توندوتیژیا ژنان: کچێن ڤی سەردەمی عاشقێن بەریکا کۆڕکینە و کۆڕان ژی ب تنێ لەشێ وان دڤێت
ئه‌ڤرۆ نيوز:
رێڤەبەریا گشتیا بەرەنگاربوونا توندوتیژیا دژی ژنان ئاشکراکر، کو رێژەیا بەردانێ ل ھەرێما کوردستانێ دزێدەبوونێ دایە و ھەر سکالایەکا ھەڤژین ل سەر ئێک تۆماردکەن مۆبایل تێدا ھاتیە تۆمارکرن، گۆتژی داخوازیێن ژنا و قەیرانا دارایی ئەگەرن بۆ زێدەبوونا بەردانێ، راوێژکارێ بەرەنگاربوونا توندوتیژیێ دبێژیت: کچێن ڤی سەردەمی عاشقێن بەریکا کۆڕکێن نوکەنە و کۆڕان ژی ب تنێ لەشێ وان دڤێت.
حاجی عزەدین، راوێژکارێ رێڤەبەریا گشتیا بەرەنگاربوونا توندوتیژیا دژی ژنان ل ھەولێرێ بۆ رۆژناما ئەڤرۆ گۆت” رێژەیا بەردانێ ل ھەرێما کوردستانێ سال بۆ سالێ یا دزێدەبوونێ دایە و ھەتا نوکە جڤاتا دادوەریا ھەرێما کوردستانێ تنێ ئامارا بەردانێ یا نەھە ھەیڤێن سالا بۆری بەلاڤکریە و ئامارێن دووماھیا سالا بۆری و چوار ھەیڤێن ئەڤ سالە بەلاڤ نەکریە، پێدڤی بۆ دووماھیا سالێ ئامار بەلاڤکربان، تنێ د نەە ھەیڤێن سالا بۆری دا 6882 حالەتێن بەردانێ ل ھەرێما کوردستانێ ھاتینە تۆمارکرن د ھەمبەردا 31988 حالەتێن ھەڤژینیێ ھەنە، گۆتژی گۆرەی ئەڤێ ئامارا فەرمی سالا بۆری ھزار حالەتێن بەردانێ زێدەتر بووینە ژ سالا 2014 ێ، بێگومان ئەڤ سالە ژی ئەگەر ئامار بھێنە بەلاڤکرن دێ رێژەیا بەردانێ زێدەتر بیت ژ سالێن بۆری، مە ھەوێن ھشیارکرنێ ھەنە، لێ مخابن ژبەر قەیرانا دارایی ھەوێن ھشیارکرنێ رێڤەنەچووینە، پتریا حالەتێن بەردانێ ئەو کەسن یێن د ژیەکێ زوودا ھەڤژینی پێکئینای، بۆ نموونە 35%ێ بەردانا وان ھەڤژینایە یێن دژیێ 15 سالیێ دا بۆ سەری، دیارکر ژی کو ژلایێ قانوونیڤە ئەگەر کچەک گەھشتە ژیێ 16 سالیێ ب رازیبوونا کەس و کارا دێ ھێتە مەھرکرن، لێ ئاریشە ئەوە وێ شیانێن بەرپرسیاریا رێڤەبرنا مال و مێرا نینن.
زێدەتر گۆت: ئەگەرێن بەردانێ ل ھەرێما کوردستانێ زۆرن، بەلێ یێن سەرەکی پێکھاتینە ژ قەیرانا نوکە یا دارایی کو کاریگەری کریە سەر رەوشا ژیانا وەلاتیان و داخوازیێن ژنان بۆ زەلامی د مشەنە ئەڤە ژی ئەگەرن بۆ جۆدابوونا ھەڤژینان، چۆنکو دڤێ رەوشێ دا زەلام نەشێن وەکو پێدڤی داخوازیێن ژنا بجە بینن. ناڤھاتی ئاشکراکر ژی کو ھەر سکالایەکا دھێتە تۆمارکرن چو گومان تێدا نینە ناڤێ مۆبایلێ تێدایە و ھەردولا ئێکودو تاوانبار دکەن ب ئەگەرێن بکارئینانا مۆبایلێ.
راوێژکارێ رێڤەبەریا گشتیا بەرەنگاربوونا توندوتیژیا دژی ژنان دا زانین ژی کو خالەکا زۆرا گرنگ بۆ جۆدابوونا ھەڤژینان بۆ دەستێوەردانا کەس و کارێن وانا ڤەدگەڕیت، چونکو د بنەڕەتدا زۆلم ل ئەڤان کچ و کۆڕان دھێتەکرن یێن دژیەکێ زوودا دچنە د پڕۆسێسا ھەڤژینیێ دا و کەس و کار ددەمێ ھەبوونا ئاریشان دەستێ خوە تێخن ناڤا ژیانا وان، گۆتژی نوکە ئاریشەکا دی پەیدابوویە ئەو ژی جۆداھیا ژینگەھا ھەڤژین تێدا مەزن بووین، مخابن کچێن ڤی سەردەمی عاشقێن بەریکا کۆڕکێن نوکەنە و کۆڕان ژی ب تنێ لەشێ وان دڤێت.
