تیرۆرسته‌ك بچووك خستینه د ناڤا ناخێ پڕانیا مه بسرمانان دا!!
ئه‌ز نه شاره‌زایه‌ك ئاینی مه و نه ژی بسپۆره‌كێ خوێندنه‌وه و نیشادانێن ئاینێ پیرۆزێ ئیسلامی مه، به‌لێ ئه‌ز ژی تاكه‌ك بسرمانم (مسلم) و ژخێزانه‌ك و جڤاكه‌ك ئیسلامی مه، ژ به‌ر هندێ ژی من ماف هه‌یه هنده‌كێ باسی سه‌قه‌تیێن جڤاكێ خوه یێ ئیسلامی بكه‌م و پشتراستم زۆربه‌یا جڤاكێن ئیسلامی و ب تایبه‌ت یێن عه‌ره‌بی د هه‌مان سه‌قه‌تی و شاشیێن ئه‌خلاقی و په‌روه‌رده‌كرنێ دانه.
ژبۆ كو ئه‌ز بابه‌تی ب شێوازه‌ك ساناهیتر دیار بكه‌م، من ڤیا ئه‌ز بابه‌تی ب سه‌ربۆره‌كا خوه ڤه گرێبده‌م یا ل گه‌ل فێربوون و په‌یره‌وكرنا ڤان سه‌قه‌تی و شاشیان.
بیرا من دهێت ده‌مێ زارۆ هێشتا ئه‌ز نه ببووم شه‌ش سال، ده‌مێ دایكا من به‌رێ سپێده‌كێ چه‌ند مست ل من دان و چه‌ند جاران ئه‌ز ڕاهه‌ژاندم هه‌تا ئه‌ز ژخه‌و هشیار كریم و پاش گۆته من: هلۆ نڤێژێ بكه دایگوری دا نه‌چیه جه‌هنه‌مێ د ناڤا ئاگری دا بسۆژی.. . دایكا من ژ ترسێن هندێ دا كوڕێ وێ د ناڤ ئاگری دا نه‌سۆژیت، هند مابوو كوڕێ خوه د ناڤا خه‌وێ دا شێت كری. دایكا من ژی هه‌ر وه‌ك من و وی ده‌می چو په‌یڤه‌كا عه‌ره‌بی نه دزانی، ژ بلی هندێ كو دایكا وێ ژی خه‌به‌رێن نڤێژان پێدابوونه ژبه‌ركرن وه‌ك چاوا وێ ب من دابوونه ژبه‌ركرن.
ژ به‌ر كو زارۆ بووم و ژ به‌ر حه‌زژێكرنا من بۆ دایكا من، ئه‌ز بوومه ئێك ژ باشترین نڤێژكه‌ران و پاشان ژی ئه‌ز فێری خواندنێ بووم و من قه‌ستا مزگه‌فتان كر، هنده‌ك جاران ڕۆژێن دوشه‌مب و پێنج شه‌مبان ژی پڕۆژی بووم. ئه‌وان ڕۆژێن درێژ یێن پڕی یاری و بزاڤ بۆ زارۆیه‌ك ده‌ه سالی تێهنی و بێ ئاڤ، به‌س بۆ هندێ دا كه‌یفا دایكا من بهێت و دا نهۆمه‌ك به‌هه‌شتێ بلندتر وه‌ربگرم ل دووڤ ئه‌و تشتێ جڤاكێ من نیشا من دای. ل مزگه‌فتان ژی، مامۆستایان (فه‌قیان) وانه ددانه مه و هه‌ر دیسا وه‌ك دایكا من به‌حسا ئاگرێ جه‌هنه‌مێ دكرن و هێژ زێده‌تر به‌حسا جۆرێن ئه‌شكه‌نجان و عه‌زابان دكرن، به‌حس دكر كو هه‌تا هه‌تایێ ئه‌و كه‌سێن نه بسرمان دێ سۆژن و سۆژنه‌ڤه. تشتێ ئێكێ یێ كو ئه‌ز ژ مامۆستایێن ڕه‌به‌ن یێن مزگه‌فتێ فێربوویم، ئه‌و بوو كو ژیانا سه‌ر دونیایێ ژیانه‌ك دره‌وه، نیشا من نه‌دان كو حه‌زژ ڤێ ژیانێ ژی بكه‌م، وه‌ك ڕاستیه‌ك سه‌ره‌ده‌ریێ دگه‌ل بكه‌م. هه‌ر دگۆتن چ تشت ژ مرنێ نزیكتر نین! و ل دووڤ دا به‌حسا جۆرێن عه‌زابان قه‌بری دكرن، ئه‌ڤجا مار و دووپشك و گورزێن ئاگری و ناڤێن ترسناك و تاریێ.. . هه‌یلا ل من و خوه‌لیسه‌رۆ دێ تو چكه‌ی؟!.
جارجاران ژی مامۆستایێن مه یێن مزگه‌فتێ ئه‌م زارۆ كۆم دكرین و ب شێوه‌ك بازنه‌یی روودنشتین و ده‌ست ب وانه گۆتنێ دكرن. وانا ژ هه‌میان زێدتر ل بیرا من ل سه‌ر حه‌زژێكرنا پێغه‌مبه‌ری (س) بوو. “دڤێت هوون هند حه‌ز ژ پێغه‌مبه‌ری (س) بكه‌ن زێده‌تری دایك و بابێن خوه، زێده‌تری خوه بخوه ژی” ئه‌ڤه ڕسته‌ك بوو كۆ هه‌ر ده‌م بۆ ده‌می ژ ده‌ڤێ مامۆستایێ من ده‌ردكه‌فت. جارجاران مامۆستایی چاڤێن خوه تژی ڕوندك دكرن و د به‌ر كه‌له‌گریێ دا و ب شێوازه‌ك درامایی به‌حسا هێزا حه‌زژێكرنا (ئه‌سحابیان) بۆ پێغه‌مبه‌ری (س) دكر. به‌حسا شه‌ڕان (مه‌عره‌كان) دكرن، سه‌ربڕین و سه‌رفڕاندن و سه‌ر پلیتكرنا كافران!!. ب خێرا مزگه‌فت و مامۆستایێن وێ (فه‌قیان)، ئه‌ز شاره‌زایێ هه‌ژمارتنا خێر و گونه‌هان بووم. هه‌ر نڤێژه‌ك ب چه‌ند خێرانه، كۆم ب چه‌ندایه و ب تنێ ب چه‌ندێ یه، ل مال ب چه‌ندێ و ل مزگه‌فتان ب چه‌ندێ، مزگه‌فتا دوور ب چه‌ندێ و نێزیك ب چه‌ندێ. دیسا ئه‌ز بوومه بسپۆرێ جۆرێن عه‌زابێن قه‌بری و ئاگرێ جه‌هنه‌مێ و شێوازێن ئه‌شكه‌نجه‌دانا گونه‌هكار و كافران!، ژ بلی هنده‌ك جاران دایكا من و كه‌سوكارێن من سه‌ره‌رایی بچووكتیا من، پسیار سه‌باره‌ت جۆرێن عه‌زابدانا عه‌بدان ژمن دكرن. ڕاسته فێری شێواز و بنكه‌یێن ئاینێ پیرۆێ ئیسلامێ بووم، به‌لێ ب شێوه‌ك ئۆتۆماتیك و ب نه‌زانه‌بوونیا جڤاكی، بنگه‌هه‌ك ژ توندوتیژی و نه‌په‌سه‌ندكرنا كه‌سانێن خوه‌دان ئاین و عه‌قیدێن جودا ل ده‌ف من دروست بوو، ئه‌ڤ بنگه‌هه ل ده‌ف پڕانیا تاكێن بسرمانان (موسلمانان) هه‌یه و دبیت ژ كه‌سه‌ك بۆ كه‌سه‌كێ دی كێمتر یان زێده‌تر بیت.
ژ به‌ر ڤان سه‌قه‌تی و نرخێن جڤاكی یێن شاش و په‌روه‌ردا ئاینی یا نه دروست (دوور ژ ئاینێ ئیسلامێ)، تیرۆرسته‌ك بچووك یان (داعشه‌ك) بچووك د ناڤا ناخێ هه‌ر تاكه‌كێ بسرمانان دا هه‌یه و كێم كه‌س هه‌نه خوه ژ ئێخسیریا ڤان هزر و تێگه‌هێن شاش ب شێوه‌ك ته‌مام قورتالكر بیت.
بوویه ژی، زۆر نۆرماله ئه‌و زارۆیێ فێربووی زێده‌تر حه‌ز ژ پێغه‌مبه‌ری (س) بكه‌ت ژخوه و ژیانا خوه و فێربووی كو ژیانا وی یا ل سه‌ر دونیایێ دره‌وه و بێ مفایه، فێربووی كو ڕه‌خنه‌یان ل سه‌ر ئاینێ خوه په‌سه‌ند نه‌كه‌ت و ئاماده بیت ژیانا خوه پێخه‌مه‌ت ڕه‌خنه‌ك یان گۆتنه‌ك بچووك بكه‌ته قوربانی (جهاد)، ببیته خوه‌كوژ (ئینتیحاری) و داویێ بـ”ژیانا خوه یا دره‌و” بینیت و هندی بشێت كافره‌ك یان (مورته‌ده‌ك) یان نه‌حه‌زه‌ك پێغه‌مبه‌ری (س) بكوژیت و بچیته دیوانا وی كه‌سێ فێربووی (یان هاتیه فێركرن) ژ خوه و ژ دایك و بابێن خوه زێده‌تر حه‌ز ژێ بكه‌ت!!.
