تۆپخانەیا توركیا ب سەدان دۆنەمێن رەز و باغێن وەلاتیان سـۆتن

ئامێدیێ، مەحمود نهێلی:

ژ ئەنجامێ بوردۆمان و توپبارانكرنا دەوروبەرێن گوندێ گوهەرز و بلاڤە و سەرگەلێ د چەند رۆژێن دەربازبووی دا، گۆرستانەكا كەڤنار و پتری 50ی دۆنەمێن ڕەز و باغێن گوندیان و ب سەدان دۆنەمێن دارستانێ هاتنە سۆتن.
ئەحمەد گوهەرزی، هەلبژێرێ گوندێ گوهەرزێ بۆ رۆژناما ئەڤرۆ دیار كر، بوردۆمانا ڤێ داویێ بوویە ئەگەرێ زیانێن زۆر بۆ خەلكێ گوندێن دەڤەرێ، ب تایبەتی ژی گوندێ گوهەرز و گۆت: «ژ ئەنجامێ توپبارانا بەری دو رۆژان گورستانا كەڤنارا گوندی، كو دارێن بەری چەندین سالان تێرا بوون، هاتنە سۆتن و گۆرستان هەموو ژناڤچوویە، دیسا هەر د ڤێ بوردۆمانێ دا ئاگر بەربوویە رەز و باغێن وەلاتیان و د ئەنجام دا نێزیكی 50ی دۆنەمێن رەز و بیستان و ب سەدان دۆنەمێن دارستانێ هاتینە سۆتن».
ئەحمەد گوهەرزی دیار ژی كر، ژ ئەنجامێ شەرێ د ناڤبەرا گەریلایێن پەكەكێ و لەشكرێ توركیا دا ب ملیۆنان دیناران زیان گەهشتیە خەلكێ گوندێ وان و ئێدی ب چ رەنگەكی دەستێ وان ناگەهیتە دەرامەتێ وانا و گۆت: «داخوازێ‌ ژ لایەنێن پەیوەندیدار دكەم رادەیەك بۆ ڤێ بوردۆمانێ و ڤی شەری بهێتە دانان و خەلكێ مە بهێتە قەرەبووكرن، ژ بەر كو گەلەك زیان گەهشتینە مە».

کۆمێنتا تە