تیپا دهۆكێ یا هونەرێ مللی دێ چیتە رۆژئاڤایێ كوردستانێ
تیپا دهۆك یا هونەرێ مللی، دێ پشكداریێ د گەڕا حەفتێ یا فەستیڤالا كلتۆری یا دیلانێن كوردی ل باژێرێ قامیشلۆ ل رۆژئاڤایێ كوردستانێ دا كەت:
ئەحمەد مشەختی، سەرۆكێ تیپا ناڤهاتی بۆ رۆژنامەیا ئەڤرۆ گۆت: ئەڤە ژ 2015 ێ وەرە هەتا نوكە بۆ جارا ئیكێ شاندەكێ هونەری یێ فەرمی ژ هەرێما كوردستانێ دێ چیتە رۆژئاڤایێ كوردستانێ، ژبۆ پشكداریكرنێ د وێ فەستیڤالێ دا و نوكە ئەم یێ بەرهەڤیان دكەین، هەروەسا ئەو گرۆپێن پشكدار هەموو یێن رۆژئاڤایێ كوردستانێ نە، تاكە گرۆپێ دەرڤەیی سنۆرێ رۆژئاڤایێ كوردستانێ، تیپا دهۆك یا هونەرێ مللی یە، و ئەم ب رەنگەكێ فەرمی ب رێیا وەزارەتا رەوشەنبیری یا حكومەتا هەریما كوردستانێ هاتینە داخوازكرن.
ناڤهاتی گۆت: شاندێ تیپا مە ژ 22 كەسان پێك دهێت، ب نوونەراتیا رێڤەبەریا گشتی یا رەوشەنبیری و هونەری ل دهۆكێ، دێ پشكداریێ د وێ فەستیڤالێ دا كەین، مە مە سمینار و ووركشۆپ ژی دێ هەبن، ل گەل هندێ مە بڕگەیەكا تایبەت هەیە، ئەو ژی ل سەر پێكڤە ژیانا ئۆلی و نەتەوەیی و جۆگرافیا هەرێما كوردستانێ یە، هونەرێ مللی ئەو جۆرە هونەرە یێ كو سنۆران دبەزینیت و پەیامێن مە ژی ب رێیا ڤی هونەری دگەهن و ئەم سۆپاسیا حكومەتا هەریما كوردستانێ دكەین، كو بەردەوام پشتەڤانیێ ل كارێ مە دكەن.
