۆ دەف دكتوری « بێنامیسی چەند زۆری كر دا من ببەت دەف دكتوری , خوزی ئەو گرنگیا د دا تەندروستیا من هوسا گرنگی ب سەرەدانكرنا مە دابا .
ژنشكەكێ ڤە ڤەما « هەرچەند بیك پێكولا ناكەت دگەل مە بژیت بەلێ … هەناسەیەكا كویر كێشا « بهێلە دێ هەما چنە بیت دەیكا نەڤیێن منە یا گرنگ باش چاڤێ خوە بدەتە نەڤیێن من و كورێ من و دا پیچەكێ خۆ ژبیرڤە ببەت گۆت ئەم ئەڤرو یێت هەیین سوباهی نینین . «
ل دەما نیزیكی مال بووی دیسا ڤەما « دێ بەرێ خوە دەینێ كا خانم دێ چ بێژیت؟ ئەز پیچەك دلگرانم كو بیك ناهێت و ناچیت بەلێ … دناڤ هزراندا زەنگا مالێ لێدا , پێكول دكر خو كەیف بكەت, دێ گەلەك باشبی پشتی ئەم دمرین كوركێ مە دێ ئارام بیت ما یا خرابە ؟
خانمێ دەروك ڤەكر , بێی گرنژینا خو تێك بدەت پرسیار ژ خانما خۆ كر .
ئەڤرۆ تو یا چەوانی خانم.
– خانمێ دولكێ گولان پێ ئاڤ ددەت نیشا كر « مادێ چكەم هەما ئەز ب گولەكێ و دووا ڤە مژویلم دا كو ببیتە كەسكاتی.
ب ژووركەت و بەردەوام بوو.
– مروڤ ل باژێری بیریا گول و كەسكاتیێ دكەت .
– بەلێ … هەلبەت ڤاران وەكی گوندی نابیت .
گرنژینەكا تەحل ب سەر ناڤچاڤێن بێدەنگ یێن خانمێ دا هات .
– چ وەكی گوندی نەبوو؟ دا چەند خوشبیت ئەگەر نوكە ل گوندی باین .
دانعەمری بۆ چەند سانیەكا تەماشەی خانما خۆ كر.
– تە هند حەژ ژ گوندی نەدكر! پار من گۆتبوو تە دا مەهەكێ بمینین « تە دگۆت ئەز دێ بیریا نەڤیێت خۆ كەم.
خانمێ رویێ خوە بەر ب گولان ڤە زڤراند .
– ما چ دزانم ئەز, وەختێ هزرێ ل سەر دكم ئەز خەندقم ل ڤاران, مرۆڤ بیریا وان جها دكەت یێن زاروكینیا خۆ لێ بۆراندی, بێریا پیاسێن دبن داراندا دناڤ باخچەیاندا دكەت.
– وەی خودێ! تەمام خانم دێ چین, تنێ تو بخوازە, پیچەك كەش و هەوا و گەرم ببیت دێ چین.
– كی دزانیت دێ گەنكی كەش هەوا گەرم بیت, ما شەرتە مرۆڤ خۆ بگریت؟
– ئەی خانم، هندە سالە تو هەڤژینا من، ئەز نەشێم بێژم دروست د تە گەهشتم, رۆژەكێ تو دبێژی ئیلا ناچینە گوندی و رۆژەكێ دبێژی دا نوكە بچین, بهێلە دا بێژمەتە كا ئەڤرۆ چ چێبوو.
– خانمێ ب ترس ڤە بەرێ خوەدا هەڤژینێ خوە .
– چبوو؟ تە كورێ مە دیت؟
– نە, مادێ لكیڤە بینم!
– ل سەر كورسیكا خۆ رینشتە خوارێ و كاغەزا تومارێ ژ پاخلا خوەدا ئینا دەر.
– تو دزانی ئەڤە چی یە؟
– خێربت؟
– خانم, ئەم نزانین سوباهی دێ چ چێبیت, ئەگەر رۆژا مە هات و ئەم بمرین دا كو كورێ مە دەری ب دەری نەگەریێت، من تاپۆیا خانی دانا سەر ناڤێ وی.
– ئەو ل چاڤەرێی كارڤەدانا هەڤژینا خۆ بوو, ئەو گرنژینا تەحل یا ل سەر دێمێ ژنكا وی هزرا كەنیێ كر. خانما وی ب وەكی پستەپستێ گۆتی؛
– كورێ مە ژی ئەڤرۆ بەری نیڤرۆ هاتبوو ڤێرێ.
– یا، هەی بێ وەفایی. تە نەگۆتێ چما ئەڤە دەمەكێ درێژە تو نەهاتی, من نەدگۆت تە دا كو تو بخەم نەكەڤی، بەلێ من دەست ب تۆرەبوونێ كربوو ژبەركو ئەم یێ ژبیركرین, نەڤیێن مە ئینا بوون.
– موراد ئینابوو و وی ژی بەردەوام دگۆت ئەز بێزاربووم دابچین.
– وەی بێنامیسی, خۆزی ب شەڤ هاتبا دا من ژی دیتبا, چنینە. خێربوو بۆچی ب رۆژ هاتبوو؟
– هەر چەند ئاڤا د دولكێ خانمێ دا خلاس ببوو وەكی ئاڤدانا گولان راوستابوو كاغەزا ل سەر مێزێ نیشا دانعەمری دا .
– ئەڤ كاغەزە یا ئینا.
– دانعەمری هەست ب لەرزاتیەكێ كر دناڤ دەنگێ خانما خۆ دا لێ پشت راست نەبوو, پێكول دكر بێی ژناڤبرنا خۆشیا دناخێ خۆ دا ژدەست بدەت دەستێ خو درێژكرە كاغەزا ل سەر مێزێ، دیت كو بریارا دادگەهێ یە.
– ژنكا پیرەژن نەڤیا هەڤژینێ وێ چاڤێن وێ یێن سۆر ببینت، دەستێ هەڤژینێ خۆ گرت دا ل سەر قەنەپێ روینشتنە خوار و دوبارە بەرەڤ گولان ڤەچوو, دانعەمری بەرچاڤكێن خو ئینانە دەر و هێدی هێدی ناڤەرۆكا كاغەزێ خواند.
– ژبەر پیربوونا وی و لجه نەمانا ئەقلێ وی كو نەشێت بارێ خۆ یێ ئابۆری پرێڤە ببەت كو ب راپۆرتا نۆژداری هاتە پەسەندكرن كو بریار هاتیە دان مال و مولكێ وی یێ دهێتە ڤەگوهاستن و نەهێتە ڤەگوهاستن ژلایێ میراتگرێ فەرمی، كورێ وی سلێمانی ڤە بهێتە پرێڤەبرن.
– لاپەرا فەرمی ژ دەستێ دانعەمری هێدی خار بوو و ستوێ وی چەمیا و بوش بوش ل لاپەری مەیزی. خانما وی پشتی چاڤێن خۆ پاقژكرین ژ گولان دویركەت و هاتە دەف وی. دەستێ هەڤژینێ خو یێ ب لەرزین گرت, دانعەمری زانی كا بۆچی كورێ وی دڤیا وی ببەتە نۆژداری, پێكول دكر ئێشانا د دلێ خۆ دا براوەستینیت:
– ئەڤە سێ سالە ئەم نەچوینە, كا خانیێ گوندی د چ حال دایە.
– ما دێ چلێهێت رحامن, د رۆژەكێ دا دێ پاقژكەم.
– دوێ مالێ دا چۆكێن تە سار دبوون.
– ژنكا دانعەمر سینگێ خوە یێ تەنگبووی ب سڤكی دەوساند « هزر كر كو ساربوونا دلێمن خرابترە ژێ«.
– – خەما نەخۆ من سار نابیت … من سار نابیت.
– تە دگۆت سوباهی بچین؟
– – كەیفا تەیە جامێر.
– – ئەگەر كەلوپەلان بكەینە د تەكسیێ دا, ئەم دێ ب دوماهیك پاسارا گەهین.
– – بلا. ئەو بخۆ چ باش و خراب كەلوپەل یێ ل گوندی هەیین, ئەز دێ نوكە خۆ ئامادە كەم .
– – خو ئامادە بكە. ڤی لاپەری و دگەل تاپوێ پێكڤە دانە سەر مێزێ لدەمێ كورێ مە دهێت دا ل مە نە گەریێت.
– دانعەمری دخوەرا هزر دكر دونیا فانی یە و خودێ یارە « ژنكا دانعەمر بلەز و بەز خۆ ئامادە دكر دڤیا بچیت بەری ئێك بهێت. جلكێن خوە دكرە دناڤ چانتەكێ دا لدەمێ وێنێن ب دیواران ڤە كۆم دكر، بێهنەكێ ل وێنێ كورێ خو مەیزی و راكر و ددەمەكێ دا لێڤەبوو وێنێ كورێ بكەتە دناڤ چانتەی دا، وێنە بەروپشت دانا سەر وان لاپەرێن ل سەر مێزێ و هێلا, ل دوماهیكێ ئەو پوتا بچویك ژ دیواری ڤەكر و ماچیكر ئەو پوتا بۆ نەڤیێ خو یێ مەزن چێكری ب رەنگێ شین نەخشاندی، پشتی بۆ بچویك بووی بۆ بیرهاتن راكربوو, هێدی هێدی ئەو رۆندك پاقژدكر لدەمێ پوتێن شین ل سەر وێنێن خوە دناڤ چانتەیدا ددانا .
