تو د چاڤێن من دا شین دبی و ئه‌ز ژی ل به‌ر رووباری شه‌وبۆ
(1)
به‌ری نوكه.. ستێر ب دیتنا من گه‌ش دبوون
هه‌یڤ دگرنژی، بوهارێ داددا سینگێ من
باخچه‌یان گول هه‌مبێز دكرن.
به‌ری نوكه.. ژیان هێشتا ساكارتر و شه‌هیتر بوو
جڤینكا مه خوینگه‌رمتر و كه‌هیتر بوو
هینگی هه‌ر رۆژ… من تو ددیتی و
ته ب ئاوڕێن خوه یێن سیحری
ره‌ز و هه‌یڤ و ستێر دكه‌ناندن
هه‌می دنیا مولكێ من بوو.
به‌ری نوكه.. مه خه‌ون هه‌بوون، خه‌ونێن خاكیی
مه پلانێن هه‌ڤدیتنه‌كا درێژ هه‌بوون
هه‌ڤدیتنێن ب دلپاكیی
لێ ل حه‌وشا مه بوو مژ و به‌فرێ لێكر!
ل رۆژه‌كا ب سڕ و سه‌قه‌م
هه‌می ستێر و هه‌یڤ و باخچه
ته‌ڤ پلان و جڤینك و ژینا هێشتا مای
د رووباری دا جه‌مدین
یان ب عه‌شقه‌ك زێده‌ڕوویی ڤه خه‌ندقین..!
*
(2)
د ناڤبه‌را قه‌یرانه‌كێ و ئێكا دی دا
ئه‌ز هه‌رده‌م بیری یا ته دكه‌م
ته گوپالێ مفره‌قێ هه‌لگرت و گوپال
ب وه‌غه‌رێن ته یێن دووره ده‌ریاڤه نه‌حه‌لیا
دوهی سپێدێ.. ده‌وام نه‌بوو
من نامه‌یه‌ك ب ماسێنجه‌رێ ژ ته ڕا شاند
چیایه‌كی تو د خوه دا هه‌مبێز كربووی
بلبله‌كێ شه‌یدا و خه‌ریب..
سترانه‌كا ئه‌ڤینیێ ژ ناخه‌كێ ده‌رزی دخواند
به‌لگێن چناران هاواركر: پا كانێ تو؟
ئه‌ز كه‌ڤره‌كێ بێده‌نگ و مات، ب سینگێ چیای ڤه
نه‌خه‌وتوو
ته‌ڤ له‌شكرێن ئه‌سكه‌نده‌ری، ب جه‌بلخانه‌ڤه هاتن
له‌شێ من قان قان داگیركر
لێ بڕیارا من هه‌ر ئێكه و نابیته دو
من تو دڤێی و دێ هه‌ر تو ڤێی..
ئه‌ی رووبارێ هه‌ر سه‌ره‌رۆ
ل به‌ر لێڤێن وی ئه‌زه‌كم بوویه شه‌وبۆ.
*
(3)
ئه‌ڤه چه‌ندین پاییز بۆرین.. هێشتا بێهنا ته یا فڕی
ژ باخچه‌یێ مالا مه دهێت
هێشتا گه‌ردێن هه‌ناسا ته
ل هنداڤ سه‌رێ من سترانێن چووچكانه
هه‌ر شوسته‌یێ د رێكا من دا ب دیتنا ته‌ڤه سه‌رگه‌ردانه
هه‌ستێن من یێن دۆتی و خۆپان
ب دارا ژینێ ڤه دوه‌ریێن و د شه‌ڤستانا یادا ته‌دا
گه‌ش چرانه
تو.. ئه‌وێ نیڤه‌ك ب ئه‌نیا من ڤه نۆژ و
نیڤه‌كا دی، ب عه‌رشێ خودێ ڤه بووی تیرۆژ
ئه‌وێ د دلێ من دا خوین و
ب ده‌همه‌نا گه‌ردوونێ ڤه بوویه نیڤین
ئه‌ز یێ ل به‌ندا سلاڤه‌كێ، ژ ده‌ف ته بهێت
د خه‌و دا بیت ژی، هه‌ر من دڤێت!
*
