تۆزا یاریەكێ
یوسف عەلی صەفار
ل گۆندەكێ ڤەدەر، گۆرەپان ژ قەرەبالغێ ببوو مەیدان، هەر كەسەك بۆ خۆ و ژبۆ خۆ یاریدكرن، گرنژین یار و یاوەرا وان بوو. تۆزێ هەمی رەوش نخافتبوو، گێلەشۆك بوو. گۆرەپان ب بەرەهیركان زنجیری و بادایی بوو، رەخێ گۆرەپانێ كۆمەكا زارۆكیێن كچ هەبوون، ئەوان بیك ژ تەقنێ چێدكرن،. ئێڤاریەكا درەنگبوو دەمێ چوونا مالبوو، تۆز ژ گەرمێ بلندتر لێهاتبوو، هێشتا نەبوویە تاری. قەلەرەشكێن نخافتی گۆرەپان و رەخێ گۆرەپانێ ئالیستن، زارۆك بژالەكرن، كەسەك ل كەسەكێ نەبوو خودان، ژێهەلی هەمی بوونە ئەڤرازی، نالین كەڤتە واری. بەلێ زارۆك حێبەتی مان، هەما ئەوژی ل گەل تەڤایێ سەرئەڤرازبوون. گۆرەپان كاڤلبوو، بویكەكا ژ پاتان چێكری ب تەقنێ خەملاندی، پرچا وێ ژ تۆزێ ڤەمایی ل رەخێ گۆرەپانێ ماندبوو، ڤەما، دناڤ گەرمێدا سارگرتیبوو. ل هنداڤی گۆرەپانێ زارۆكەك هێشتا نەگەهشتی ئارامگەهێ بیر ل بویكا پاتەیی كر، لێزڤری و نەهێلا ب تنێ و ژۆردا قەستا رزگاریكرنا وێكر، راكر و قەستا ژێهەلیكر، بەلێ رێك لێبوو تۆفان، هەبوون لێبوو قەیران. ئەو و بویكا خۆ بوونە نێجیرا قەلەرەشكێن بێ وژدان. ترۆمبێلەكا رەش وەكی جل و بەرگێن وان یێن رەش لبەر سینگێ زارۆكا بجوویك و بویكا پاتەیی راوەستیا و دو قەلەرەشكیێن تۆزگرتی زارۆك هەلگرت و كرە دترۆمبێلێدا چاڤێن زارۆكێ مانە ل پشت خۆ، هند نەترسیا ژ وان كەسان هندی خەما بویكا خۆ هەلگرت. جارەكا دیژی ژ دەستدا، بویكا پاتەیی جارەكا دی ما د تۆزێرا، زارۆكا بچویك ما پەریشان، نزانیت چبكەت، هەما هەر بەرێ خۆدا وێ پیچكا رۆناهییا د پەنچەرا بچووكا ترۆمبێلا رەشدا بەلگی رزگاركەرەك بویكا وێ بگەهینتێ. ترۆمبێل هەر چوو، دەنگێ تەقێ گوند هەمی پێچا، جار جار تەقەكا زۆر ژ ترۆمبێلێ دهێت و دەنگێ قیژێن و نالینێ ئەسمان داگیركرییە. ل جهەكی ترومبێل راوەستیا، د ناڤ پێێن وان قەلەرەشكاندا چاڤێن وێ ب دیمەنێ گۆلەبارانكرنا مرۆڤان كەت، قەلەرەشكەك لێ زڤری و بەرێ خۆدایێ كو خۆ و ترۆمبێل یێن تەركرین و كەسی سەرێ خۆ هەژاند و گۆت:
-»لا تتحركی».
زارۆكێ ژ شەرماندا هایژ چ نەما و سەرێ خۆ چەماند.
ویل ویلا قەلەرەشكان هات و هەمیان قەستا ترۆمبێلێن خۆ كر و دەنگێ تەقێ دبەرخۆ و ل پشت خۆ هێلا. ترۆمبێل هەر چوو. زارۆكا بچووك یا د ئاڤێرا ژ شەرماندا بەرزەبووی، هند ژ وان كەسان نا ترسیت هندی یا شەرمدكەت. ترۆمبێل راوەستیان، كەسەكی زارۆك پالدا و ژ ترۆمبێلێ دەرئێخست و گەهاندە هۆلەكا مەزن و زارۆك دەڤ و دەڤ هاڤێتە دژۆرڤە، ب ناڤ كۆمەكا كچ و ژنیێن ئۆلێ خۆ كەڤت، بەلێ كەسەكێ خۆ لێ نەكرە خۆدان، كەسەكێ نا نیاسیت.
دەنگێ زەلامان بلند بوو و دەنگێ ژنان د كەڤلۆژانكێ خۆدا وندابوو. جنگلێ زارۆكێ ددەستێ كەسەكێ سەرەدایە و زارۆكێ یا ددویڤ خۆرا دكێشیت، زارۆك ژی وەكی میهێ و بێ دەنگ یا برێڤە دچیت، زارۆك ژناڤ كۆمێ دەركەڤت. زارۆك ددلێ خۆدا كەیف خۆشبوو، بەلێ د ناخێ خۆدا بەرزەبوو. رۆناهیێن تیژكیێن رۆژا سحارێ ژ گەرماتیێ دەستپێكر، زارۆكا بچوویك دگۆژیەكێ مالەكا تۆزگرتیدا یا تۆزگرتیبووی، پشتی چەند شەڤەكێن مال وێرانكەر كەسەكێ سیس لبەردەرگەهێ مالا تۆزگرتی راوەستیاییە و پستەپستەكێ ل گەل زەلامێ سەرە دكەت. پاشی سیسویی جنگلێ زارۆكێ گرت و ل گەل خۆ بر. زارۆك ل چار جهان هوسان هاتە ڤەگۆهاستن، هێشتا نزانیت چ مەسەلەییە. دەنگێ تەقەكا مەزن هات، دەنگێ فرۆكان نێزیك دبوو، زارۆكێ هند دیت كو كۆمەكا سەربازیێن ب زمانێ وێ دئاخفن ل هنداڤی سەرێ وێ راوەستیان وكەسەكی گۆتێ:
-ناڤێ تە چییە؟
زارۆكێ گۆت:
-ناڤێ من غزالە
وی سەربازی دەستێ خۆ درێژ كر و گۆت:
– وەرە دێ تە بەمە دەڤ مالباتا تە.
زارۆك ڤەجنقی و چوو د كۆژیەكێ تۆزگرتیدا و گۆت:
-من نەبەنە چ جهیێن تۆزگرتی!
د قەرەبالغەكا مەندەهوشدا، كچەكا ب خەمل و بلند، جلكیێن دەرچوونێ لبەردانە و دناڤ كۆمەكا مرۆڤێن ب گرنژینەڤە سەمایێ ل گەل گولێن باغچەیی دكەت. موبایلەك ددەستێ وێ دایە، دەستێ وێ ب دوكمەكێ كەڤت شاشە رۆهنبوو، لسەر موبایلێ وێنەكێ بویكەكا تۆزگرتی یا ژ پاتەیی چێكری و ژ تەڤنێ خەملاندی لسەر شاشا موبایلا وێ هەبوو.
