تیمەكا نۆشدارێن ئیتالی 19 نشتەرگەری بۆ زارۆیان ل دهۆكێ ئەنجامدان
دهۆك، لەزگین جۆقی:
رێڤەبەریا گشتی ساخلەمیا پارێزگەها دهۆكێ راگەهاند، تیمێن نۆشدارێن ئیتالی 73 نەخۆش دیتن و رەوشا وان یا ساخلەمییێ هەلسەنگاند و 19 نشتەرگەری و قەستەرێن دلی بۆ نەخۆشان ئەنجامدان، ژ وان نەخۆشان ژی: 17 زارۆكێن نەخۆشیێن دلی و زكماكی هەین، ژ خزمەتێن ساخلەمییێ مفاداربوون.
د. ئەفراسیاب موسا، رێڤەبەرێ گشتی یێ ساخلەمیا پارێزگەها دهۆكێ بۆ رۆژنامەیا ئەڤرۆ گۆت: «ل دووڤ وێ یاداشتنامەیا د ناڤبەرا ساخلەمیا پارێزگەها دهۆكێ و رێكخراوا هیڤی یا ئیتالی و لایەنێن ئیتالی دا هاتیە ئیمزا كرن، تیمەكا نۆشدارێن ئیتالی ژ باشترین نەخۆشخانەیێن ئیتالیا ل دهوكێنە ل سەنتەرێ ئازادی یێ نشتەرگەری و نەخۆشیێن دلی شیان چەندین نشتەرگەرییان بۆ زارۆكێن نەخۆشیێن دلی هەین، ب سەركەفتییانە ئەنجام بدەن».
