تیپه‌كا رێك و پێك دروستبكه‌ن، دا یاریه‌كا جوان و سه‌ركه‌ڤتی بكه‌ین
د دیروَكێدا كورد بووینه قوربانیێن به‌رژه‌وه‌ندیێن وه‌لاتێت زلهێزێن دونیایێ، به‌لێ ل ڤان چه‌ند سالێن دویماهیێ دیاره سێرا وان هاتیه گوهوَرین و به‌رژه‌وه‌ندیێن وان دهه‌ڤكوَك بینه دگه‌ل كوردستاتێ و خه‌لكێ وێ.
یا مه دڤێت دیاركه‌ین و بێژین، ئه‌گه‌ر ئه‌م به‌رێخوه بده‌ینه شاشێن مێدیایێن كوردستانێ و گوهێ خوه بده‌ینه بوَچوونێن جادێن كوردستانێ دێ مروَڤ گه‌له‌ك دلسار بیت، ژبه‌ركو هه‌ر تێله‌فزیوَنه‌ك و رادیوَ و روَژنامه و گوڤار و مالپه‌ره‌كێ ئه‌لكترونی و گوتنێن هه‌موو ته‌خا د ناڤ وه‌لاتێ مه دا، دێ مروَڤ باش زانیت كو هێش كورد نه گه‌هشتینه بازه‌كا باشا ره‌وشنهزری، ژبه‌ركو هه‌ر هزر و دیتنه‌كا ل به‌ر چاڤێ مروَڤی دكه‌ڤیت یان گوهلێ دبیت، دێ زانیت تاگیریا ئالیه‌كێ سیاسی هه‌مبێزكریه و ئه‌و هزر نه شیایه خوه ژ ناڤه‌روَكا هزریا وێ هێزا سیاسی دوور بێخیت و باش خوَیا دبیت كو پارتایه‌تیا به‌رته‌نگ یا ل سه‌ر هزر و مه‌ژیێ هه‌میا یا زاڵه و په‌ییكا هه‌موویا ژی د چارچوَڤه و دنێرینه‌كا حزبی دا دهێته هه‌ڤیركرن و هزر و بوَچوونێن نه‌ته‌وی دهێنه ژبیركرن و هه‌ر ئێك ژی دیتن و هزركرنێن خوه ب راستی دزانیت و هزرا به‌رامبه‌ر ژی خه‌له‌ت دزانیت و هه‌ر ئالیه‌ك ژی ئالیێ دیتر گوننه‌هبار دكه‌ت كو یێ گرێدایی بێڤان وه‌لاتیه و ئه‌جیندایێن وی وه‌لاتی ب جهـ دئینیت.
هه‌ر ئێك ژی ئه‌جیندایێ خوه براست ل قه‌له‌م دده‌ت و ئه‌گه‌ر ئه‌م ل دیروَكێ بزڤڕین دێ زانین و ئه‌و گرێكا ئالوَز هه‌ر ئه‌ڤه بوویه، مه وه‌كو كورد چ ئیستراتیجیه‌ته‌كا راست و دروست نه‌بوویه كو ل سه‌ر بچین، له‌وما ئه‌م بووینه قوَربانیێن ده‌وله‌تێن مه‌زن، ئه‌ڤجا دووماهی پشتی هاتنا داعشێ و قوَربانیدانا پێشمه‌رگه‌ی ل كوردستانێ و چ ل باشوور و چ ل روَژئاڤا، یا بوَ هه‌موو وه‌لاتێن دونیایێ خوَیا بووی كو كورد یێن شیاین ل سه‌ر عه‌ردی سه‌ری تیرورستێن داعشێ زالبوَین، راسته قوَربانیێن مه‌زن داینه، لێ ئه‌ڤروَكه هه‌ركو وه‌ك شانازی ب پێشمه‌رگه‌ی و شه‌رڤانێن كوردستانێ دكه‌تن بوَ واقعه‌ك ل هه‌موو دونیایێ دان پێدانێ دكه‌ن، به‌لێ ئه‌ڤ پارتێن ده‌ستهه‌لاتدار ل باشوور و باكوور و روَژئاڤا ژبه‌ر پارتایه‌تیا به‌رته‌نگ كه‌فتینه د هه‌ڤڕكیه‌كا مه‌زن دا و نه‌یارێن ملله‌تێ مه ژی فارس و تورك و عه‌ره‌ب، ئانكو رژێمێن ئیران و تورك و عیراق و سوریا، هه‌رده‌م دژی ئێك و دو بوَینه بوَچوونێن وان د جودابووینه، لێ بوَ دوَزا كوردا هه‌رده‌م و هه‌تا ئه‌ڤروَ ئێك ده‌نگن و ئێك تیپن و یاریكه‌رێن خوه ب جوانی پارڤه دكه‌ن، وه‌كو فلمه‌كێ سینه‌مایی ئه‌كته‌رێن فلمی هه‌ر ئێك روَلێ خوه دبینیت، بوَ ژێك ڤه‌كرن و دووركه‌تنا كوردا ژ ئێك و دو و كوردا ژی هه‌تا ئه‌ڤرۆ مفا ژ سه‌ربوَرێن كه‌ڤن وه‌رنه‌گرتینه، مه نه‌ڤێت ناڤا بینین، به‌لێ یا خوَیایه ئه‌گه‌ر باش بخوینین هنده‌ك پارت وه‌سا هزر دكه‌ن ئه‌گه‌ر هێزا كوردیا ئێكێ ل باكووری شه‌ری هێزا ئێكێ یا باشووری بكه‌تن دێ ئه‌و لایه‌ن یێ مفادار بیت، لێ یا من دڤێت بێژم چ لایه‌ك ژ ڤانا سه‌ركه‌فتی نابن، نه ئه‌و لایه‌نێ ڤان لایه‌نا ڤێكرا به‌ردده‌ن و ئاگری خوه‌ش دكه‌ن و نه ئه‌وێن خودێ نه‌كه‌ت شه‌ری دكه‌ن، بتنێ یێ مفایی وه‌رگریت دێ هه‌ر چوار وه‌لات بن كو ئه‌م دناڤبه‌را واندا هاتینه پارڤه‌كرن، ئه‌ڤجا ئه‌ڤێ ده‌لیڤا زێرین بوَ كوردا هه‌لكه‌فتی ژ ده‌ست نه‌ده‌ن، ئه‌ڤه 100 سال ل سه‌ر په‌یمانا سایكس-پیكوَ ڤه چوون، دیاره دێ نه‌خشێ ده‌ڤه‌رێ ژی هێته گوهوَرین، نوكه ب به‌ژن و بالا كوردان دهێته گوتن و جادا وه‌لاتێن دونیایێ ب هه‌موو ته‌خ و چینێن خوه‌ڤه بوَینه لوَبیا كوردا، ئه‌ڤجا كه‌س ب خوَرتی مه ناكه‌ته ده‌وله‌ت، هه‌ڤڕكی و ناكوَكیێن خوه ب ده‌نه لایه‌كی و لژنه‌یه‌كا بلند دروست بكه‌ن بوَ خالێن گرنگێن نه‌ته‌وا كورد و هه‌ر پارچه‌كێ تایبه‌تمه‌ندیا خوه هه‌یه، ل دویف وان تایبه‌تمه‌ندیان، به‌رنامه‌ی بوَ بدارێژن و كاری ل سه‌ر بكه‌ن دگه‌ل هه‌ڤپه‌یمانا، ئه‌گه‌ر ڤێ نه‌كه‌ن هه‌ر چوار ده‌وله‌ت یێ گه‌له‌ك ته‌نازلا بوَ وه‌لاتێن هه‌ڤپه‌یمانان كه‌ن و دێ كورد د ڤێ یاریێ دا بنه قوَربانی، ئه‌گه‌ر ئه‌م هزر بكه‌ین ئه‌م هه‌ڤالێن هه‌ڤپه‌یماناینه، بلا خوه پشتراست نه‌كه‌ین، ئه‌گه‌ر د ناڤخوه دا ئێك ده‌ست و ئێك دل نه‌بین، مومكن نینه ئه‌وا كوردان دڤێت بوَ بهێته كرن و هێجه‌تا هه‌ڤپه‌یمانان ژی دێ یا خوه‌شبیت و دێ بێژن ئه‌م بوَ هه‌وه دكه‌ین، به‌لێ هوین نه ئێكن، ئه‌گه‌ر تشته‌كی بوَ مه بكه‌ن ژی، به‌لێ دێ یێ مروَڤایه‌تی بیت و ئه‌ڤ ده‌لیڤه ژی جاره‌كا دن دوباره‌نابنه‌ڤه.
دیسان خاله‌كا دی یا گرنگ ئه‌وه كو ژ ئه‌ڤروَ وێڤه، نه‌خاسمه پشتی كو مادێ 140 بده‌ستڤه‌هاتی و بوویه ژیواره‌ك، پشتی هێرشێ ل سه‌ر مویسل بكه‌ن، پێدڤیه دگه‌ل هێزین هه‌ڤپه‌یمانا پێكهاتنه‌كێ بكه‌ن كا دێ پێشمه‌رگه ل كیرێ بیت، چونكی ئه‌گه‌ر داعش چوون ژی گه‌له‌كێن دیتر هه‌نه كێرێن خوه خوه‌ش دكه‌ن بوَ كوردان، له‌وما ئێدی به‌سه شاشی و هه‌ڤرَكیێن نه‌پاك بده‌نه لایه‌كی، ئه‌ڤروَ گاڤا هندێ نینه ب ئێك ده‌نگ خالێن گرنك و ئیستراتیجی بوَ كوردستانێ دگه‌ل هه‌ڤپه‌یمانا به‌حس بكه‌ن و بنڤیسن و به‌لگه و ب شه‌هده‌ییا نه‌ته‌وه‌یێن ئێكگرتی، چونكه ئه‌ڤروَكه رولێ كوردا یێ پێشچاڤه لوَبیه‌كا بهێز ژی كوردا هه‌یه، دیسا بزاڤێت خوه خوَرتتر بكه‌ن كو جیرانیه‌كا باش مه دگه‌ل سونا ژی هه‌بیت، چونكی ئه‌و جیرانێت مه‌نه هه‌تا هه‌تایێ نابیت كوشتن و خوین رێتن هه‌بیت.
دیسان مافه‌كێ كوردا یێ ره‌وایه كو داخازیا هێزه‌كا هه‌ڤپه‌یمانا بكه‌ن بوَ پاراستنا سنورێن دناڤبه‌را مه و ئیراقێ دا دگه‌ل پێشمه‌رگا بن.
ئه‌گه‌ر هه‌موو ئالی ئه‌ڤێ نه‌كه‌ن جاره‌كا دی دێ ئه‌ڤ ده‌ست كه‌فته بنه بیرهاتن و وه‌كو هه‌موو شوَره‌شێن دی یێن كه‌ڤن دێ بنه بیرهاتن و هه‌ر لایه‌ك دێ بێژیتن فلان لایه‌ن یێ گونه‌هباره، به‌لێ وی ده‌می قه‌ت و قه‌ت فایده ناكه‌ت، هه‌موو پێكڤه د خه‌تاباربن و خوه‌لی ب سه‌ربن.
}}
