تو زوی نەگەهشتی
شیرین ئەحمەد مزووری
وەكی هەر جار؛ ژ خەو رابوو ڤە، لێ ڤێ جارێ هزرێن خۆ كرن و بیرێن بەرێ هاتنە هزرا وی، وەختێ هەڤژینا وی سپێدەهیا دل نەددا ژ خەو هشیار كەت و ب بێ دەنگی كارێ مال دكر؛ دا چ دەنگ نە چنە وی یان دەمێ هشیار دبوو تێشتا وی یا دروستە. یانژی كەفتبا د خەمەكێ دا، ئەوێ ب سینگەكێ بەرفرەه خەما وی سڤك دكر و بۆ وی وەكو دایكەكێ بوو.. و ژبلی كارێ زارۆیان ئەو ب ئەركێ بابێ رادبوو و گەلەك كارێن باش ل دەف هەڤژینا وی هەبوون. ئەڤە چەندین سالە ب نهێنی ڤە خیانەتێ ل هەڤژینا خۆ دكەت و چەند دا چیتە مال؛ هەڤژینا وی چ قوسیری لێ نە دهێلان و ل دەمێ ژ ڤان هزرا هشیاربووی بەرێ خۆ دا ئالییێ خۆ وەكی هەر جار ئافرەتكا ب رەخ ڤە نڤستییە، دلێ وی ب خەم كەت وگەلەك دلێ وی ما ب هەڤژینا وی ڤە. پشتی چەندین سالان، بەلكو ئەڤە جارا ئیكێ یە هۆسا هزرێن وی د سەری دا كۆم بوون و ب پەشێمانی ڤە بریار دا ژیانا خۆ بگوهۆڕیت و ڤان كاران بهێلیت. هەر جار ل گەل ئێكێ و ژ بلی نەرازیبوونا خۆدایێ مەزن و ڤێ جارێ بڕیارا وی ئەو بوو كو بچیتە مالا خۆ ب ئەنیا هەڤژینا خۆڤە ماچی كەت و نەزڤڕیتە ڤان شاشیان.
ل ڤی وەختێ خەریبیەك ل دەف پەیدا بوو هند ژ هەڤژینا خۆ خەریب بوو، دێ بێژی چ جاران هەڤژینا خۆ نەدیتیە وی ب خۆ ب خۆ دكرە كەنی، دا بێژیت: ئەڤە من خێرە هۆسا هەڤژینا من ل بەر دلێ من شرین بووی. ڤێجا رابوو جلكێن خۆ كرنە بەر خۆ و ب لەز ل ترومبێلا خۆ سیار بوو و بەرەف مال چوو دا بۆ هەڤژینا خۆ سۆپرایزەكێ چێكەت كو هەڤژینا خۆ و زارۆیێن خۆ ببەتە گەریانەكی. د وی دەمی دا هزرێن خۆ دكرن كا چ پەیڤێن جوان هەنە دا بۆ هەڤژینا خۆ بێژیت، ئانكو ب چ رەنگان تشتەك هەیە كو رازی بكەت، دەمێ گەهشتیە مال و دەرگەهێ مال ڤەكری دیت، زارۆكێن وی دنڤستینە و هندی ل هەڤژینا خۆ دگەریێت… نابینیت، چوو ژۆرا نڤستنێ نامەیەك دیت. دەمێ خواندی ئێكسەر چاڤێن وی پڕی رۆندك بوون و دكەڤتە سەر چۆكێن خۆ و كرە گری و نامەیا هەڤژینا وی ئەڤە بوو:
(خۆشتڤیێ من، ل من ببۆرە، نەشێم ل گەل تە تمام بكەم، ژ مێژە من دزانی كو تەخیانەتا ل من كری، من هزركر كو بەلكی تە بگوهۆڕم و ئەز نەشیامە تە، ئەمانەتی تە زارۆكێن تە، پشتا خۆ نەدە وان وەكی تە پشتا خۆ دایە من، بلا بەس ئاخفتنا پێغەمبەرێ مە سلاڤ لێ بن ل بیرا تە با دەمێ گۆتی (رفقا بالقواریر)، ئانكو قەواریر شویشەنە، ئافرەت وەكی شیشەینە دەمێ دشكێت نازڤڕیت و هەتا نوكە یێ ل هەڤژینا خۆ دگەریێت چ چارەنڤیس بۆ نینن.
