تۆفان ئارت: بتنێ پشتەڤانیا هونەرمەندێن بناڤودەنگ دهێتە کرن
زاخۆ، دلۆڤان هالۆ:
هونەرمەندێ گەنج یێ باژێڕێ زاخۆ تۆفان ئارت د دیدارەکێ دا بۆ ڕۆژناما ئەڤرۆ دیار کر کو فەقیری و غەریبی و د ناڤ بنەمالێ دا مرۆڤی هونەرمەند و هۆزانڤان هەبن، یان ژی ئەگەر مرۆڤی کێماسیەکا جەستەیی هەبیت کارتێکرنێ ل مرۆڤ دکەت کو مروڤ ببیتە هۆزانڤان یان هونەرمەند، یا من ژی فەقیری و بنەمالێ کارتێکرن ل من کرن کو ببمە هونەرمەند چونکی مام و پسمامەکێ من هۆزانڤان بوون و برایێ من ژی مۆزیکژەن و ئاوازدانەرە، لەوما من هونەر ژ وان وەرگرتییە.
ناڤهاتی ئاماژە ب وێ چەندێ ژی کر کو برایێ من یێ مۆزیکژەن زەمان محەمەد و ڕەحمەتییێ مامێ من هۆزانڤان ئەحمەد عەرەب سلێڤانەیی هاریکاری و پشتەڤانیا من کرییە، و خێزانا من ژی پشتەڤانە و هەر جهەکێ ئەم دچینێ داخوازێ ژ من دکەت کو بۆ سترانان بێژم، کارێ من یێ سەرەکی ئەز مامۆستامە ل قۆتابخانا جوودی یا بنەڕەت، لێ هونەر حەز و خوەشییا منە، و ب هونەری مرۆڤ دووری خەم و ژانان دبیت، و داهێنانێ دکەت و تشتەکێ نوو ل ڤێ ڤێ جیهانێ زێدە دکەت، و من یا خوە فێری گۆتنا هەمی جۆرێن سترانان کری بۆ نموونە ئەز دشێم سترانێن ئەیاز یۆسڤی بێژم و د هەمان دەم دا دشێم سترانێن شاهێ بەدوو ژی بێژم و سترانێن ڕاپ ژی بێژم، ئەز گەلەك حەز ژ شێوێ سترانێن کوردێن باکوور دکەم.
گۆت ژی:»بەهرا پتر ئەز ب سروودا ئاینی یا ڕەمەزان هەیڤا خێرانی و ئەڤ جانە بۆ تەیە بەرنیاس بوویمە کو هەر دوو ل سالا2006 ب شێوێ کلیپ من بەلاڤکرینە، و ل دەستپێکێ پەیڤێن سترانێن من یێن گەلەك هۆزانڤانان بوون ب تایبەت هۆزانێن مامێ من ڕەحمەتی هۆزانڤان ئەحمەد عەرەب سلێڤانەیی بوون، و ئاواز یێن برایێ من زەمانی بوون، لێ نوکە ژی ئەز بخوە سترانان چێدکەم، و من نێزیکی ٢٠ کلیپ و ١٠٠ سترانان من هەنە، ژبەری چەندەکێ ژی من سترانەكا نوو بناڤێ دین و هاربیم کەتم چۆلان من بەڵاڤکرییە، من چەندین سترانێن نوو ل بەر دەستن، لێ چ کەس گۆهێ خوە نادەت سترانێن باش، چونکی ڤان تۆڕێن جڤاکی وەکو ئینستگرام و تیکتۆکی خەلکێ مە یێ مژوول کری ب تشتێن تامسار ڤە».
زێدەتر ژی گۆت:»بتنێ پشتەڤانیا هونەرمەندێن بناڤودەنگ دهێتە کرن، و یێن دی ژی دهێنە پشتگۆهـ هاڤێتن، ئەم نابێژین بلا پشتەڤانی ل وان نەهێته کرن، لێ ئەڤێن دی ژی هونەرمەندن و پشتەڤانی ل وان ژی بهێتە کرن دێ بناڤودەنگ بن، هندەك یێن هەین مرۆڤی نەڤێت گۆهێ خوە بدەتێ لێ یێن بناڤودەنگ بووین، لەوما دڤێت لیژنەیەك بهێتە دانان کو پێك بهێت ژ هونەرمەند و هۆزانڤان و ئاوازدانەران و هەلسەنگاندنا دەنگێ هونەرمەندان بکەن و یێن دەنگێن وان نەخوەش بێژنێ چێنابیت هوون سترانان بێژن».
