تیمێن گه‌ڕۆكێن ساخله‌میێ ده‌ست ب ڤاكسیندانانێ بۆ وه‌لاتیان كر
دهۆك، له‌زگین جوقی:
به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ خویا كر كو تیمێن گه‌رۆك د ناڤ پاركا نه‌ورۆز ل بازارێ‌َ دهۆكێ دا، دوهی پشتی نێڤرۆ 20/11/2021 ده‌ست ب ڤاكسیندانانێ بۆ وه‌لاتیان كر.
حه‌مزه ره‌زیكی، به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ بۆ رۆژناما ئه‌ڤرۆ گۆت: “ل رۆژا 20/11/2021ێ ساخله‌میا پارێزگه‌ها دهۆكێ ده‌ست ب هه‌وه‌كا به‌رفره‌ه یا ڤاكسیندانانێ ب رێیا تیمێن گه‌رۆك یێن ڤاكسیندانانێ ن داڤ پاركا نه‌ورۆز ل بازارێ دهۆكێ كر، ئه‌ڤ تیمێن گه‌رۆك دێ قه‌ستا ناڤ پاركا نه‌ورۆز ل ناڤ بازارێ دهۆكێ كه‌ن، له‌ورا ژی ئاگه‌هداریا خه‌لكێ خوه دكه‌ین هه‌ر كه‌سێ ڤاكسین وه‌رنه‌گرتی، قه‌ستا پاركا نه‌ورۆز ل ناڤ بازارێ دهۆكێ بكه‌ت بۆ وه‌رگرتنا ڤاكسینا كۆرۆنایێ”.
حه‌مزه ره‌زیكی ئه‌و ژی گۆت: “تیمێن گه‌رۆك یێن ڤاكسیندانانێ دێ رۆژانه ژ ده‌مژمێر دویێ پشتی نێڤرۆ هه‌تا پێنجی ئێڤاری د كاری دا بن د ناڤ پاركا نه‌ورۆز دا بۆ خزمه‌تكرنا وه‌لاتیان و ڤاكسینا دژی كۆرۆنایێ دێ بۆ وه‌لاتیان دانن”.
به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ زێده‌تر گۆت: “هه‌ر وه‌لاتیه‌كێ ژیێ وی یان وێ د سه‌ر 12 سالیێ دا بیت، دشێت ب رێیا وان تیمان ڤاكسینا دژی كۆرۆنایێ راسته‌وخوه وه‌ربگریت و پێدڤیه كه‌سێن ڤاكسینێ وه‌ردگرن ناسناما بارێ شارستانی یان پاسپۆرت د گه‌ل دا بیت”.
