تیپا حەلەبچە و دهۆك تیڤی سرۆدا ئەم ناچەمیێن بەرهەمئینا
زاخۆ، دلۆڤان هالۆ:
د. بێکەس نووری عەبدال، ئاوازدانەر و دابەشکەرێ سرۆدێ د دیدارەکێ دا بۆ ڕۆژناما ئەڤرۆ دیارکر کو تیپا حەلەبچە یا هونەری ب هەڤکاری لگەل دهۆك تیڤی، نووترین بەرهەمێ خوە یێ هونەری کو سرۆدەکا ب هێز و نەتەوەییە بناڤێ ئەم ناچەمیێن کلیپ کر و بەلاڤکر.
ناڤهاتی ئاماژە ب وێ چەندێ ژی کر کو ئەڤ سرۆدە وەکو پەیامەکا خوەڕاگری و نەتەوەیی دهێتە هژمارتن، ژ پەیڤێن هەلبەستڤان و سەرۆکێ تیپا حەلەبچە یا هونەری (نەشوان محەمەد سالح)ـە، و ئاواز و دابەشکرنا مۆزیکێ ژ لایێ هونەرمەند (بێکەس نووری عەبدال) ڤە بۆ هاتیە ئەنجامدان.
د. بێکەس نووری عەبدال دبێژیت:»ژ لایێ تەکنیکی و وێنەگرتنێ ڤە ئەڤ کارە ب کوالیتەیەکا بلند و ب دەرهێنەریا (محەمەد جانۆ) هاتیە ئەنجامدان، وێنەگرێن کارەکی ژی (ڕێناس سەعدۆللا و ئاران عومەر عەلی) بوونە، کارێ تۆمارکرنا دەنگی ل (ئێکس ستۆدیۆ) ژ لایێ (جێگر ئەنەس ئامێدی) ڤە هاتیە کرن، و (محەمەد بامەڕنی) کارێ مێکس و ماستەرینگێ بۆ ئەنجام دایە».
گۆت ژی:»کۆمەکا هونەرمەندێن خودان شیان وەکو سۆڵۆویست پشکداری د ڤی بەرهەمێ مەزن دا کرینە، وەکو هشیار (کۆچەر، پەروەر محسن، جەمال وەرمێلی، لۆقمان ڕێکانی، مێهڤان بێدهی، یاسین شێلازی)، هەر دیسان کۆڕسەکێ مەزن ب دەنگێن خۆ یێن زەلال زەنگینی دایە سرۆدێ وەکو (ئەکرەم یەعقۆب، دۆستان نزار، نۆرا، ڕدوان بەرژەس، سیزار مۆخلس، ڕۆژین جاسم، نۆژین جاسم، زیندان محەمەد، بیرهات مزوری، مۆسا کۆچەر)».
زێدەتر ژی گۆت:»ئەڤ سرۆدە ب مۆدێ (کورد) ڕیتمێ (٦/٨) سرۆدەکا نەتەوەیی و نشتیمانییە ب دەنگێ کۆمەکا هونەرمەندێن خۆدان ئەزموون دناڤ جڤاکی دا هاتیە ستراندن، ب هیڤیا وێ چەندێ کو ببیتە هێڤێنەکێ باش بۆ پتر بهێزکرنا هەست و هشیاریا نەتەوەیی».
