تۆڕه
محه‌مه‌د چه‌لكى
چه‌قچه‌چا ده‌نگێ تزبیێن وى، لگه‌ل ئۆف ئۆفێن وى، ئه‌فه‌ندیێ بره‌خڤه تۆڕه كر. ـ ئێ مامێ عه‌لۆ: تۆ نابێژى ته خێره، هۆسا كیفێن ژ ته دهێت، دێ بێژى كێچێن به‌ربووین، بن كه‌فشێن ته؟ ـ دێ بێژى تۆ سیبه‌را منى، مامۆ ما ته چ كار و كه‌سپ نین! هۆسا مایه بلێڤا منڤه! ـ دیاره كه‌رێ ته پیسێ كه‌فتى كۆڕێ! ـ ئه‌رى ما ئێك لڤى وه‌ڵاتى مایه، كه‌رێ وى نه‌كه‌فت بیت … ؟ ـ هههه نه‌یا بكه‌نیه.. ـ كا ئێكى بێژه، ژبلى ئه‌وێن گر نه‌هێلاین، ئه‌م بێهنا خوه لێڤه‌ده‌ین! ـ ره‌خنێ لحوكمه‌تێ دگرى؟ ـ ڤێجا كه‌نگى ره‌خنه بۆ حوكمه‌تێ خه‌مه. ـ ئها .. من زانى ژبه‌رچى یێ تۆڕه‌ى! ـ دێ وه‌ره هه‌دارا ڤى ئه‌فه‌ندى بكێشه! ـ بۆچى، چونكو ئه‌ز بئێشا ته كه‌فتم؟ ـ من نه‌ده ئاخفتنێ، هه‌كه دێ كولێن ڤێ كه‌هره‌با بۆیه متایه‌كێ قه‌چاخ لته ده‌ركه‌م. ـ من هزرا هه‌ر تشتى ژ ته كربا، من هزرا گه‌فا نه‌دكر. ـ تۆ دزانى، ئه‌فه‌ندى ل جهه‌كى من خاندیه، به‌س بیرا من ناهێت، ئاخفتن یا كێیه: دبێژیت: ئه‌گه‌ر ده‌ستهه‌ڵات گه‌نده‌ل بوو، ئه‌فه‌ندى دبن بۆڕیزانێن وێ!! ـ ڤێجا بۆڕیزان چنه؟ ـ یێن وه‌كو ته‌نه… ـ وه‌كو من؟ ـ به‌لێ، عه‌ینه‌ن وه‌كو ته‌نه! ئه‌زێ دبێژم: گره‌ك لڤى وه‌ڵاتى نه‌مایه، به‌رپرسه‌كى ئۆلییه‌ك ل سه‌ر ئاڤا نه‌كربیت یان تێله‌به‌ند نه‌كربیت، تۆ یێ دبێژى: ره‌خنێ لحوكمه‌تێ دگرى، ئانكو تۆ یێ من گونه‌هبار دكى بدژاتیا ڤى حوكمه‌تا هه‌موو پێكڤه ئوپۆزسیۆن، ئه‌و ژى چنه، پا ئه‌گه‌ر من گۆتبا حوكمه‌ت دكاریت، مۆچێن ژ ده‌وله‌تسه‌رێ رایه‌داران هه‌ر ماى نۆچه، بده‌ت لێ ناده‌ت، هنگى دا من تۆمه‌تبار كه‌ى، بهاندانێ بۆ خوه‌نیشاندانان و ده‌ستكیسیا دوژمنێن ڤێ حوكمه‌تا چ جار لبه‌رنه ببیته سنێله چ جاى بالقبوونێ! ـ ژ تۆڕه‌بوونا خوه، ته‌ڕوهشكا پیكڤه دسۆژى! ـ تنێ گه‌نده‌ل و بۆریزان و هنده‌كێن … ئه‌م گه‌هاندین ڤێ ره‌وشێ!
