تو ب گولەكا سۆر ڤە دچووی

عبدولڕەحمان بامەرنی

تو گولەك بووی دناڤ باخچەی دا
ژ گولان، تو گولەكا رەنگ سۆر بووی
ژ رەنگێ سۆر، من حەز ژ ھەر تشتی كر
شعرێ و من شعر بۆ بەژن و بالا تە ڤەھاندن
شعر ب تلیا تری
تریێ رەش
ژ تریێ رەش، بەرەڤ شەرابێ ڤە چووم
شەرابەكا سۆر
ژ سۆری ژی، رەنگێ تۆخ و
من شعر بۆ تاڤ زەركا ئێڤاریان د نڤیسین
ل ئێڤاریا چاڤەرێی تە دبووم و
رۆژ ئاڤا دبوو و شەڤێ پەرێن خوە
ب سەر عەردیدا دكێشان
بتنێ ئەز نە
ئەز عاشقی ھژمارتنا ستێران دكرم
و ئەڤە ستێرەك و ئەڤە دو ستێر و ئەڤە سێ ستێر و
بیرا من ل ھژمارتنا ستێرا ژمارە دەھـ ناھێت
خەو دكەڤتە چاڤێن من
بێژە من، تە چ نھێنی دگەل وێ ھژمارێ ھەیە؟
بێژە من، وێ ھژمارێ چ سەوداسەری ھەیە؟
ماندیبوون ب ھەر تشتێ من ڤەدیارە
ئەز ب لێگەڕیانێ ڤە وەستیام
چ دی نەشێم نھێنیێن تە ھەلگرم
ئەز پێدڤی بایەكێ شینم،
بایەكێ خولیكی بیت، بایەكێ سۆر بیت
ھەما چ با بیت
بھێت و ھەمی تشتی دگەل خوە راكەت
كاغەزێن من
یێن ھەمی ژ تە
خوە كاغەزێن قرمچاندی ژی
ئەڤێن د سەلكا گلێشی دا ل بن مێزا من
ئەڤێن نەشیایین شیراڤێ ژ سۆراتیا تە ب مێژن
ئەرێ تو دزانی یان بینمە بیرا تە
تو جوانترین گولی
جوانترین گول دناڤ ڤی باخچەی دا
جوانترین شعرا من
شعر و گول
ل دەستپێكێ پەیڤ بوون
پەیڤ بوونە شعر و شعرێ رەنگێ گولێ گرت و
گول بوو بالندە و ل عەسمانان بوو ستێر
ستێران رۆناھی دان و من شعر پێ نڤیسین
بالندان دادان ژبیركرن و
دناڤبەرا دادانێ و فڕینێ دا، تشتەك ژ شكەست و
ل دووماھیێ ھەر تشت شكەست..

کۆمێنتا تە